ໂດຍ: ບຸນອູ້ມ
ທ່ານພັນໂທບຸນຍົງໄຊປັນຍາ ຮອງຫົວໜ້າພະແນກຕໍາຫຼວດສະກັດກັ້ນ ແລະຕ້ານອັກຄີໄພນະຄອນຫຼວວຽງຈັນ, ຫ້ອງຕໍາຫຼວດປກສນະຄອນຫຼວງໄດ້ໃຫ້ສຳພາດຕໍ່ນັກຂ່າວໜັງສືພິມປະຊາຊົນຫວ່າງບໍ່ດົນມານີ້ ກ່ຽວກັບວຽກງານສະພາບການເກີດອັກຄີໄພໃນນະຄອນຫຼວງວຽງຈັນໃນປີ 2024 ວ່າ: ໃນໄລຍະຜ່ານມາມີອັກຄີໄພເກີດຂຶ້ນທັງໝົດ 40 ຄັ້ງ, ແຕ່ບໍ່ຮ້າຍແຮງພຽງແຕ່ຂະໜາດກາງຫາ ຂະໜາດນ້ອຍ ແຕ່ທຽບໃສ່ຕ່າງແຂວງແມ່ນນະຄອນຫຼວງເກີດຫຼາຍກວ່າໝູ່, ສາເຫດທີ່ພາໃຫ້ເກີດອັກຄີໄພໃນນະຄອນຫຼວງວຽງຈັນມີ 7 ສາເຫດ, ແຕ່ສາເຫດຫຼັກມີ 4 ສາເຫດແມ່ນຫຼາຍກວ່າໝູ່, ໜຶ່ງ ເກີດຈາກສາເຫດໄຟຟ້າລັດວົງຈອນຍ້ອນປະຊາຊົນໃຊ້ໄຟຟ້າເກີນຂະໝາດ, ສອງໄຟຟ້າຊອດຍ້ອນສາຍໄຟບໍ່ໄດ້ມາດຕະຖານແລະສາຍເກົ່າບໍ່ໄດ້ມາດຕະຖານ, ສາມ ຍ້ອນອຸປະກອນໄຟຟ້າເວລາໃຊ້ແລ້ວບໍ່ປິດຫຼັງຈາກໃຊ້ງານຫຼື ບໍ່ກວດກາອອກຈາກເຮືອນແລະສີ່ຍ້ອນການເຊື່ອມ, ການຈອດເຮັດໂຄງຫຼັງຄາ ແລະສາເຫດອື່ນໆບໍ່ມີການມ້ຽນມັດສິ່ງທີ່ພາໃຫ້ເກີດເຊື້ອເພີງຢູ່ທາງລຸ່ມເຮັດໃຫ້ຂີ້ທູບຕົກລົງໃສ່ເຮັດໃຫ້ເກີດເຊື້ອໄຟ, ນອກຈາກນີ້ແມ່ນເກີດຍ້ອນການຈູດປ່າ, ຈູດຂີ້ເຫຍື້ອ, ໃຕ້ທູບທຽນບູຊາແລະເກີດຍ້ອນເຄື່ອງຈັກ, ເກີດຍ້ອນສັດເຊັ່ນ: ນົກ, ໜູທີ່ເຮັດຮັງໃສ່ເສົາໄຟຟ້າ, ເຮືອນ, ວັດວາອາຮາມແລະສະຖານທີ່ຕ່າງໆເຮັດໃຫ້ເກີດອັກຄີໄພໄດ້, ດັ່ງນັ້ນ. ສະເພາະຜົນເສຍຫາຍຍ້ອນອັກຄີໄພ (ໄຟໄໝ້) ໃນປີ 2024 ສາມາດສະຫຼຸບຄວາມເສຍຫາຍແມ່ນ 5 ຕື້ກວ່າກີບ, ຖ້າທຽບໃສ່ປີ 2023 ແມ່ນຫຼຸດລົງ, ເພາະວ່າປີ 2023 ຜົນເສຍຫາຍແມ່ນ 30 ຕື້ກວ່າກີບສະເພາະພາຍໃນນະຄອນຫຼວງວຽງຈັນ.
