ການຍົກຍ້າຍເທດສະບານແຂວງຜົ້ງສາລີ(ໃໝ່) ມາຢູ່ເມືອງບຸນເໜືອມີຄວາມຄືບໜ້າ 85% ຊຶ່ງຄວາມຕ້ອງການພັດທະນາທັງໝົດໃນເທດສະບານແຂວງໃໝ່ ເຊື່ອມກັບເທດສະບານແຂວງເກົ່າລວມມູນຄ່າທັງໝົດ 500 ລ້ານໂດລາ ແຕ່ສະເໜີຫາລັດຖະບານເພິ່ນອະນຸມັດເປັນເງິນກູ້ອີພີຊີຈາກບໍລິສັດໂນເລັນໂກໄດ້ພຽງແຕ່ 200 ລ້ານໂດລາ. ດັ່ງນັ້ນ, ຈຶ່ງມາສຸມໃສ່ສະເພາະໜ້າວຽກທີ່ຈຳເປັນເທົ່ານັ້ນ.

ທ່ານ ຄໍາຜອຍ ວັນນະສານ ກໍາມະການສູນກາງພັກ ເລຂາພັກແຂວງ ເຈົ້າແຂວງຜົ້ງສາລີໄດ້ໃຫ້ສຳພາດຕໍ່ນັກຂ່າວໜັງສືພິມປະຊາຊົນເມື່ອບໍ່ດົນມານີ້ວ່າ: ການຍົກຍ້າຍເທດສະບານແຂວງຜົ້ງສາລີ (ໃໝ່) ມາຢູ່ເມືອງບຸນເໜືອມີຄວາມຄືບໜ້າ 85% ດ້ານນິຕິກຳໄດ້ມີການອະນຸມັດມາແຕ່ປີ 2009 ຊຶ່ງທ່ານນາຍົກລັດຖະ ມົນຕີໄດ້ອອກຂໍ້ຕົກລົງໃຫ້ມີການຍົກຍ້າຍສະບັບເລກທີ 068 ຜ່ານການອະນຸຍາດໃຫ້ຍົກຍ້າຍພວກເຮົາໄດ້ຂຶ້ນແຜນໃຫ້ລັດຖະບານເພື່ອມາພັດທະນາ ຊຶ່ງຜ່ານການຂຶ້ນແຜນມາພັດທະນາທຶນພາຍໃນໄດ້ປີລະເລັກລະໜ້ອຍ ຕໍ່ມາຖືກໃນໄລຍະໂຄວິດ-19 ພົບຄວາມຫຍຸ້ງຍາກດ້ານເສດຖະກິດການເງິນ ລັດຖະບານບໍ່ສາມາດສະໜອງໄດ້ດ້ານງົບປະມານ, ເມື່ອເປັນແນວນັ້ນຈຶ່ງໄດ້ສະເໜີໃຫ້ລັດຖະບານເພາະວ່າຄວາມຕ້ອງການພັດທະນາທັງໝົດໃນເທດສະບານໃໝ່ເຊື່ອມກັບເທດສະບານເກົ່າລວມມູນຄ່າ 500 ລ້ານໂດລາ ແຕ່ວ່າເມື່ອສະເໜີຫາລັດຖະ ບານເພິ່ນອະນຸມັດເປັນເງິນກູ້ອີພີຊີຈາກບໍລິສັດໂນເລັນໂກໄດ້ແຕ່ 200 ລ້ານໂດລາ. ດັ່ງນັ້ນ, ຈຶ່ງມາສຸມໃສ່ສະເພາະໜ້າວຽກທີ່ຈຳເປັນ, ເປັນຕົ້ນໂຄງລ່າງພື້ນຖານເສັ້ນທາງໃນຕົວເມືອງ, ລະບົບຕາຄ່າຍໄຟຟ້າ, ນໍ້າປະປາ, ສຳນັກງານ, ອົງການ, ສະຖານທີ່ເກັບມ້ຽນຂີ້ເຫຍື້ອເຫຼົ່ານີ້ເປັນຕົ້ນ.

