ພິທີຊາປະນະກິດສົບຂອງສະຫາຍ ພົນໂທ ໄອ່ ສຸລິຍະແສງ ໄດ້ຈັດຂຶ້ນຢ່າງສົມກຽດໃນວັນທີ 4 ພະຈິກຜ່ານມາທີ່ວັດໂສກປ່າຫຼວງ ນະຄອນຫຼວງວຽງຈັນ ໂດຍການເຂົ້າຮ່ວມຂອງສະຫາຍ ທອງລຸນ ສີສຸລິດ ປະທານປະເທດແຫ່ງ ສປປລາວ, ມີບັນດາການນໍາຂັ້ນສູງຈາກບັນດາກະຊວງຕ່າງໆ, ອະດີດການນຳຂັ້ນສູງ, ຕະຫຼອດຮອດພະນັກງານສະມາຊິກພັກ, ພະນັກງານ, ນາຍ ແລະ ພົນທະຫານ, ນາຍ ແລະ ພົນຕຳຫຼວດ, ຄອບຄົວລູກຫຼານ ແລະ ຍາດຕິພີ່ນ້ອງເຂົ້າຮ່ວມຢ່າງຫຼວງຫຼາຍ.

ສະຫາຍ ພົນໂທ ວົງຄໍາ ພົມມະກອນກໍາມະການສູນກາງພັກຮອງລັດຖະມົນຕີກະຊວງປ້ອງກັນປະເທດປະທານຄະນະກຳມະການຮັບຜິດຊອບງານຊາປະນະກິດສົບໄດ້ຂຶ້ນກ່າວສະດຸດີຜ່ານປະຫວັດຫຍໍ້ແຫ່ງການກຳເນີດ ແລະ ການເຄື່ອນໄຫວປະຕິວັດຂອງສະຫາຍ ພົນໂທ ໄອ່ ສຸລິຍະແສງຊຶ່ງສະຫາຍ ພົນໂທ ໄອ່ ສຸລິຍະແສງ ອະດີດກໍາມະການສູນກາງພັກສະໄໝທີ IV, V, ອະດີດຮອງລັດຖະມົນຕີກະຊວງປ້ອງກັນປະເທດ, ອະດີດຫົວໜ້າກົມໃຫຍ່ເສນາທິການກອງທັບ, ອະດີດພະນັກງານອາວຸໂສບຳນານ ກະຊວງປ້ອງກັນປະເທດເກີດເມື່ອວັນທີ 1/1/1935 ທີ່ບ້ານຫີນລາດເມືອງສະໜາມໄຊ ແຂວງອັດຕະປື,ເປັນບຸດຂອງທ່ານ ບຸນລອດ ສຸລິຍະແສງ ແລະ ທ່ານນາງ ທອງ ສຸລິຍະແສງ ມີອ້າຍ, ເອື້ອຍ, ນ້ອງຮ່ວມອຸທອນດຽວກັນ 8 ຄົນຍິງ 3 ຄົນ, ສະຫາຍໄດ້ສ້າງຄອບຄົວຮ່ວມກັບນາງ ຄຳປ່ຽງ ສຸລິຍະແສງມີບຸດຮ່ວມກັນ 4 ຄົນຍິງ 2.

ໃນໄລຍະຜ່ານມາຍ້ອນສະຫາຍເຫັນໄດ້ຄວາມໂຫດຮ້າຍປ່າເຖື່ອນຂອງພວກຈັກກະພັດລ່າເມືອງຂຶ້ນແບບເກົ່າ ແລະ ໃໝ່ ກໍຄືລູກແຫຼ່ງຕີນມືຂອງພວກເຂົາທີ່ໄດ້ສ້າງໂທດກໍາຕໍ່ປະຊາຊົນລາວບັນດາເຜົ່າ ສະຫາຍຈຶ່ງໄດ້ຕັດສິນໃຈຈາກຄອບຄົວພໍ່, ແມ່, ບ້ານເກີດເມືອງນອນເພື່ອເຂົ້າຮ່ວມການປະຕິວັດເມື່ອວັນທີີ 1/1/1948 ແລະ ໄດ້ເຂົ້າເປັນສະມາຊິກພັກປະຊາຊົນປະຕິວັດລາວເມື່ອວັນທີ 16/12/1956.

