ເນື່ອງໃນໂອກາດ ສະເຫຼີມສະຫຼອງບຸນປີໃໝ່ (ເຕັດ) ສສ ຫວຽດນາມ ປະຈຳ ປີ 2025, ໃນວັນທີ 28 ມັງກອນນີ້ທ່ານ ວັນໄຊ ຕະວິນຍານ ຮອງຫົວໜ້າຄະນະໂຄສະນາອົບຮົມສູນກາງພັກຫົວໜ້າບັນນາທິການໃຫຍ່ ໜັງສືພິມປະຊາຊົນ ພ້ອມຄະນະ ໄດ້ເຂົ້າ ອວຍພອນ ໜັງສືພິມ ເຍິນເຢີນ ສສ ຫວຽດນາມ ປະຈຳລາວ.ໂດຍ ທ່ານ ຫງວຽນ ຫ້າຍ ຕຽນ ນັກຂ່າວປະຈຳສຳນັກງານຜູ້ຕາງໜ້າ ໜັງສືພິມ ເຍິນເຢິນ ສຽງຂອງສູນກາງພັກ,ລັດ ແລະ ປະຊາຊົນຫວຽດນາມ ແຫ່ງ ສສ ຫວຽດນາມ ປະຈຳ ສປປ ລາວ ໃຫ້ການຕ້ອນຮັບ.

ໃນໂອກາດດັ່ງກ່າວ, ທ່ານ ວັນໄຊ ຕະວິນຍານ ໄດ້ກ່າວອວຍພອນໃຫ້ ພະນັກງານໜັງສືພິມ ເຍິນເຢີນ ຫວຽດນາມ ປະຈຳລາວ ຈົ່ງມີສຸຂະພາບແຂງແຮງ,ມີຄວາມຜາສຸກໃນຊີວິດສ່ວນຕົວ,ຄອບຄົວ ແລະ ມີຜົນສຳເລັດໃນໜ້າທີ່ວຽກງານ ແລະ ອວຍພອນໃຫ້ສາຍພົວພັນທີ່ຍິ່ງໃຫຍ່,ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ລາວ-ຫວຽດນາມ ເວົ້າລວມ,ເວົ້າສະເພາະກໍຄືການຮ່ວມມື ລະຫວ່າງ ສອງໜັງສືພິມ ປະຊາຊົນ ແລະ ໜັງສືພິມ ເຍິນເຢິນ ຫວຽດນາມ ທີ່ມີມາແລ້ວນັ້ນ ໃຫ້ນັບມື້ແຕກດອກອອກຜົນຍິ່ງໆຂຶ້ນ.

(ຂ່າວ-ພາບ:ສຳນານ)