ກອງປະຊຸມຄະນະຮັບຜິດຊອບການກະກຽມ ແລະ ຈັດງານບຸນຫໍຫຼັກເມືອງແຂວງໄຊຍະບູລີປະຈໍາປີ 2024 ໄດ້ຈັດຂຶ້ນໃນວັນທີ 6 ພະຈິກ ຜ່ານມານີ້ ຢູ່ທີ່ຫ້ອງປະຊຸມຫ້ອງວ່າການແຂວງ ພາຍໃຕ້ການເປັນປະທານຂອງທ່ານ ເພັດພິໄຊ ສູນວິໄລ ຮອງເຈົ້າແຂວງໄຊຍະບູລີ, ມີບັນດາກໍາມະການປະຈໍາພັກແຂວງ, ກໍາມະການພັກແຂວງ, ຫົວໜ້າ, ຮອງຫົວໜ້າພະແນກການ, ອົງການ, ກົມກອງ ພ້ອມດ້ວຍພະນັກງານທີ່ກ່ຽວຂ້ອງເຂົ້າຮ່ວມ.

ໃນກອງປະຊຸມ ຜູ້ເຂົ້າຮ່ວມໄດ້ຮັບຟັງຂໍ້ຕົກລົງຂອງທ່ານເຈົ້າແຂວງໄຊຍະບູລີ ສະບັບເລກທີ 1644/ຈຂ.ຊຍ ລົງວັນທີ 25 ກັນຍາ 2024 ວ່າດ້ວຍການແຕ່ງຕັ້ງຄະນະຮັບຜິດຊອບການກະກຽມ ແລະ ຈັດງານບຸນຫໍຫຼັກເມືອງ ແຂວງໄຊຍະບູລີ ປະຈໍາປີ 2024 ຊຶ່ງໄດ້ກໍານົດໃຫ້ມີ 8 ອະນຸກໍາມະການຄື: ຄະນະຮັບຜິດຊອບຊີ້ນໍາລວມ, ອະນຸກໍາມະການເນື້ອໃນ-ກອງເລຂາ, ອະນຸກໍາມະການຮັບແຂກ, ອະນຸກໍາມະການເສດຖະກິດ, ອະນຸກໍາມະການພິທີກໍາທາງສາສະໜາ, ອະນຸກໍາມະການສະຖານທີ່ ແສງ-ສີ-ສຽງ ປະດັບປະດາ ແລະ ປະຊາສໍາພັນ, ອະນຸກໍາມະການປ້ອງກັນ, ອະນຸກໍາມະການຮັກສາສຸຂະພາບ ແລະ ເຫດສຸກເສີນ. ຈຸດປະສົງກອງປະຊຸມໃນຄັ້ງນີ້ ກໍເພື່ອປະຕິບັດຕາມຂໍ້ຕົກລົງຂອງທ່ານເຈົ້າແຂວງໄຊຍະບູລີ ສະບັບເລກທີ 1644/ຈຂ.ຊຍ ລົງວັນທີ 25 ກັນຍາ 2024 ວ່າດ້ວຍການແຕ່ງຕັ້ງຄະນະຮັບຜິດຊອບການກະກຽມ ແລະ ຈັດງານບຸນຫໍຫຼັກເມືອງ ແຂວງໄຊຍະບູລີ ປະຈໍາປີ 2024 ຊຶ່ງຈະໄດ້ຈັດຂຶ້ນໃນວັນທີ 7-15 ພະຈິກ 2024. ຈາກນັ້ນ, ຜູ້ແທນກອງປະຊຸມກໍ່ໄດ້ພ້ອມກັນປະກອບຄໍາຄິດຄໍາເຫັນຢ່າງກົງໄປກົງມາເພື່ອໃຫ້ກອງປະຊຸມດັ່ງກ່າວໄດ້ຮັບຜົນສໍາເລັດຕາມຄາດໝາຍທີ່ວາງໄວ້.

(ຂ່າວ+ພາບ: ຄໍາໝັ້ນ)