ທ່ານ ຄໍາຜອຍ ວັນນະສານ ກ່າວໃຫ້ຮູ້ອີກວ່າ: ຜ່ານການຈັດຕັ້ງປະຕິບັດໃນໄລຍະຜ່ານມາ, ພວກເຮົາໄດ້ສຸມໃສ່ 6 ໜ້າວຽກຄື: 1. ສຸມໃສ່ປູກຈິດສຳນຶກ, ໄກ່ເກ່ຍຊົດເຊີຍເວນຄືນຜົນກະທົບໃນໂຄງການ; 2. ສຸມໃສ່ຈັດຕັ້ງປະຕິບັດບັນດາໜ້າວຽກທີ່ໄດ້ສັນຍາການຄ້າໃນ 200 ລ້ານໂດລາ ໂດຍມີການກຳນົດໜ້າວຽກຄັກແນ່; 3. ສຸມໃສ່ສ້າງແຜນພັດທະນາຕາມຜັງເມືອງທີ່ໄດ້ກຳນົດໄວ້; 4, ຄຸ້ມຄອງການປຸກສ້າງທີ່ບໍ່ຖືກຕາມຜັງເມືອງ(ຕາມເຕັກນິກ); 5. ສຸມໃສ່ພັດທະນາເທດສະບານເກົ່າຢູ່ເມືອງຜົ້ງສາລີ ຕຶກສຳນັກງານ, ອົງການ, ພະແນກການຕ່າງໆທີ່ຍ້າຍມາຢູ່ເມືອງບຸນເໜືອຊິເຮັດແນວໃດ.ຕໍ່ບັນຫາດັ່ງກ່າວທາງອົງການປົກຄອງແຂວງໄດ້ຫັນໄປສູ່3ຮູບການຄື: ຮູບການທີ່ 1 ຫັນເປັນສຳນັກງານຫ້ອງການເມືອງຜົ້ງສາລີທີ່ເຂົາເຈົ້າບໍ່ພຽງພໍໃຫ້ເຂົາເຈົ້ານໍາໃຊ້; 2. ຫັນໄປຂາຍສິດນໍາໃຊ້ທີ່ເຫັນວ່າບໍ່ມີຜູ້ມາເຊົ່າ ບໍ່ມີຜູ້ມາສຳປະທານ ປະຊາຊົນຕ້ອງການກໍຂາຍໃຫ້; 3. ໂຄສະນາໃຫ້ມີຜູ້ມາເຊົ່າສຳປະທານມາຮອດປັດຈຸບັນຍັງບໍ່ທັນມີ; 6. ກະກຽມເກັບມ້ຽນສິ່ງເສດເຫຼືອຂີ້ເຫຍື້ອຢູ່ໃນເທດສະບານໃໝ່ ຊຶ່ງໄດ້ສະເໜີສະພາເພື່ອສ້າງຕັ້ງຫ້ອງການພັດທະນາ ແລະ ບໍລິຫານຕົວເມືອງ. ສະນັ້ນ, ມາຮອດປັດຈຸບັນດ້ານພື້ນຖານໂຄງລ່າງຈຳນວນໜຶ່ງສຳເລັດແລ້ວແລະໄດ້ມີການມອບ-ຮັບແລ້ວ,ຈຳນວນໜຶ່ງຍັງບໍ່ທັນສຳເລັດ ແຕ່ໄດ້ຍົກຍ້າຍມາແລ້ວກໍໄປຢູ່ບ່ອນອື່ນລໍຖ້າ. ມາຮອດປັດຈຸບັນສາມາດເວົ້າໄດ້ວ່າການຍົກຍ້າຍມາຢູ່ເທດສະບານແຂວງໃໝ່ທີ່ເມືອງບຸນເໜືອມີຄວາມຄືບໜ້າ 85% ຊຶ່ງຂໍ້ຫຍຸ້ງຍາກຍ້ອນໄລຍະຈັດຕັ້ງປະຕິບັດໂຄງການຖືກກັບໄລຍະໂຄວິດ-19 ລະບາດຈຶ່ງຫຍຸ້ງຍາກດ້ານເສດຖະກິດ-ການເງິນ, ດຽວນີ້ບໍລິສັດທີ່ກູ້ເງິນມາພັດທະນາໄດ້ສະເໜີໃຫ້ລັດຖະບານມີການດັດແກ້ຫົວໜ່ວຍລາຄາ; ຍ້ອນຜົນກະທົບຖືກສິ່ງປຸກສ້າງຂອງປະຊາຊົນ.

ຂ່າວ: ພູວັນ