ນັບແຕ່ເຂົ້າການປະຕິວັດເປັນຕົ້ນມາ ສະຫາຍໄດ້ເຂົ້າຮ່ວມໃນຂະບວນການຕໍ່ສູ້ກູ້ຊາດ ຕໍ່ຕ້ານກັບຈັກກະພັດຜູ້ຮຸກຮານສະແດງອອກໃນຫຼາຍບັ້ນຮົບ, ບັ້ນຕີທີ່ສໍາຄັນເພື່ອປົດປ່ອຍປະເທດຊາດ ແລະ ທຸ້ມເທເຫື່ອແຮງສະຕິປັນຍາເຂົ້າໃນພາລະກິດປົກປັກຮັກສາແລະ ສ້າງສາພັດທະນາປະເທດຊາດຊຶ່ງໄດ້ມີຜົນງານ ແລະ ການເຄື່ອນໄຫວປະຕິບັດໜ້າທີ່ ທີ່ສຳຄັນໃນແຕ່ລະໄລຍະຂອງສະຫາຍດັ່ງນີ້:

- ປີ 1952-1953 ເປັນຮອງຫົວໜ້າໝູ່ ຮັບຜິດຊອບວຽກງານພະລາທິການ ຢູ່ກອງບັນຊາການທະຫານເມືອງສະໜາມໄຊ ແຂວງອັດຕະປື.

- ປີ 1954 ເປັນຮອງຫົວໜ້າໝວດບັນຊາ ກອງ 95 ຂຶ້ນກັບເຂດເຕົ້າໂຮມຊໍາເໜືອ ແຂວງຫົວພັນ.

- ປີ 1955-1956 ເປັນຫົວໜ້າໝວດບັນຊາຢູ່ກອງຮ້ອຍ 3 ກອງພັນ 705.

- ປີ 1957-1959 ໄປຮຽນວັດທະນະທໍາຢູ່ປະເທດຫວຽດນາມ.

- ປີ 1960-1961 ໄດ້ຮັບການແຕ່ງຕັ້ງເປັນຮອງຫົວໜ້າກອງພັນທີ 2 ບັນຊາກໍາລັງເຂົ້າຮ່ວມບັ້ນຮົບປົດປ່ອຍເຂດເສັ້ນທາງເລກທີ 13 ເໜືອ.

- ປີ 1962 ໄປຮຽນການທະຫານຊັ້ນສູງຢູ່ປະເທດຫວຽດນາມ.

- ປີ 1963 ໄດ້ຮັບການແຕ່ງຕັ້ງເປັນຫົວໜ້າພະແນກສູ້ຮົບຫ້ອງເສນາທິການ ກອງບັນຊາການສູງສຸດ.

- ປີ 1964-1965 ເປັນຄະນະຊີ້ນໍາດ່ານຮົບປົດປ່ອຍຫົວເມືອງ, ຮ່ອງນົນ ຢູ່ຊໍາເໜືອ.

- ປີ 1966-1967 ເປັນຫົວໜ້າຫ້ອງເສນາທິການກອງບັນຊາການສູງສຸດຢູ່ຊໍາເໜືອ.

- ປີ 1968 ເປັນຄະນະຮັບຜິດຊອບດ່ານຮົບປົດປ່ອຍນໍ້າບາກ, ຜ່າຖີ່, ໜອງຄ້າງ, ຖໍ້າລາ-ນາຄັງ.

- ປີ 1969-1972 ຊີ້ນໍາຕີຕ້ານບັ້ນຮົບກູ້ກຽດ, ບັ້ນຮົບ 3 ສອນ, ບັ້ນຮົບສອນໄຊ ແລະ ບັ້ນຮົບບໍ່ຕ່າວຄືນຂອງສັດຕູ ຢູ່ເຂດຊຽງຂວາງ.

- ປີ 1973-1975 ຊີ້ນໍາກໍາລັງທະຫານເຂົ້າປ້ອງກັນລັດຖະບານປະສົມ ແລະ ຄະນະມົນຕີປະສົມການເມືອງຢູ່ 2 ຕົວເມືອງເປັນກາງວຽງຈັນ ແລະ ຫຼວງພະບາງ.

