ວິທະຍຸກະຈາຍສຽງຫວຽດນາມລາຍງານວ່າ: ບົດລາຍງານຂອງ UNICEF ທີ່ປະກາດເມື່ອບໍ່ດົນມານີ້, ມີເດັກນ້ອຍປະມານ 473 ລ້ານຄົນ - ເທົ່າກັບ ⅙ຂອງຈຳນວນເດັກນ້ອຍທົ່ວໂລກພວມດຳລົງຊີວິດຢູ່ບັນດາເຂດເກີດການປະທະກັນ.

ຂ່າວລະບຸວ່າ: ອັດຕາສ່ວນເດັກນ້ອຍດຳລົງຊີວິດຢູ່ເຂດເກີດການປະທະກັນໄດ້ເພີ່ມຂຶ້ນທົບສອງເທົ່າ, ຈາກ 10% ໃນ​ທົດສະວັດ 1990 ຂຶ້ນເຖິງເກືອບ 19% ໃນປັດຈຸບັນ. ໃນທ້າຍປີຜ່ານມາ, ມີເດັກນ້ອຍ 47.​2 ລ້ານຄົນ ຕ້ອງປະລະເຮືອນຊານຍ້ອນການປະທະກັນ ແລະ ການໃຊ້ຄວາມຮຸນແຮງ. ທ່າອ່ຽງນີ້ ຄາດວ່າສືບຕໍ່ເພີ່ມຂຶ້ນໃນປີນີ້ເມື່ອບັນດາການປະທະກັນພວມເພີ່ມຂຶ້ນຢູ່ ໄຮຕີ ແລະ ລີບັງ, ມຽນມາ, ປາແລັດສະຕິນ ແລະ ຊູດັງ.ພິເສດ ຢູ່ ເຂດກາຊາ, ການປະທະກັນພວມເກີດຂຶ້ນຢ່າງຮ້າຍແຮງ. ທ່ານ ໂຣສາເລຍ ບໍຣເລນຜູ້ຊ່ຽວຊານດ້ານສື່ມວນຊົນຂອງ UNICEF ໃຫ້ຮູ້ວ່າ: ເດັກນ້ອຍ ຢູ່ ເຂດກາຊາພວມຮັບມືກັບສະພາບອາກາດໜາວ, ພະຍາດ ແລະ ຖືກຜົນສະທ້ອນຢ່າງແຮງດ້ານຈິດຕະສາດ. ມີເດັກນ້ອຍຢ່າງໜ້ອຍສຸດແມ່ນ 17,​492 ຄົນ ເສຍຊີວິດໃນເກືອບ 15 ເດືອນທີ່ເກີດການປະທະກັນ. ຕາມສະຖິຕິຂອງ UNICEF ແລ້ວ, ມີແມ່ຍິງແລະ ເດັກນ້ອຍປະມານ 96% ຢູ່ເຂດກາຊາ ບໍ່ສາມາດຕອບສະໜອງຄວາມຕ້ອງການດ້ານທາດບຳລຸງໂດຍພື້ນຖານ.