ກອງປະຊຸມໃຫຍ່ ຜູ້ແທນອົງຄະນະພັກ ເມືອງວຽງຄຳ ແຂວງຫຼວງພະບາງ ຄັ້ງທີ XIII ໄດ້ໄຂຂຶ້ນຢ່າງເປັນທາງການ ໃນວັນທີ່ 20 ມັງກອນນີ້ ທີ່ສະໂມສອນໃຫຍ່ຂອງເມືອງ, ມີສະຫາຍ ຄຳຂັນ ຈັນທະວີສຸກ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງຫຼວງພະບາງ, ພ້ອມດ້ວຍ ແຂກທີ່ຖືກເຊີນ ແລະ ຜູ້ແທນສົມບູນ ທັງໝົດ 134 ສະຫາຍ ຍິງ 8 ສະຫາຍ ທີ່ເປັນຕົວແທນໃຫ້ສະມາຊິກພັກ ຈຳນວນ 1,934 ສະຫາຍ ໃນທົ່ວເມືອງ.

ສະຫາຍ ທະລາກອນ ບໍລະວົງ ຮັກສາການເລຂາຄະນະບໍລິຫານພັກເມືອງ ເຈົ້າເມືອງວຽງຄຳ ໄດ້ກ່າວໄຂກອງປະຊຸມວ່າ: ກອງປະຊຸມຄັ້ງນີ້ ໄດ້ຍົກໃຫ້ເຫັນຜົນງານ ແລະ ໄຊຊະນະໃນການຈັດຕັ້ງປະຕິບັດ ມະຕິກອງປະຊຸມໃຫ່ຍຂອງພັກ ຄັ້ງທີ XI, ມະຕິກອງປະຊຸມໃຫຍ່ອົງຄະນະພັກແຂວງ ຄັ້ງທີ VIII ກໍຄືມະຕິກອງປະຊຸມໃຫຍ່ ອົງຄະນະພັກເມືອງ ຄັ້ງທີ XII ທີ່ອົງຄະນະພັກເມືອງຍາດມາໄດ້ ພ້ອມນັ້ນ ຜູ້ແທນກອງປະຊຸມ ຈະໄດ້ປະກອບຄວາມເຫັນ ແລະ ພິຈາລະນາຮັບຮອງເອົາຮ່າງລາຍງານການເມືອງ, ຮ່າງແຜນພັດທະນາເສດຖະກິດ-ສັງຄົມ ພ້ອມທັງດໍາເນີນການປ່ອນບັດເລືອກຕັ້ງເອົາຄະນະບໍລິຫານງານພັກເມືອງຊຸດໃໝ່ ເພື່ອສືບຕໍ່ຈັດຕັ້ງປະຕິບັດ ບັນດາຄາດໝາຍສູ້ຊົນທີ່ວາງໄວ້ໃຫ້ສຳເລັດຜົນ ແລະ ຈະໄດ້ຄັດເລືອກເອົາຜູ້ແທນສົມບູນ ຕາງໜ້າອົງຄະນະພັກເມືອງວຽງຄຳ ໄປຮ່ວມກອງປະຊຸມໃຫ່ຍ ຜູ້ແທນອົງຄະນະພັກແຂວງຫຼວງພະບາງ ຄັ້ງທີ IX. ສະຫາຍກ່າວຕື່ມວ່າ: ກອງປະຊຸມໃຫຍ່ຄັ້ງນີ້, ມີຄວາມໝາຍ ຄວາມສຳຄັນທີ່ສຸດ ທັງມີບົດບາດຕັດສິນອານາຄົດ ກໍຄືທິດທາງກ້າວເດີນ ຂອງເມືອງວຽງຄຳໃນຕໍ່ໜ້າ. ຈິ່ງເປັນໜ້າທີ່ ແລະ ຄວາມຮັບຜິດຊອບຂອງຜູ້ແທນກອງປະຊຸມທຸກສະຫາຍ, ພ້ອມນັ້ນ ສະຫາຍໄດ້ຮຽກຮ້ອງໃຫ້ ບັນດາສະຫາຍຜູ້ແທນກອງປະຊຸມ ຈົ່ງເປັນເຈົ້າການເຊີດຊູຄວາມຮັບຜິດຊອບສູງ ເພື່ອເຮັດໃຫ້ກອງປະຊຸມ ດຳເນີນໄປດ້ວຍເນື້ອໃນອັນເລີກເຊິ່ງ ແລະ ມີຜົນສຳເລັດອັນຈົບງາມ.

ກອງປະຊຸມ ຄັ້ງທີ XIII ນີ້, ໄດ້ດໍາເນີນຂຶ້ນພາຍໃຕ້ຄໍາຂວັນທີ່ວ່າ: “ຍົກສູງຄວາມສາມາດການນໍາພາ ຂອງອົງຄະນະພັກເມືອງ, ສ້າງການຫັນປ່ຽນດ້ານການພັດທະນາເສດຖະກິດ-ສັງຄົມ ໄປສູ່ຄູນນະພາບ ໃໝ່ຢ່າງແຂງແຮງ, ສືບຕໍ່ນໍາພາເມືອງວຽງຄໍາ ຫຼຸດພົ້ນອອກຈາກຄວາມທຸກຍາກ” ເຊີ່ງຜູ້ເຂົ້າຮ່ວມກອງປະຊຸມ ຈະໄດ້ຮັບຟັງການຜ່ານຮ່າງລາຍງານການເມືອງທັງສອງພາກ, ແຜນພັດທະນາເສດຖະກິດ-ສັງຄົມ, ຮັບຟັງການປະກອບຄຳເຫັນຈາກຕົວແບບຕ່າງໆ.

(ແຫຼ່ງຂ່າວ: ແຂວງຫຼວງພະບາງ)