ເພື່ອເປັນການສ້າງຜົນງານຂໍ່ານັບຮັບຕ້ອນ ແລະ ຊົມເຊີຍກອງປະຊຸມໃຫຍ່ອົງຄະນະພັກກະຊວງປ້ອງກັນປະເທດ ຄັ້ງທີ VI ແລະ ກອງປະຊຸມໃຫຍ່ອົງຄະນະພັກກົມໃຫຍ່ ເສນາທິການກອງທັບ ຄັ້ງທີ V, ເພື່ອສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 76 ປີ 20 ມັງກອນ 2025 ເວົ້າລວມ, ເວົ້າສະເພາະ ເພື່ອເປັນການຄັດເລືອກເອົານັກກິລາທີ່ດີເດັ່ນ, ມີພອນສະຫວັນເປັນຕົວແທນກິລາກະຊວງປ້ອງກັນປະເທດ ເຂົ້າຮ່ວມແຂ່ງຂັນງານມະຫະກຳກິລາແຫ່ງຊາດ ຄັ້ງທີ XII ທີ່ ນະຄອນຫຼວງວຽງຈັນ ເປັນເຈົ້າພາບ ທີ່ຈະມາເຖິງຢ່າງເປັນຂະບວນຟົດຟື້ນ, ກົມໃຫຍ່ເສນາທິການກອງທັບ ໄດ້ຈັດງານແຂ່ງຂັນກິລາ ການທະຫານ, ຍິງປືນທະຫານຮາບ ແລະ ກິລາມວນຊົນເຂດ 1 (ນະຄອນຫຼວງວຽງຈັນ) ຊີງຂັນທ່ານລັດຖະມົນຕີກະຊວງປ້ອງກັນປະເທດ ໃນວັນທີ 14 ມັງກອນນີ້, ໂດຍການເປັນປະທານຂອງສະຫາຍ ພົນຕີ ພັນແສງ ບຸນພັນ ຮອງຫົວໜ້າກົມໃຫຍ່ເສນາທິການກອງທັບ, ມີຄະນະພັກ-ຄະນະບັນຊາ,ຄະນະຮັບຜິດຊອບຈັດງານແຂ່ງຂັນ, ຄູຝຶກ ແລະ ນັກກິລາ ເຂົ້າຮ່ວມ.

ສະຫາຍ ພັນເອກ ພູເງິນ ພົມເມືອງ ຫົວໜ້າກົມອົບຮົມ ຄະນະຊີ້ນຳຈັດການແຂ່ງຂັນກິລາທົ່ວກອງທັບເຂດ 1 ນະຄອນຫຼວງວຽງຈັນໄດ້ຜ່ານບົດລາຍງານຈັດງານແຂ່ງຂັນກິລາ ການທະຫານ, ຍິງປືນທະຫານຮາບ ແລະ ກິລາມວນຊົນເຂດ 1 (ນະຄອນຫຼວງວຽງຈັນ) ຊຶ່ງກິລາທີ່ນຳມາແຂ່ງຂັນໃນຄັ້ງນີ້ປະກອບມີ 10 ປະເພດກິລາ ແລະ 17 ລາຍການ ໃນນັ້ນມີ ລວມໝູ່ 7 ລາຍການ ແລະ ບຸກຄົນ 7 ລາຍການ: ເຕະບານຊາຍ12ຄະນະ, ບານສົ່ງຊາຍ 14 ຄະນະ, ບານສົ່ງຍິງ 6 ຄະນະ, ກະຕໍ້ຫວາຍທີມດ່ຽວຊາຍ 14 ຄະນະ, ເປຕັງປະສົມ 26 ຄະນະ, ກິລານັກຮົບແຂງແຮງ 6 ຄະນະ, ກິລາແລ່ນ, ມ້າງປະກອບອາວຸດ 12 ຄະນະ, ຜ່ານສິ່ງກີດຂວາງ 4×50 ແມັດ 6 ຄະນະ, 3 ວິຊາການທະຫານສົມທົບ 6 ຄະນະ, ຍິງປືນທະຫານຮາບ (ປືນAK ມີ 7 ກົມກອງ, ປືນ K59 ປະເພດຊາຍ ມີ 3 ກົມກອງ ແລະ ປືນK59 ປະເພດຍິງ ມີ 2 ກົມກອງ, ມີນັກກິລາທັງໝົດ 814 ສະຫາຍຍິງ 156 ສະຫາຍ ທີ່ຕາງໜ້າຈາກ 28 ຫົວໜ່ວຍກົມກອງຄື: ຫ້ອງວ່າການກະຊວງປ້ອງກັນປະເທດ, ກົມໃຫຍ່ການເມືອງກອງທັບ, ກົມໃຫຍ່ເສນາທິການກອງທັບ, ກົມໃຫຍ່ພະລາທິການກອງທັບ, ກົມໃຫຍ່ເຕັກນິກກອງທັບ, ວິທະຍາຄານປ້ອງກັນຊາດ ໄກສອນ ພົມວິຫານ, ໂຮງໝໍສູນກາງ 103 ກອງທັບ, ວິທະຍາຄານກົມມະດໍາ, ວິທະຍາຄານເຕັກນິກການທະຫານ, ວິທະຍາຄານການແພດກອງທັບ, ກອງບັນຊາການທະຫານນະຄອນຫຼວງວຽງຈັນ, ກອງພັນໃຫຍ່ທະຫານຮາບຍານເກາະທີ 11, ກອງພັນໃຫຍ່ 279, ກອງພັນໃຫຍ່ 941, ກອງບັນຊາການທະຫານອາກາດ, ເຫຼົ່າຮົບຕີພິເສດ (ກົມ 49), ເຫຼົ່າຮົບກົດລັບ, ເຫຼົ່າຮົບຊ່າງແສງ, ເຫຼົ່າຮົບລົດຕັ້ງ-ຍານເກາະ (ຈໍ 661), ສະຖາບັນກັນພະຍາດກອງທັບ, ໂຮງຮຽນວັດທະນະທຳຊົນເຜົ່າກອງທັບ, ເຫຼົ່າຮົບປືນໃຫຍ່ໜ້າດິນ (ຈໍ 606), ກົມວິທະຍາສາດ-ປະຫວັດສາດກອງທັບ, ກົມ 213, ກອງບັນຊາການທະຫານຊາຍແດນ, ໂຮງຮຽນທິດສະດີການເມືອງກອງທັບ, ປ້ອງກັນອາກາດ 641 ແລະ ເຫຼົ່າຮົບເຄມີສາດ. ການແຂ່ງຂັນຈະດໍາເນີນເປັນເວລາ 12 ວັນຈຶ່ງຈະສຳເລັດ. ຈາກນັ້ນກໍໄດ້ຊົມກາແຂ່ງຂັນກິລາເຕະບານຊາຍລະຫວ່າງທີມ ກົມໃຫຍ່ເສນາ ກັບ ກົມ 49 ຕື່ມອີກ.

(ຂ່າວ-ພາບ:ເຄນໄຊ)