ປັດຈຸບັນທົ່ວແຂວງເຊກອງມີຕາຂ່າຍໄຟຟ້າ 22 Kvມີຄວາມຍາວທັງໝົດ 1,021.28 Km/ວົງຈອນ, ຕາຂ່າຍໄຟຟ້າ 0,4 Kvມີຄວາມຍາວ 432.81 Km/ວົງຈອນ, ຕາຂ່າຍໄຟຟ້າ 0,23 Kvມີຄວາມຍາວ 1.65 Km/ວົງຈອນ, ໝໍ້ແປງ 678 ໜ່ວຍ ກໍາລັງຕິດຕັ້ງ 98.16 KVA ແລະ ມີບ້ານ ທີ່ໄດ້ຊົມໃຊ້ໄຟ້ຟ້າໃນລະບົບ 164 ບ້ານ,18,633ຫຼັງຄາເຮືອນ ກວມເອົາ 83%ຂອງຈໍານວນຫຼັງຄາເຮືອນທົ່ວແຂວງ.

ທ່ານ ລໍາພັນ ແກ້ວມະຫາໄຊ ຮອງຫົວໜ້າພະແນກພະລັງງານ ແລະ ບໍ່ແຮ່ແຂວງ ໃຫ້ຮູ້ເມື່ອບໍ່ດົນນີ້ວ່າ: ແຂວງເຊກອງ ມີແຫຼ່ງຜະລິດພະລັງງານໄຟຟ້າ ທີ່ດຳເນີນການຜະລິດແລ້ວທັງໝົດ 3 ແຫ່ງ ແລະ ມີກໍາລັງຕິດຕັ້ງທັງໝົດ 353 MW. ໃນປີ 2024 ຜ່ານມາ, ສາມາດຜະລິດກະແສໄຟຟ້າໄດ້ທັງໝົດ 1,417,118,335 KWh. ໃນນີ້, ເຂື່ອນໄຟຟ້າຫ້ວຍລໍາພັນໃຫຍ່ ມີກໍາລັງຕິດຕັ້ງ 88 MW ຜະລິດພະລັງງານໄຟຟ້າໄດ້ 379,120,000 KWh, ເຂື່ອນໄຟຟ້າຫ້ວຍລໍາພັນຕອນລຸ່ມ ມີກໍາລັງຕິດຕັ້ງ 15 MW ຜະລິດພະລັງງານໄຟຟ້າໄດ້ 45,560,649 KWh ແລະ ເຂື່ອນໄຟຟ້າເຊຂະໜານ 3 ມີກໍາລັງຕິດຕັ້ງ 250 MW ຜະລິດພະລັງງານໄຟຟ້າໄດ້ 992,437,686 KWh ຊຶ່ງພະລັງງານທີ່ຜະລິດໄດ້ ສ່ວນໃຫຍ່ແມ່ນສົ່ງອອກໃຫ້ຕ່າງປະເທດ. ພ້ອມກັນນີ້, ຍັງມີອີກ 3 ແຫ່ງ ທີ່ຄາດວ່າຈະດໍາເນີນການຜະລິດໄຟຟ້າໃນປີ 2025 ຄື: ເຂື່ອນໄຟຟ້ານໍ້າອີມູນ, ເຂື່ອນໄຟຟ້າຫ້ວຍລະແງ ແລະ ໄຟຟ້າພະລັງງານລົມ.

ສໍາແຜນໃນປີ 2025ສູ້ຊົນເຮັດໃຫ້ເກີດແຫຼ່ງຜະລິດພະລັງງານໄຟຟ້າທຸກຮູບແບບ (ພະລັງງານລົມ, ແສງອາທິດ, ພະລັງງານນໍ້າ ແລະ ຄວາມຮ້ອນຖ່ານຫີນ), ສູ້ຊົນຂະຫາຍຕາຂ່າຍໄຟຟ້າ ໂດຍສະເພາະຕາຂ່າຍ 22 KV ແລະ 0,4 KV ເພື່ອໃຫ້ຈໍານວນບ້ານ ແລະ ຫຼັງຄາເຮືອນ ຂອງປະຊາຊົນທີ່ໄດ້ຊົມໃຊ້ໄຟຟ້າໃນລະບົບໃຫ້ນັບມື້ເພີ່ມຂຶ້ນ ຕາມແຜນການທີ່ວາງໄວ້.

(ຂ່າວ-ພາບ: ສັນຍາ)