ໃນວັນທີ 26 ມັງກອນຜ່ານມານີ້, ທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ, ພ້ອມດ້ວຍຄະນະນໍາຂອງແຂວງຊຶ່ງນໍາພາທາງໂດຍທ່ານ ວາລິຍະ ສີຈັນທອງທິບ ເຈົ້າເມືອງວິລະບູລີ, ມີນັກທຸລະກິດພາຍໃນເມືອງ ແລະ ປະຊາຊົນບ້ານຕໍ່ເຮືອເຂົ້າຮ່ວມ.

ທ່ານ ເຈົ້າແຂວງສະຫວັນນະເຂດ ໄດ້ມີຄໍາເຫັນວ່າ: ຈຸດປະສົງໃນການມາຢ້ຽມຍາມໃນຄັ້ງນີ້, ກໍເພື່ອຢ້ຽມຢາມເບິ່ງຖໍ້າຜາຫຼວງ,ຊຶ່ງຖໍ້າດັ່ງກ່າວຕັ້ງຢູ່ບ້ານຕໍ່ເຮືອ ເມືອງວິລະບູລີ ແຂວງສະຫວັນນະເຂດ, ເຊິ່ງຖ້ຳແຫ່ງນີ້ເປັນຖໍ້າປະຫວັດສາດ ແລະ ເປັນສະຖານທີ່ຈັດກອງປະຊຸມໃຫຍ່ຄັ້ງທີ I ຂອງອົງຄະນະພັກແຂວງສະຫວັນນະເຂດ.

ດັ່ງນັ້ນ, ເພື່ອຫວນຄືນເຖິງມູນເຊື້ອ, ເຖິງຄວາມພິລາດອາດຫານຂອງພັກປະຊາຊົນ ປະຕິວັດລາວ ກໍຄືຄະນະພັກຄະນະນໍາແຂວງສະຫວັນນະເຂດຄັ້ງທີ I, ຈຶ່ງໄດ້ນໍາເອົາຄະນະທີມງານຂອງແຂວງ ແລະ ເມືອງລົງມາເບິ່ງຖໍ້າປະຫວັດສາດແຫ່ງນີ້, ເພື່ອໃຫ້ເຫັນໄດ້ເຖິງຄວາມເປັນປະຫວັດສາດທີ່ຜູ້ນໍາເຮົາມີຄວາມພິລາດອາດຫານນໍາໃຊ້ຖໍ້າແຫ່ງນີ້ເພື່ອເຄື່ອນໄຫວຕໍ່ສູ້ກູ້ຊາດ, ຕ້ານຈັກກະພັດອາເມລິກາຈົນສາມາດປົດປ່ອຍແຂວງສະຫວັນນະເຂດ, ປົດປ່ອຍທົ່ວປະເທດໄດ້.

ທ່ານເຈົ້າແຂວງຍັງໄດ້ສະແດງຄວາມພາກພູມໃຈຕໍ່ການຢ້ຽມຢາມສະຖານທີ່ແຫ່ງນີ້, ຊຶ່ງເປັນສະຖານທີ່ ທີ່ມີຄວາມໝາຍຄວາມສໍາຄັນທາງປະຫວັດສາດຂອງແຂວງໃນຕໍ່ໜ້າ, ຈະສ້າງໃຫ້ເປັນແຫຼ່ງທ່ອງທ່ຽວທາງດ້ານປະຫວັດສາດ, ເພື່ອໃຫ້ປະຊາຊົນລາວ ກໍຄືຊາວແຂວງສະຫວັນນະເຂດຮຸ່ນໜຸ່ມກໍຄືຮຸ່ນຕໍ່ໆ ໄປໃຫ້ສາມາດເຂົ້າມາຮຽນຮູ້ເຖິງມູນເຊື້ອປະຫວັດສາດການເຕີບໃຫຍ່ຂະຫຍາຍຕົວຂອງພັກປະຊາຊົນ ປະຕິວັດລາວ ຕັ້ງແຕ່ກອງປະຊຸມໃຫຍ່ ຄັ້ງທີ I ອົງຄະນະພັກແຂວງຈົນຮອດປັດຈຸບັນກໍຄືວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 70 ປີຈະໝູນວຽນມາໃນມາບັນຈົບຄົບຮອບໃນມໍ່ໆນີ້.

