ຂ່າວສານຊີອາໄອລາຍງານວ່າ: ໃນວັນທີ 16 ມັງກອນ ຜ່ານມານີ້, ງານສົນທະນາເຈົ້າຄອງນະຄອນທົ່ວໂລກໄດ້ຈັດຂຶ້ນຢູ່ນະຄອນໜານໜິງ ເຂດປົກຄອງຕົນເອງເຜົ່າຈ້ວງກວາງຊີສປຈີນ, ເຈົ້າຄອງນະຄອນແລະຜູ້ຕາງໜ້າທີ່ມາຈາກ 12 ນະຄອນຂອງ 8 ປະເທດຄື: ຈີນ, ລາວ, ກໍາປູເຈຍ, ອິນໂດເນເຊຍ, ມາເລເຊຍ, ມຽນມາ, ໄທແລະຫວຽດນາມໄດ້ເຂົ້າຮ່ວມງານຄັ້ງນີ້ໂດຍຜ່ານການສົນທະນາແລະແລກປ່ຽນຄວາມເຫັນຢ່າງເລິກເຊິ່ງເພື່ອປະກອບສ່ວນດ້ານສະຕິປັນຍາເຂົ້າໃນການຊຸກຍູ້ການສ້າງປະຊາຄົມຮ່ວມຊາຕາກໍາຈີນ-ອາຊຽນທີ່ແໜ້ນແຟ້ນກວ່າເກົ່າ.
ທ່ານໜົງເຊີ່ງເວີນເລຂາຄະນະພັກນະຄອນໜານໜິງເຂດປົກຄອງຕົນເອງເຜົ່າຈ້ວງກວາງຊີສປຈີນໄດ້ກ່າວຄໍາປາໄສວ່າ: ນະຄອນໜານໜິງຍິນດີຮ່ວມກັບບັນດາຝ່າຍລົງເລິກການໄປມາຫາສູ່ກັນແບບໄມຕີຈິດມິດຕະພາບ, ການເຊື່ອມໂຍງເຊື່ອມຈອດກັນ, ການຮ່ວມມືດ້ານອຸດສາຫະກໍາຂ້າມຊາດແລະການແລກປ່ຽນດ້ານວັດທະນະທໍາຕື່ມອີກ. ຊຸກຍູ້ການສ້າງເຂດການຄ້າເສລີຈີນ-ອາຊຽນສະບັບ3.0ເພື່ອບັນລຸການພັດທະນາຮ່ວມກັນ ແລະຄວາມຈະເລີນຮຸ່ງເຮືອງນໍາກັນໃນຂະບວນການຮ່ວມກັນສ້າງ “ໜຶ່ງແລວໜຶ່ງເສັ້ນທາງ”ທີ່ມີຄຸນນະພາບສູງ.
ທ່ານອາດສະພັງທອງສີພັນດອນ ເຈົ້າຄອງນະຄອນຫຼວງວຽງຈັນກ່າວວ່າ: ການເປີດປະຕູ ແລະການຮ່ວມມືລະຫວ່າງນະຄອນຕ່າງໆ ມີຜົນດີຕໍ່ການບັນລຸສະຖຽນລະພາບ ແລະຄວາມຈະເລີນຮຸ່ງເຮືອງຮ່ວມກັນ. ຫວັງວ່າຈະລົງເລິກການແລກປ່ຽນກັບບັນດາຝ່າຍຕື່ມອີກເພື່ອຮ່ວມກັນຂຸດຄົ້ນກໍາລັງບົ່ມຊ້ອນດ້ານການພັດທະນາຂອງແຕ່ລະຝ່າຍ, ເພີ່ມທະວີການຮ່ວມມືໃນຂົງເຂດຕ່າງໆ, ສົ່ງເສີມການເຊື່ອມໂຍງເຊື່ອມຈອດກັນລະຫວ່າງອາຊຽນ-ຈີນ ແລະ ຊຸກຍູ້ການພັດທະນາເສດຖະກິດພາກພື້ນ.
ໃນງານຄັ້ງນີ້, ຜູ້ຕາງໜ້ານະຄອນຂອງບັນດາປະເທດໄດ້ຮ່ວມກັນຖະແຫຼງ “ຂໍ້ລິເລີ່ມໜານໜິງ” ໂດຍສະເໜີວ່າ: ລົງເລິກການໄປມາຫາສູ່ກັນແບບໄມຕີຈິດມິດຕະພາບລະຫວ່າງນະຄອນ, ລົງເລິກການຮ່ວມມືດ້ານເສດຖະກິດການຄ້າລະຫວ່າງນະຄອນ, ລົງເລິກການເຊື່ອມສານຈິດໃຈລະຫວ່າງປະຊາຊົນບັນດານະຄອນ. ນອກນີ້, ຍັງໄດ້ຈັດພິທີເຊັນສັນຍາຮ່ວມມື 14 ໂຄງການກ່ຽວກັບເສດຖະກິດການຄ້າ, ການຈໍລະຈອນສິນຄ້າ, ການສຶກສາ ແລະການທ່ອງທ່ຽວເປັນຕົ້ນ.
