ກອງປະຊຸມໃຫຍ່ຜູ້ແທນອົງຄະນະພັກເມືອງອຸທຸມພອນ ແຂວງສະຫວັນນະເຂດ ຄັ້ງທີ IX ໄດ້ໄຂຂຶ້ນໃນລະຫວ່າງວັນທີ 27-28 ມັງກອນນີ້, ທີ່ສະໂມສອນເມືອງດັ່ງກ່າວ ຊຶ່ງໃຫ້ກຽດເປັນປະທານຂອງສະຫາຍ ບຸນໂຈມ ອຸບົນປະເສີດ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງສະຫວັນນະເຂດແລະ ພາຍໃຕ້ການເປັນປະທານຂອງສະຫາຍ ທອງໃສ ໄຊຍະວົງຄຳດີ ກຳມະການພັກແຂວງເລຂາພັກເມືອງເຈົ້າເມືອງອຸທຸມພອນ, ມີແຂກຖືກເຊີນ ແລະ ຜູ້ແທນສົມບູນຈຳນວນ 165 ສະຫາຍຍິງ 28 ສະຫາຍທີ່ເປັນຕົວແທນໃຫ້ສະມາຊິກພັກທົ່ວເມືອງຈຳນວນ 2,191 ສະຫາຍເຂົ້າຮ່ວມ.
ໃນພິທີ,ສະຫາຍ ເລຂາພັກເມືອງອຸທຸມພອນ ໄດ້ກ່າວໄຂກອງປະຊຸມວ່າ: ກອງປະຊຸມຄັ້ງນີ້ຈະໄດ້ພ້ອມກັນປະຕິບັດຫຼາຍໜ້າວຽກເປັນຕົ້ນ:ຮັບຟັງການຜ່ານບົດລາຍງານການເມືອງ,ແຜນພັດທະນາເສດຖະກິດ-ສັງຄົມ ແລະ ບົດສຳຫຼວດການນຳພາລວມຂອງອົງຄະນະພັກເມືອງ ຄັ້ງທີ VIII; ຈາກນັ້ນ, ບັນດາຜູ້ແທນກອງປະຊຸມໄດ້ພ້ອມກັນຄົ້ນຄວ້າປະກອບຄຳເຫັນໃສ່ບົດລາຍງານການເມືອງ ກໍຄືແຜນການພັດທະນາເສດຖະ ກິດ-ສັງຄົມ 5 ປີ. ໃນກອງປະຊຸມ, ສະຫາຍ ໂພໄຊ ອິນທະວົງສາ ຮອງເລຂາພັກເມືອງໄດ້ຜ່ານຮ່າງບົດລາຍງານການເມືອງຕໍ່ກອງປະຊຸມໃຫຍ່ເພື່ອຕີລາຄາຜົນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ VIII ນັບແຕ່ປີ 2019-2024ຊຶ່ງໃຫ້ຮູ້ວ່າ: ໃນໄລຍະ 5 ປີຜ່ານມາໄດ້ປະກອບສ່ວນຢ່າງຕັ້ງໜ້າເຮັດໃຫ້ເສດຖະກິດຂອງເມືອງຂະຫຍາຍຕົວສະເລ່ຍໃນລະດັບ 5,2% ລວມຍອດຜະລິດຕະພັນພາຍໃນ (GDP) ມີທັງໝົດ 10,072 ຕື້ກີບ, ສະເພາະໃນປີ 2024 ບັນລຸ 2,243 ຕື້ກີບເທົ່າກັບ 91.10%, ຂະຫຍາຍຕົວ 5.2%. ໃນນັ້ນ, ຂະແໜງກະສິກໍາ-ປ່າໄມ້ ແລະ ການປະມົງ 994,13 ຕື້ກີບກວມ 44.31%, ຂະຫຍາຍຕົວ 5.38%, ຂະແໜງອຸດສາຫະກໍາ 967.22 ຕື້ກີບກວມ 43.11%, ຂະຫຍາຍຕົວ 5.02% ແລະ ຂະແໜງການບໍລິການ 282.01 ຕື້ກີບກວມ 12.57%, ຂະຫຍາຍຕົວ 5.45%, ລາຍຮັບສະເລ່ຍຕໍ່ຫົວຄົນຕໍ່ປີບັນລຸໄດ້ 21.96 ລ້ານກີບຕໍ່ຄົນຕໍ່ປີ. ດ້ານກະສິກຳ: ທົ່ວເມືອງມີເນື້ອທີ່ປູກເຂົ້ານາປີ-ນາແຊງທັງໝົດ 17,605 ເຮັກຕາ/ປີ, ດ້ວຍສະມັດຕະພາບ 3,37 ໂຕນ/ເຮັກຕາ, ໄດ້ຮັບຜົນຜະລິດ 289,349 ໂຕນທຽບໃສ່ແຜນການ ປະຕິບັດໄດ້ 102.47%, ສະເລ່ຍເຂົ້າເປືອກ 582 ກິໂລ/ຄົນ/ປີ, ມີເຂົ້າເຫຼືອກິນແຮໄວ້ຂາຍເປັນສິນຄ້າ ຈໍານວນ 20,978 ໂຕນ/ປີ; ປູກພືດຊະນິດຕ່າງໆເປັນສິນຄ້າໃນເນື້ອທີ່ 8,800 ເຮັກຕາ, ໄດ້ຜົນຜະລິດຈໍານວນ 189,090 ໂຕນ, ທຽບໃສ່ແຜນການ ປະຕິບັດໄດ້ 108%.
ກອງປະຊຸມຍັງໄດ້ຮັບຟັງການໂອ້ລົມໃຫ້ທິດຊີ້ນຳຈາກສະຫາຍ ບຸນໂຈມ ອຸບົນປະເສີດ. ພ້ອມນີ້, ບັນດາສະຫາຍຜູ້ແທນສົມບູນ ຍັງຈະໄດ້ລົງຄະແນນສຽງປ່ອນບັດຄັດເລືອກເອົາຄະນະບໍລິຫານງານພັກເມືອງຊຸດໃໝ່ ແລະ ຄັດເລືອກຜູ້ແທນສົມ ບູນ-ສຳຮອງເຂົ້າຮ່ວມກອງປະຊຸມໃຫຍ່ອົງຄະນະພັກແຂວງຄັ້ງທີ X ທີ່ຈະໄຂຂຶ້ນໃນຕໍ່ໜ້ານີ້.
(ແຫຼ່ງຂ່າວ: ແຂວງສະຫວັນນະເຂດ)
