ໂຮງຮຽນວັດທະນະທຳຊົນເຜົ່າກອງທັບ ໄດ້ຈັດກອງປະຊຸມເຜີຍແຜ່ເອກະສານແຜນແມ່ບົດ ວ່າດ້ວຍການສ້າງຄູ່ຮ່ວມຊາຕາກຳລາວ-ຈີນ ສະບັບປີ 2024-2028 ຂຶ້ນໃນວັນທີ 6 ພະຈິກນີ້ ທີ່ໂຮງຮຽນດັ່ງກ່າວໂດຍການເປັນປະທານເຜີຍແຜ່ຂອງສະຫາຍ ພັນເອກ ສະແຫວງ ແດນນາມົນ ຫົວໜ້າການເມືອງ ໂຮງຮຽນວັດທະນະທຳຊົນເຜົ່າກອງທັບ, ມີຄະນະພັກ-ຄະນະອຳນວຍການ, 4 ຫ້ອງການ, 2 ກອງພັນ, ພະນັກງານ-ນັກຮົບທົ່ວໂຮງຮຽນເຂົ້າຮ່ວມ.

ສະຫາຍ ພັນເອກ ສະແຫວງ ແດນນາມົນ ໄດ້ເຜີຍແຜ່ເອກະສານແຜນແມ່ບົດ ວ່າດ້ວຍການສ້າງຄູ່ຮ່ວມຊາຕາກຳລາວ-ຈີນ ສະບັບປີ 2024-2028ຍົກໃຫ້ເຫັນປະຫວັດຄວາມເປັນມາ, ສອງປະເທດລາວ-ຈີນມີລະບອບການເມືອງທີ່ຄ້າຍຄືກັນ, ເປັນປະເທດທີ່ຢຶດໝັ້ນເສັ້ນທາງສັງຄົມນິຍົມ, ເປັນບ້ານໃກ້ເຮືອນຄຽງທີ່ດີ, ມີສາຍພູ, ສາຍນໍ້າຕິດຈອດກັນ ແລະ ມີມູນເຊື້ອມິດຕະພາບອັນດີງາມມາແຕ່ບູຮານນະການ, ພັກປະຊາຊົນປະຕິວັດລາວ ແລະ ພັກກອມມູນິດຈີນໄດ້ມີການພົວພັນກັນມາແຕ່ປີ 1959 ແລະ ສອງລັດໄດ້ສ້າງຕັ້ງສາຍພົວພັນການທູດນຳກັນ ໃນປີ 1961. ຈາກນັ້ນ, ພາຍໃຕ້ຄວາມເອົາໃຈໃສ່ຂອງສອງພັກ, ສອງລັດ ກໍຄືການນໍາຂອງສອງຝ່າຍ, ສາຍພົວພັນລາວ-ຈີນໄດ້ນັບມື້ນັບເຕີບໃຫຍ່ຂະຫຍາຍຕົວເປັນກ້າວໆມາ.