- ປີ 1976-1978 ໄດ້ຮັບການແຕ່ງຕັ້ງເປັນຮອງຫົວໜ້າກົມໃຫຍ່ເສນາທິການກອງທັບປະຊາຊົນລາວ.

- ປີ 1979-1980 ໄປຮຽນນາຍທະຫານເສນາທິການຊັ້ນສູງຢູ່ອະດີດສະຫະພາບໂຊວຽດ ພ້ອມທັງໄດ້ຮັບການເລື່ອນຊັ້ນເປັນນາຍທະຫານຊັ້ນພົນຈັດຕະວາ.

- ປີ 1981-1983 ໄປຮຽນທິດສະດີຊັ້ນສູງຢູ່ໂຮງຮຽນທິດສະດີການເມືອງ ຫງວຽນອ້າຍກັວກ ສສ ຫວຽດນາມ.

- ປີ 1984-1988 ເປັນຄະນະຊີ້ນໍາບັ້ນຮົບ 3 ໝູ່ບ້ານ ແລະ ບັ້ນຮົບບໍ່ແຕນ ແຂວງໄຊຍະບູລີ, ໃນໄລຍະນີ້ປີ 1986 ໄດ້ຮັບການແຕ່ງຕັ້ງເປັນຫົວໜ້າກົມໃຫຍ່ເສນາທິການກອງທັບ ປະຊາຊົນລາວ ແລະ ໄດ້ຮັບການເລື່ອນຊັ້ນເປັນນາຍທະຫານຊັ້ນພົນໂທ.

- ປີ1989 ໄດ້ຮັບການແຕ່ງຕັ້ງເປັນຄະນະກໍາມະການປ້ອງກັນຊາດ-ປ້ອງກັນຄວາມສະຫງົບສູນກາງ.

- ປີ 1990-2006 ໄດ້ຮັບການແຕ່ງຕັ້ງເປັນຮອງລັດຖະມົນຕີກະຊວງປ້ອງກັນປະເທດ.

ດ້ວຍຜົນງານ ແລະ ຄຸນງາມຄວາມດີຂອງສະຫາຍທີ່ໄດ້ອຸທິດໃຫ້ແກ່ປະເທດຊາດຕະຫຼອດໄລຍະທີ່ຜ່ານມາ ສະຫາຍຈຶ່ງໄດ້ຮັບການຍ້ອງຍໍສັນລະເສີນຈາກພັກ, ລັດດ້ວຍການປະດັບຫຼຽນໄຊ, ຫຼຽນກາ ແລະ ໃບຍ້ອງຍໍປະເພດຕ່າງໆຈາກພາຍໃນ ແລະ ຕ່າງປະເທດຢ່າງຫຼວງຫຼາຍ ແລະ ສົມກຽດ. ການສູນເສຍສະຫາຍໄປໃນຄັ້ງນີ້ ແມ່ນເປັນການສູນເສຍອະດີດການນຳທີ່ມີຜົນງານ, ປະສົບການ ແລະ ມີບົດຮຽນຕົວຈິງໄປອີກຜູ້ໜຶ່ງ.

ແຕ່ຢ່າງໃດກໍຕາມ ພັກ, ລັດຖະບານ ແລະ ປະຊາຊົນລາວບັນດາເຜົ່າຈະສືບຕໍ່ເພີ່ມທະວີຄວາມສາມັກຄີພາຍໃນຊາດໃຫ້ເປັນປຶກແຜ່ນ ປະກອບສ່ວນຢ່າງຕັ້ງໜ້າເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດຕາມຄວາມມຸ້ງມາດປາຖະໜາຂອງສະຫາຍ ຊຶ່ງເປັນອຸດົມການອັນດຽວຂອງພັກ ແນໃສ່ເພື່ອພັດທະນາປະເທດຊາດໃຫ້ກ້າວຂຶ້ນຢ່າງບໍ່ຢຸດຢັ້ງ.

ຂໍ້ມູນ: ຂປລ