ອົງຄະນະພັກມະຫາວິທະຍາໄລແຫ່ງຊາດ (ມຊ) ໄດ້ຈັດພິທີປາຖະກະຖາຫວນຄືນມູນເຊື້ອວັນສ້າງຕັ້ງກອງ ທັບປະຊາຊົນລາວ ຄົບຮອບ 76 ປີຂຶ້ນຫວ່າງບໍ່ດົນມານີ້ ທີ່ ມຊ ໂດຍການໃຫ້ກຽດປາຖະກະຖາຂອງທ່ານ ພົນຈັດຕະວາ ຄຳຫອມ ແສງບົວລາ ຮອງປະທານສະຫະພັນນັກຮົບເກົ່າແຫ່ງຊາດລາວ ໂດຍການເຂົ້າຮ່ວມຂອງທ່ານ ເດຊານຸລາດ ແສນດວງເດດ ວ່າການອະທິການບໍດີ ມຊ, ມີຄະນະບໍລິຫານງານພັກ, ຄະນະພັກຮາກຖານ, ສາມອົງການຈັດຕັ້ງມະຫາຊົນ ແລະ ສະມາຊິກພັກເຂົ້າຮ່ວມ.

ທ່ານ ພົນຈັດຕະວາ ຄຳຫອມ ແສງບົວລາ ໄດ້ຍົກໃຫ້ເຫັນມູນເຊື້ອປະຫວັດການກຳເນີດຂອງກອງທັບປະຊາຊົນລາວ, ຜົນງານໄຊຊະນະ, ການເຕີບໃຫຍ່ຂະຫຍາຍຕົວຂອງກອງທັບປະຊາຊົນລາວແຕ່ລະໄລຍະ, ທາດແທ້ ແລະ ມູນເຊື້ອອັນສະຫງ່າອົງອາດຂອງກອງທັບປະຊາຊົນລາວ. ການປາຖະກະຖາຄັ້ງນີ້ເພື່ອໃຫ້ພະນັກງານສະມາຊິກພັກທົ່ວ ມຊ ໄດ້ຮັບຮູ້ເຂົ້າໃຈເນື້ອໃນຢ່າງເລິກເຊິ່ງ ພ້ອມທັງນໍາເອົາເນື້ອໃນຈິດໃຈດັ່ງກ່າວໄປໝູນໃຊ້ເຂົ້າໃນວຽກງານຕົວຈິງໃຫ້ປະກົດຜົນເປັນຈິງ.

ຂ່າວ: ພູວັນ, ພາບ: ມຊ