ຂ່າວຕ່າງປະເທດລາຍງານ ໃນວັນທີ 27 ມັງກອນ ຜ່ານມາວ່າ: ຜົນການສຳຫຼວດຈາກສະຖານີໂທລະພາບທ້ອງຖິ່ນຂອງຍີ່ປຸ່ນເປີດເຜີຍວ່າ: ບໍລິສັດຂະໜາດໃຫຍ່ຂອງຍີ່ປຸ່ນສ່ວນຫຼາຍຄາດຄະເນວ່າເສດຖະກິດຈະຂະຫຍາຍຕົວເທື່ອລະກ້າວໃນປີ 2025, ໂດຍມີປັດໄຈສ່ວນໃຫຍ່ຍ້ອນການຟື້ນຕົວຂອງການບໍລິໂພກສ່ວນບຸກຄົນ ຊຶ່ງເປັນຜົນຈາກການເພີ່ມຂຶ້ນຂອງຄ່າຈ້າງ.

ຜູ້ຕອບແບບສອບຖາມປະມານ 79% ຄາດວ່າເສດຖະກິດຈະຂະຫຍາຍຕົວເທື່ອລະກ້າວ, 18% ຄາດວ່າຈະຄົງຕົວແລະ 3% ຄາດວ່າຈະຫຼຸດລົງ. ໂດຍເຫດຜົນຕົ້ນຕໍສໍາລັບການຄາດຄະເນໃນທາງບວກແມ່ນການຟື້ນຕົວຂອງການບໍລິໂພກສ່ວນບຸກຄົນຫຼັງຈາກການເພີ່ມຂຶ້ນຂອງຄ່າຈ້າງ, ການລົງທຶນຂອງທຶນເພີ່ມຂຶ້ນ ແລະການບໍລິໂພກຈາກການທ່ອງທ່ຽວຂາເຂົ້າ.

ການສໍາຫຼວດດັ່ງກ່າວໄດ້ດໍາເນີນໃນລະຫວ່າງ ວັນທີ 13 ທັນວາ 2024 ຫາ 15 ມັງກອນ 2025, ໂດຍກໍານົດເປົ້າໝາຍ 100 ບໍລິສັດຊັ້ນນໍາພາຍໃນປະເທດ ຊຶ່ງໄດ້ຮັບການຕອບກັບຈາກ 95 ບໍລິສັດ.

ທັງນີ້, ມີການຄາດຄະເນວ່າການເຈລະຈາກັບສະຫະພາບແຮງງານໃນລະດູໃບໄມ້ປົ່ງນີ້ຈະນໍາໄປສູ່ການເພີ່ມຂຶ້ນຂອງຄ່າຈ້າງ. ດັ່ງນັ້ນ, ຫຼາຍບໍລິສັດເຊື່ອວ່າຄວາມຄືບໜ້ານີ້ຈະຊຸກຍູ້ການບໍລິໂພກສ່ວນບຸກຄົນແລະກະຕຸ້ນເສດຖະກິດພາຍໃນ.