ນັບແຕ່ປີ 2000 ການນໍາສູງສຸດຂອງສອງປະເທດໄດ້ກໍານົດການຮ່ວມມືຕາມທິດໝັ້ນຄົງຍາວນານ, ບ້ານໃກ້ເຮືອນຄຽງທີ່ດີ, ໄວ້ເນື້ອເຊື່ອໃຈກັນ, ຮ່ວມມືຮອບດ້ານຕາມທິດ 4 ດີ, ບ້ານໃກ້ເຮືອນຄຽງທີ່ດີ, ເພື່ອນມິດທີ່ດີ, ສະຫາຍທີ່ດີ ແລະ ເປັນຄູ່ຮ່ວມມືທີ່ດີ, ໃນປີ 2009 ໄດ້ຍົກລະດັບການພົວພັນຂຶ້ນເປັນການພົວພັນແບບຄູ່ຮ່ວມຍຸດທະສາດຮອບດ້ານ, ປີ 2013 ຝ່າຍຈີນໄດ້ໃຫ້ທັດສະນະວ່າການພົວພັນລະຫວ່າງສອງປະເທດລາວ-ຈີນ ບໍ່ແມ່ນການພົວພັນແບບທົ່ວໄປ, ແຕ່ເປັນການພົວພັນແບບຄູ່ຮ່ວມຊາຕາກຳທີ່ມີຄວາມໝາຍຍຸດທະສາດ, ປີ 2016 ສອງຝ່າຍໄດ້ລະບຸໃນຖະແຫຼງການຮ່ວມລາວ-ຈີນວ່າ: ສອງປະເທດເປັນຄູ່ຮ່ວມຊາຕາກຳທີ່ມີຄວາມໝາຍຍຸດທະສາດ, ປີ 2017 ສອງຝ່າຍໄດ້ຢືນຢັນຄືນເຖິງການເປັນຄູ່ຮ່ວມຊາຕາກໍາລະຫວ່າງສອງປະເທດ ແລະ ພ້ອມກັນຕີລາຄາວ່າ ການພົວພັນລາວ-ຈີນໄດ້ຮັບການພັດທະນາຢ່າງຕໍ່ເນື່ອງ ແລະ ຢູ່ໃນໄລຍະທີ່ດີທີ່ສຸດໃນປະຫວັດສາດການພົວພັນ ລະຫວ່າງສອງປະເທດ, ປີ 2018 ສອງຝ່າຍໄດ້ຕົກລົງເປັນເອກະພາບກັນກ່ຽວກັບການລິເລີ່ມສ້າງແຜນແມ່ບົດ ວ່າດ້ວຍການສ້າງຄູ່ຮ່ວມຊາກໍາລາວ-ຈີນລະຫວ່າງສອງພັກ ແລະ ໄດ້ຮັບການລົງນາມໂດຍເລຂາທິການໃຫຍ່ຂອງ ສອງພັກທີ່ນະຄອນຫຼວງປັກກິ່ງໃນວັນທີ 30 ເມສາ 2019ຊຶ່ງຈຸດພິເສດຂອງແຜນແມ່ບົດສະບັບໃໝ່ໂດຍລວມ ເຫັນວ່າ ດ້ານໂຄງສ້າງແມ່ນຍັງຮັກສາໄວ້ຄືເກົ່າ ຊຶ່ງປະກອບດ້ວຍເນື້ອໃນການຮ່ວມມື 5 ຂົງເຂດ, ແຕ່ມີເນື້ອໃນທີ່ລະອຽດຄົບຖ້ວນ ແລະ ລົງເລິກໃນບັນດາຂະແໜງການຫຼາຍກວ່າເກົ່າມີລັກສະນະສັງລວມເອົາເນື້ອໃນຂອງແຜນແມ່ບົດສະບັບທີ 1 ແລະ ຖະແຫຼງການຮ່ວມສະບັບທ້າຍປີ 2022 ເຂົ້າໃສ່ກັນຊຶ່ງທັງ 5 ດ້ານແມ່ນສາມາດຈັດຕັ້ງປະຕິບັດໄດ້ ແລະ ຈະນໍາເອົາຜົນປະໂຫຍດໃຫຍ່ຫຼວງມາສູ່ລາວ ໂດຍຝ່າຍຈີນໄດ້ສະເໜີໃຫ້ການຊ່ວຍເຫຼືອໃນຫຼາຍຂົງເຂດ.

