ເມື່ອບໍ່ດົນມານີ້, ການນຳເມືອງຫົງສາ ແຂວງໄຊຍະບູລີໄດ້ຈັດກອງປະຊຸມໃຫຍ່ຜູ້ແທນສະຫະພັນແມ່ຍິງເມືອງ ຄັ້ງທີ X ຂຶ້ນຢູ່ທີ່ສະໂມສອນເມືອງພາຍໃຕ້ການເປັນປະທານຂອງສະຫາຍ ນາງ ຄຳວົງ ແກ້ວມຸນລັດ ປະທານຄະນະສະຫະພັນແມ່ຍິງເມືອງ ໂດຍການເປັນກຽດເຂົ້າຮ່ວມຂອງສະຫາຍ ພອນສະຫວັນ ໄຊສົມພັນ ກຳມະການພັກແຂວງ ເລຂາຄະນະບໍລິຫານງານພັກເມືອງ ເຈົ້າເມືອງຫົງສາ, ມີສະຫາຍ ນາງ ຄຳຜິວ ພັນທະວົງ ກຳມະການພັກແຂວງ ຄະນະບໍລິຫານງານສູນກາງສະຫະພັນແມ່ຍິງລາວ ປະທານຄະນະສະຫະພັນແມ່ຍິງແຂວງໄຊຍະບູລີ, ມີແຂກຖືເຊີນ ແລະ ພາກສ່ວນກ່ຽວຂ້ອງເຂົ້າຮ່ວມ.

ໃນກອງປະຊຸມ, ສະຫາຍ ນາງ ຄຳວົງ ແກ້ວມຸນລັດ ໄດ້ຜ່ານບົດລາຍງານການເມືອງທັງສອງພາກ, ຊຶ່ງໄດ້ຕີລາຄາຜົນການຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນສະຫະພັນແມ່ຍິງເມືອງຄັ້ງທີ IXໃນໄລຍະ 5 ປີຜ່ານມາ ແລະ ທິດທາງແຜນການ 5 ປີໃນຕໍ່ໜ້າ, ຮັບຟັງບົດສະຫຼຸບການຈັດຕັ້ງປະຕິບັດແຜນພັດທະນາແມ່ຍິງເມືອງ 5 ປີຜ່ານມາ ພ້ອມທັງວາງທິດທາງແຜນການ 5 ປີໃນຕໍ່ໜ້າ ໂດຍໄດ້ຍົກໃຫ້ເຫັນຜົນງານດ້ານດີທີຕັ້ງໜ້າ ແລະ ດ້ານອ່ອນຂໍ້ຄົງຄ້າງທີ່ຈະໄດ້ແກ້ໄຂໃນຕໍ່ໜ້າ. ປັດຈຸບັນມີໜ່ວຍຮາກຖານສະຫະພັນແມ່ຍິງຂຶ້ນກັບສະຫະພັນແມ່ຍິງເມືອງຈໍານວນ 67 ໜ່ວຍ, ມີ​ສະມາຊິກ​ສະຫະພັນ​ແມ່ຍິງ​ທັງ​ໝົດ 5 ພັນກວ່າສະຫາຍ,.ໃນໄລຍະຜ່ານມາຄະນະບໍລິຫານງານາສະຫະພັນແມ່ຍິງເມືອງໄດ້ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ເອື້ອຍນ້ອງແມ່ຍິງບັນດາເຜົ່າ, ບັນດາຊັ້ນຄົນໃຫ້ມີແນວຄິດຫຼັກໝັ້ນຕໍ່ການນຳພາຂອງພັກ, ມີມູນເຊື້ອດຸໝັ່ນຂະຫຍັນພຽນໃນການອອກແຮງຄຽງບ່າຄຽງໄລ່ກັບເພດຊາຍ, ສ້າງເສດຖະກິດຄອບຄົວຄຽງຄູ່ກັບການຈັດຕັ້ງປະຕິບັດສິດສະເໝີພາບລະຫວ່າງຍິງ-ຊາຍໃນຄອບຄົວ, ສ້າງໃຫ້ເປັນຄອບຄົວ 3 ດີ, ບ້ານ 3 ດີຕິດພັນກັນກັບການສ້າງບ້ານພັດທະນາຕາມທິດ 3 ສ້າງ ແລະ ຂະບວນແຂ່ງຂັນຮັກຊາດ ແລະ ພັດທະນາ, ຮູ້ພັດທະນາຕົນເອງ, ພັດທະນາຄອບຄົວ, ພັດທະນາການຈັດຕັ້ງ ແລະ ຕັ້ງໜ້າເຂົ້າຮ່ວມຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ມະຕິກອງປະຊຸມໃຫຍ່ຂັ້ນຕ່າງໆຢ່າງເປັນຂະບວນການຟົດຟື້ນ. ຈາກນັ້ນ, ຄະນະບໍລິຫານງານາະຫະພັນແມ່ຍິງເມືອງຊຸດເກົ່າ ໄດ້ກ້າວລາໜ້າທີ່່ ແລະ ຜູ້ແທນໄດ້ໃຊ້ສິດປະຊາທິປະໄຕຂອງຕົນປ່ອນບັດຄັດເລືອກເອົາຄະນະບໍລິການງານາະຫະພັນແມ່ຍິງເມືອງຊຸດໃໝ່ ຊຶ່ງມີຜູ້ສະໝັກຈຳນວນ 23 ສະຫາຍ, ເລືອກເອົາ 21 ສະຫາຍ ແລະ ກອງປະຊຸມຄັ້ງປະຖົມມະລຶກໄດ້ເປັນເອກະສັນເລືອກເອົາສະຫາຍ ນາງ ຄຳວົງ ແກ້ວມຸນລັດ ເປັນປະທານຄະນະສະຫະພັນແມ່ຍິງເມືອງ, ສະຫາຍ ນາງ ກຽງສີ ຄໍາເຄື່ອງ ເປັນຮອງປະທານ, ທັງເປັນປະທານກວດກາ ແລະ ເລືອກເອົາສະຫາຍ ນາງ ສົມຄິດ ຈັນທະວົງ ເປັນຮອງປະທານ ແລະ ກອງປະຊຸມ ຍັງເປັນເອກະສັນເລືອກເອົາຜູ້ແທນໄປຮ່ວມກອງປະຊຸມໃຫຍ່ຜູ້ແທນສະຫະພັນແມ່ຍິງແຂວງ ຈຳນວນ 10 ສະຫາຍ, ສຳຮອງ 2 ສະຫາຍ.

(ພາບ-ຂ່າວ: ກິດຕິສັກ ບົວໄລ)