ເມື່ອບໍ່ດົນມານີ້, ສປ ຈີນ ໄດ້ແນະນຳລົດໄຟໃໝ່ລ້າສຸດລຸ້ນ CR450 ໂດຍຈະມີ 2 ແບບຄື CR450 AF ແລະ CR450 BF, ເປັນລົດໄຟຄວາມໄວສູງລຸ້ນໃໝ່ທີ່ສາມາດແລ່ນດ້ວຍຄວາມໄວສູງສຸດເຖິງ 450 ກິໂລແມັດຕໍ່ຊົ່ວໂມງ ເຮັດໃຫ້ກາຍເປັນລົດໄຟທີ່ແລ່ນໄວທີ່ສຸດໃນໂລກ.

ລົດໄຟລຸ້ນ CR450 ເປັນລົດໄຟທີ່ແລ່ນດ້ວຍຄວາມໄວສູງ, ໃນໄລຍະໃຫ້ບໍລິການອາດຈະແລ່ນຢູ່ທີ່ 400 ກິໂລແມັດຕໍ່ຊົ່ວໂມງ, ນອກຈາກນັ້ນຍັງເປັນລົດໄຟທີ່ປະຢັດພະລັງງານ, ຫຼຸດຜ່ອນສຽງລົບກວນ, ມີໄລຍະການເບກທີ່ສັ້ນລົງ ແລະ ອັດສະລິຍະກ່ວາເກົ່າ. ລົດໄຟລຸ້ນ CR450 ເປັນການກ້າວກະໂດດອັນສໍາຄັນທາງດ້ານວິທະຍາສາດການລົດໄຟຂອງ ສປ ຈີນ ຊຶ່ງຈະຍົກສູງລະດັບນະວັດຕະກຳວິທະຍາສາດເຕັກໂນໂລຊີທາງລົດໄຟຂອງຈີນ, ຄວາມເປັນເອກະລາດດ້ານວິທະຍາສາດ, ການເພິ່ງພາຕົນເອງ ແລະ ເປັນຜູ້ນໍາດ້ານວິທະຍາສາດການລົດໄຟ.

ຈຸດເດັ່ນຂອງລົດໄຟລຸ້ນ CR450 ແມ່ນສາມາດຫຼຸດແຮງຕ້ານລົມລົງດ້ວຍເຕັກນິກໃໝ່ ແລະ ວັດສະດຸໃໝ່ ຊຶ່ງຮູບຮ່າງຂອງຫົວລົດໄຟ ແລະ ຄວາມຍາວຂອງຫົວລົດໄຟຈະຍາວກວ່າເກົ່າ, ນຳໃຊ້ແຂນຮັບໄຟຟ້າແຮງສູງ(pantograph) ທີ່ມີແຮງຕ້ານຕ່ຳ, ມີລະບົບໂບກີ້(bogie)ທີ່ກວມຫຸ້ມເພື່ອຫຼຸດແຮງຕ້ານ,ມີຢາງປົກຫຸ້ມຈຸດເຊື່ອມຕູ້ລົດໄຟ(vestibule diaphragm)ຢ່າງແໜ້ນໜາ.

ການອອກແບບພາຍໃນຕົວລົດຈະມີການເພີ່ມຫ້ອງສ່ວນຕົວແບບອະເນກປະສົງຫຼາຍແບບຄື: ຫ້ອງສ່ວນຕົວແບບຄົນດຽວ, ຫ້ອງສ່ວນຕົວແບບ 4 ຄົນ ແລະ ຫ້ອງສ່ວນຕົວແບບອະເນກປະສົງພາຍໃນຈະມີສິ່ງອຳນວຍຄວາມສະດວກຄົບ, ເຂົ້າອອກດ້ວຍລະຫັດຜ່ານ. ໃນລົດຍັງມີພື້ນທີ່ຈັດເກັບເຄື່ອງທີ່ຫຼາກຫຼາຍ ແລະ ການອອກແບບທີ່ທັນສະໄໝຄວບຄຸມດ້ວຍລະບົບອັດສະລິຍະ.

ຂ່າວ: ບໍລິສັດທາງລົດໄຟລາວ-ຈີນ