ສະຫາຍ ສີ ຈິ້ນຜິງ ເລຂາທິການໃຫຍ່ປະທານປະເທດຈີນ ໄດ້ເນັ້ນໜັກຫຼາຍຄັ້ງໃນໂອກາດພົບປະສອງຝ່າຍກັບສະຫາຍ ທອງລຸນ ສີສຸລິດ ເລຂາທິການໃຫຍ່ປະທານປະເທດ ສປປ ລາວ ວ່າ: ຄູ່ຮ່ວມຊາຕາກຳຈີນ-ລາວ ເປັນຄູ່ຮ່ວມຊາຕາກຳແບບພິເສດໃນຂອບເຂດການສ້າງປະຊາຄົມຮ່ວມຊາຕາກຳຂອງມວນມະນຸດ, ພິເສດຢູ່ບ່ອນວ່າຈີນ ແລະ ລາວ ລ້ວນແຕ່ແມ່ນປະເທດສັງຄົມນິຍົມທີ່ນໍາພາໂດຍພັກກອມມູນິດ, ການຢຶດໝັ້ນການນໍາພາຂອງພັກ ແລະ ເສັ້ນທາງສັງຄົມນິຍົມ ແມ່ນທາດແທ້ຂອງສາຍພົວພັນຈີນ-ລາວທັງແມ່ນລັກສະນະຈະແຈ້ງຂອງການສ້າງຄູ່ຮ່ວມຊາຕາກໍາຈີນ-ລາວ, ສະນັ້ນ, ສອງຝ່າຍຕ້ອງຖືເອົາແຜນແມ່ບົດສະບັບໃໝ່ເປັນບ່ອນອີງໃນການຊຸກຍູ້ໃຫ້ການສ້າງຄູ່ຮ່ວມຊາຕາກຳກ້າວເຂົ້າສູ່ລວງເລິກ, ເປັນຮູບປະທຳ ແລະ ເພີ່ມເນື້ອໃນໃໝ່ຂອງການພົວພັນຮ່ວມມືສອງພັກ, ສອງລັດລາວ-ຈີນໃນຕໍ່ໜ້າໂດຍສະເພາະການຮ່ວມມືໃນຂົງເຂດການເມືອງ, ເສດຖະກິດ, ຄວາມໝັ້ນຄົງ ແລະ ຂົງເຂດວັດທະນະທໍາ-ສັງຄົມ.

ໂອກາດດຽວກັນນີ້, ຍັງໄດ້ເຜີຍແຜ່ຄວາມໝາຍສຳຄັນຂອງກອງປະຊຸມ “ລັດຖະມົນຕີປ້ອງກັນອາຊຽນ ຄັ້ງທີ 18” ທີ່ກອງທັບປະຊາຊົນລາວເປັນປະທານ ແລະ ເຈົ້າພາບອີກດ້ວຍ. ການເຜີຍແຜ່ເອກະສານທັງສອງບົດໃນຄັ້ງນີ້ເພື່ອໃຫ້ພະນັກງານ, ສະມາຊິກພັກ ແລະ ພະນັກງານ-ນັກຮົບໃນທົ່ວໂຮງຮຽນໄດ້ມີຄວາມຮັບຮູ້, ເຂົ້າໃຈກ່ຽວກັບສາຍພົວພັນມິດຕະພາບການຮ່ວມມືທີ່ເປັນມູນເຊື້ອມາດົນນານລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຈີນ ແນໃສ່ເຮັດໃຫ້ທົ່ວກອງທັບຮັບຮູ້ເຂົ້າໃຈຢ່າງເລິກເຊິ່ງເຖິງຄວາມໝາຍຄວາມສຳຄັນຂອງການເປັນເຈົ້າພາບ, ເປັນປະທານກອງປະຊຸມລັດຖະມົນຕີປ້ອງກັນອາຊຽນຄັ້ງທີ 18, ກອງປະຊຸມລັດຖະມົນຕີປ້ອງກັນປະເທດອາຊຽນບວກ ແລະ ກອງປະຊຸມປິ່ນອ້ອມອື່ນໆເພື່ອເສີມສ້າງຄວາມຮັບຮູ້-ເຂົ້າໃຈເຖິງຄວາມຈຳເປັນພາວະວິໄສຂອງ ສປປ ລາວ ກໍຄືກອງທັບປະຊາຊົນລາວໃນການເຂົ້າຮ່ວມປະຊາຄົມປະຊາຊາດອາຊຽນ, ວິໄສທັດອັນກວ້າງໄກ, ທັດສະນະ-ແນວຄິດນຳພາ-ຊີ້ນຳຂອງພັກປະຊາຊົນປະຕິວັດລາວໃນການສືບຕໍ່ນຳພາປັບປຸງກໍ່ສ້າງກອງທັບ ແລະ ຈັດຕັ້ງປະຕິບັດໜ້າທີ່ການເມືອງໃນສະພາບໃໝ່.

ຂ່າວ: ໂຮງຮຽນວັດທະນະທຳຊົນເຜົ່າກອງທັບ