ທ່ານພັນໂທບຸນຍົງໄຊປັນຍາໄດ້ກ່າວຕື່ມວ່າ: ສຳລັບການປະຕິບັດໜ້າທີ່ມອດໄຟແຕ່ລະຄັ້ງມີ ຂໍ້ສະດວກຄື: ເວລາໄປມອດໄຟປະຊາຊົນກໍໃຫ້ການຮ່ວມມືເຊັ່ນ: ຫຼີກທາງໃຫ້, ເສັ່ນທາງເຂົ້າໄປຫາຈຸດມອດກໍມີຄວາມສະດວກກວ້າງຂວາງແລະການປະສານສົມທົບກັບເຈົ້າໜ້າທີ່ໆມາຊ່ວຍພວກເຮົາກໍອຳນວຍຄວາມສະດວກການອອກມອດໄຟແຕ່ລະຄັ້ງ, ແຕ່ປາສະຈາກບໍ່ໄດ້ກໍຍັງມີຂໍ້ຫຍຸ້ງຍາກຄື: ເສັ່ນທາງທີ່ເຂົ້າໄປຫາຈຸດມອດໄຟກໍຄັບແຄບເຮັດໃຫ້ໄກຈາກຈຸດເກີດເຫດເຮັດໃຫ້ການຕໍ່ສາຍນ້ຳເຂົ້າໄປຫາຈຸດດັ່ງກ່າວແມ່ນໃຊ້ເວລາການຕໍ່ທໍ່ນ້ຳຕ້ອງໃຊ້ 4-5 ເສັ້ນ ແລະເສັ່ນທາງໄປຫາຈຸດດັ່ງກ່າວກໍມີລົດຫຼາຍດັ່ງນັ້ນເຮັດໃຫ້ມີຫາງສຽງວ່າ: ລົດດັບເພີງໄປຊ້າ ແລະອີກບັນຫາໜຶ່ງແມ່ນຍ້ອນການໂທລະສັບຫາດັບເພີງພວກເຮົາແມ່ນແຈ້ງຂໍ້ມູນບໍ່ຊັດເຈນເຊັ່ນ: ຖາມວ່າຢູ່ບ້ານໃດ, ຮ່ອມໃດແລະຈຸດໃດເພື່ອເຮັດແນວໃດໃຫ້ເຂົ້າຫາຈຸດມອດໄຟໃຫ້ໄດ້ໄວທີ່ສຸດ.
ສຳລັບການກະກຽມຄວາມພ້ອມຂອງພະແນກສະກັດກັ້ນ ແລະຕ້ານອັກຄີໄພນະຄອນຫຼວວຽງຈັນ, ເພື່ອກະກຽມໃນໄລຍະທີ່ມີການສະເຫຼີມສະຫຼອງບຸນປີໃໝ່ ຂອງພີ່ນ້ອງຊາວຫວຽດນາມແລະຊາວຈີນທີ່ອາໃສຢູ່ ສປປລາວເຮົາ, ພະແນກສະກັດກັ້ນ ແລະຕ້ານອັກຄີໄພນະຄອນຫຼວງວຽງຈັນກໍໄດ້ເພີ່ມທະວີຂຶ້ນເພາະໃນແຕ່ລະປີມັກເກີດຂຶ້ນຍ້ອນວ່າພີ່ນ້ອງຊາວຫວຽດນາມແລະຊາວຈີນໃນການຫຼິ້ນບຸນປີໃໝ່ມີການຈູດທູບ, ທຽນແລະຈູດໝາກໂພກຕ່າງໆແຕ່ລະປີທາງພະແນກພວກເຮົາກໍໄດ້ມີການຫ້າມແຕ່ກໍມີກໍລະນີເກີດອັກຄີໄພ, ເພາະສະນັ້ນປີ 2025ນີ້ທາງພະແນກພວກເຮົາໄດ້ແບ່ງຄວາມຮັບຜິດຊອບອອກເປັນສອງຈຸດຄື:ຈຸທີໜຶ່ງປະຈຳຢູ່ພະແນກສະກັດກັ້ນ ແລະຕ້ານອັກຄີໄພ, ຈຸທີສອງແມ່ນປະຈຳຢູ່ກອງພັນເຄື່ອນທີ່ເດີນທາດຫຼວງ ເພື່ອກຽມພ້ອມຮັບມືກັບເຫດການບໍ່ຄາດຄິດທີ່ອາດຈະເກີດຂຶ້ນໃນການສະຫຼອງບຸນປີໃໝ່ຂອງພີ່ນ້ອງຊາວຫວຽດນາມແລະຊາວຈີນ, ດັ່ງນັ້ນທາງພະແນກສະກັດກັ້ນ ແລະຕ້ານອັກຄີໄພນະຄອນຫຼວງວຽງຈັນພວກເຮົາແມ່ນມີຄວາມກຽມພ້ອມ 100%.ດັ່ງນັ້ນ,ເພື່ອຫຼີກລ່ຽງບໍ່ໃຫ້ເກີດອັກຄີໄພຈຶ່ງຢາກຮຽກຮ້ອງໃຫ້ປະຊາຊົນຊາວລາວ, ພີ່ນ້ອງຊາວຫວຽດນາມແລະຊາວຈີນທີ່ອາໃສຢູ່ນະຄອນຫຼວງວຽງຈັນໃຫ້ເອົາໃຈໃສ່ຕື່ມກ່ຽວກັບການປ້ອງກັນບໍ່ໃຫ້ເກີດອັກຄີໄພ ໃນໄລຍະສະຫຼອງບຸນປີໃໝ່ຂອງພີ່ນ້ອງຊາວຫວຽດນາມແລະຊາວຈີນບໍ່ໃຫ້ຈູດໝາກກະໂພກ, ບັ້ງພຸແລະຈູດເງິນ ອັນທີ່ເປັນເຊື້ອໄຟທີ່ຈະເຮັດໃຫ້ເກີດໄຟໄໝ, ອີກບັນຫາໜຶ່ງແມ່ນການຊົມໃຊ້ໄຟຟ້າແລະໃຊ້ເຄື່ອງໄຟຟ້າຕ້ອງມີສະຕິໃຊ້ແລ້ວໃຫ້ປິດ.
