ກອງປະຊຸມສາມັນຄົບຄະນະກໍາມະການ ສູນກາງແນວລາວສ້າງຊາດ (ສນຊ) ຄັ້ງທີ 4 ສະໄໝທີ XI ໄດ້ປິດລົງຢ່າງເປັນທາງການໃນວັນທີ 16 ມັງກອນນີ້ ທີ່ສູນການຮ່ວມມືສາການ ແລະ ການຝຶກອົບຮົມ (ICTC) ນະຄອນຫຼວງວຽງຈັນ, ໂດຍການເປັນປະທານຂອງທ່ານ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ ປະທານສູນ ກາງແນວລາວສ້າງຊາດ, ມີບັນດາທ່ານແຂກຖືກເຊີນ, ບັນດາທ່ານຄະນະກຳມະການ ສນຊ ອ້ອມຂ້າງສູນກາງ, ບັນດາແຂວງທົ່ວປະເທດ ເຂົ້າຮ່ວມ.
ໃນກອງປະຊຸມຄັ້ງນີ້, ໄດ້ພ້ອມກັນທົບທວນ ແລະ ກວດກາຄືນວຽກງານຮອບດ້ານຂອງຄະນະກໍາມະການ ສນຊ ປີ 2024, ຜ່ານການປະກອບຄຳເຫັນຂອງບັນດາທ່ານຜູ້ແທນເຂົ້າຮ່ວມກອງປະຊຸມ ໂດຍສັງ ລວມ ສາມາດຍາດໄດ້ຜົນງານອັນພົ້ນເດັ່ນໃນໜ້າວຽກ 6 ດ້ານ, ແຕ່ກໍປາສະຈາກບໍ່ໄດ້ບາງຂໍ້ຄົງຄ້າງ ໃນປີ 2024 ຊຶ່ງມີຢູ່ 5 ຂໍ້; ພ້ອມນີ້, ກໍໄດ້ຖອດຖອນບົດຮຽນ 4 ຂໍ້, ບົນພື້ນຖານບົດຮຽນນັ້ນ, ໄດ້ພ້ອມກັນປຶກສາຫາລື ແລະ ເປັນເອກະພາບກັນຮັບຮອງແຜນວຽກຈຸດສຸມໃນປີ 2025 ໂດຍສືບຕໍ່ຈັດຕັ້ງປະຕິບັດບັນດາທິດຊີ້ນໍາ ກໍຄືແຜນວຽກທີ່ໄດ້ກໍານົດໃນມະຕິ XI, ແຜນພັດທະນາແນວລາວສ້າງຊາດ ແລະ ມະຕິກອງປະຊຸມ ຄະນະກໍາມະການ ສນຊ ຄັ້ງທີ 4 ສະໄໝທີ XI ໃຫ້ແຂງແຮງຂຶ້ນກວ່າເກົ່າ; ໃນນີ້, ກອງປະຊຸມໄດ້ຮັບຮອງກໍາມະການ ສນຊ ປ່ຽນແທນເພີ່ມຕື່ມຈຳນວນ 2 ທ່ານ.
ໂອກາດກ່າວປິດກອງປະຊຸມ, ທ່ານປະທານສູນກາງແນວລາວສ້າງຊາດ ໄດ້ເນັ້ນໜັກບາງເນື້ອໃນວ່າ: ປີ 2025 ນີ້ ເປັນປີທີ່ສຳຄັນ ແລະ ມີຫຼາຍວຽກງານໃຫຍ່ລະດັບຊາດ ເພື່ອເຮັດສໍາເລັດໜ້າທີ່ພວກເຮົາຕ້ອງກໍາແໜ້ນ ແລະ ເອົາໃຈໃສ່ບາງວິທີການ ແລະ ມາດຕະການ ຄື: ພ້ອມກັນຄົ້ນຄວ້າເຊື່ອມຊຶມມະຕິໃໝ່ຂອງສູນກາງພັກ ເປັນຕົ້ນແມ່ນມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 9 ສະໄໝທີ XI, ກຳແໜ້ນ ແລະ ຈັດຕັ້ງປະຕິບັດນະໂຍບາຍ ແລະ ແຜນພັດທະນາປະຈຳປີ 2025 ຂອງລັດຖະບານ ທີ່ສະພາແຫ່ງຊາດຮັບຮອງເອົາແລ້ວນັ້ນ, ບົນຈິດໃຈອຸທິດຕົນ ເພື່ອຜົນປະໂຫຍດລວມຂອງກຳມະການ ສນຊ ທີ່ເປັນມູນເຊື້ອ; ປັບປຸງແບບແຜນເຮັດວຽກບົນຈິດໃຈຮັບຜິດຊອບຕໍ່ຜົນໄດ້ຜົນເສຍ, ບົນຈິດໃຈແຂ່ງຂັນກັນເຮັດລ້ອນໜ້າທີ່ຂອງຕົນ, ເອົາໃຈໃສ່ປະຕິບັດຂໍ້ແຂ່ງຂັນຮັກຊາດ ແລະ ພັດທະນາ ເປັນຕົ້ນ 9 ຂໍ້ແຂ່ງຂັນ ຂອງອົງການແນວລາວສ້າງຊາດ; ພ້ອມດຽວກັນນີ້, ຈົ່ງເພີ່ມທະວີຄວາມຮັບຜິດຊອບ ແລະ ເປັນແບບຢ່າງ ຂອງກໍາມະການແນວລາວສ້າງຊາດ ທຸກໆຂັ້ນໃຫ້ສູງກວ່າເກົ່າ, ເພື່ອເຮັດແນວໃດໃນພື້ນທີ່ຕົນຮັບຜິດຊອບຕ້ອງເສີມສ້າງຄວາມສາມັກຄີເປັນປຶກແຜ່ນ, ເສີມສ້າງຄຸນງາມຄວາມດີໃຫ້ເພີ່ມທະວີສູງຂຶ້ນ, ເສີມສ້າງຄຸນວຸດທິ, ເຕົ້າໂຮມຫົວຄິດ, ປະກອບສ່ວນເຮັດໃຫ້ກົມກອງທ້ອງຖິ່ນຂອງຕົນມີໃບໜ້າໃໝ່ ແລະ ຈົ່ງເສີມສ້າງໃຫ້ໄດ້ຄຸນນະທໍາ, ອະລິຍະທໍາ ຂອງທຸກສາສະໜາ ໃຫ້ສາສະນິກະຊົນມີສັດທາຍິ່ງໆຂຶ້ນ.
ຂ່າວ: ບຸນອູ້ມ, ພາບ: ບຸນຕອມ