ທ່ານ ບຸນຍົງ ໄຊປັນຍາ ອະດີດຫົວໜ້າພະແນກຖະແຫຼ່ງຂ່າວ, ວັດທະນະທໍາ ແລະ ທ່ອງທ່ຽວ ແຂວງເຊິ່ງກໍແມ່ນຜູ້ໜຶ່ງທີ່ມີພື້ນຖານການປະຕິວັດໃນເຂດບ້ານຕໍ່ເຮືອ ໄດ້ໃຫ້ຮູ້ວ່າ: ຖໍ້າຜາຫຼວງແຫ່ງນີ້ໃນປີ 1970 ແມ່ນໄດ້ຈັດກອງປະຊຸມໃຫຍ່ ຄັ້ງທີ I ຂອງອົງຄະນະພັກແຂວງສະຫວັນນະເຂດ, ໃນເວລານັ້ນແມ່ນຖືກສົງຄາມທໍາລາຍພ້ອມຈັກກະພັດຕ່າງດ້າວ (ຈັກກະພັດອາເມລິກາ). ສະນັ້ນພັກ-ລັດຈຶ່ງຕົກລົງກັນດໍາເນີນກອງປະຊຸມໃຫຍ່ຄັ້ງທໍາອິດຂອງອົງຄະນະພັກແຂວງສະຫວັນນະເຂດ, ຊຶ່ງກອງປະຊຸມໃຫຍ່ໄດ້ພ້ອມກັນເລືອກຕັ້ງເອົາທ່ານ ສີເມີຍ ນາມລາຊາ ເປັນເລຂາຄະນະພັກແຂວງສະຫວັນນະເຂດ.

ສະຖານທີ່ແຫ່ງນີ້, ເປັນທັງສາງເກືອ, ສາງເຂົ້າ ແລະ ເປັນບ່ອນແຕ່ງກິນຮັບໃຊ້ກອງປະຊຸມໃຫຍ່ອົງຄະນະພັກແຂວງ, ເມື່ອວັນເວລາຜ່ານໄປກໍມີພຽງຊື່ສຽງ ແລະ ການມາຢ້ຽມຢາມໃນຄັ້ງນີ້ກໍເພື່ອມາຢ້ຽມຢາມເບິ່ງສະຖານທີ່ແຫ່ງນີ້ ກໍຖືວ່າຍັງຄົງຄຸນຄ່າທາງທໍາມະຊາດທີ່ສວຍສົດງົດງາມ.

ໃນໂອກາດນີ້, ທ່ານເຈົ້າແຂວງໄດ້ພົບປະປຊາຊົນບ້ານຕໍເຮືອ ແລະ ເນັ້ນໜັກໃຫ້ພໍ່ແມ່ປະຊາຊົນຫ້າມຕັດໄມ້ທຳລາຍປ່າ ແລະ ສົ່ງເສີມໃຫ້ລູກຫຼານຂອງຕົນໄດ້ເຂົ້າໂຮງຮຽນ, ພ້ອມນີ້ກໍໄດ້ເປີດໂອກາດໃຫ້ພໍ່-ແມ່ ປະຊາຊົນໄດ້ສະເໜີເຖິງຄວາມຕ້ອງການ ແລະ ສິ່ທີ່ງປະຊາຊົນມີຄວາມຕ້ອງການ ແມ່ນສັນຍານອິນເຕີເນັດ, ນໍ້າດື່ມສະອາດໃຫ້ເຂົ້າເຖິງພາຍໃນບ້ານ.ຈາກນັ້ນ,​ ເຈົ້າແຂວງກໍໄດ້ມອບເຄື່ອງອຸປະໂພກ-ບໍລິໂພກ ແລະ ເງິນສົດຈຳນວນໜຶ່ງໃຫ້ກັບປະຊາຊົນ ບ້ານຕໍເຮືອນ. ຈາກນັ້ນ,ທ່ານເຈົ້າແຂວງພ້ອມຄະນະ ກໍໄດ້ໄປຢ້ຽມຢາມຖ້ຳຜາໂລຍ ບ້ານດົງບັງ ເມືອງວິລະບູລີ (ຖໍ້າສາງຢາຜາໂລຍ) ພ້ອມທັງມອບເຄື່ອງອຸປະໂພກ-ບໍລິໂພກ ແລະ ເງິນສົດຈຳນວນ ໜຶ່ງໃຫ້ກັບປະຊາຊົນບ້ານດົງບັງອີກດ້ວຍ.

(ແຫຼ່ງຂ່າວ: ແຂວງສະຫວັນນະເຂດ)