1. ເພີ່ມທະວີການຄົ້ນຄວ້າ, ກໍາແໜ້ນເປັນລະບົບລັດທິມາກ-ເລນິນ, ແນວຄິດ ໄກສອນ ພົມວິຫານ ເພື່ອຮັບປະກັນເປັນພື້ນຖານອັນໜັກແໜ້ນດ້ານແນວຄິດ ແລະ ວິທີວິທະຍາຂອງພັກເຮົາໃນການນໍາພາ ພາລະກິດປະຕິວັດໃນໄລຍະໃໝ່, ຮຽນຮູ້ບົດຮຽນຂອງພັກອ້າຍນ້ອງໃນການກໍານົດ ແລະ ຜັນຂະຫຍາຍແນວທາງກໍ່ສ້າງສັງຄົມນິຍົມ, ທັງເປັນເຈົ້າການຄົ້ນຄວ້າ-ສັງລວມພຶດຕິກໍາການນໍາພາຂອງພັກ ເພື່ອກໍາແໜ້ນບັນຫາການເມືອງ, ເສດຖະກິດ, ວັດທະນະທໍາ-ສັງຄົມ... ທີ່ພັກຕ້ອງສຸມການແກ້ໄຂໃນແຕ່ລະໄລຍະ ເປັນບ່ອນອີງອັນໜັກແໜ້ນ ເພື່ອບູລະນະແນວທາງ, ແຜນນະໂຍບາຍ ແລະ ປັບປຸງຍົກລະດັບຄຸນນະພາບຂອງການຈັດຕັ້ງ ແລະ ການເຄື່ອນໄຫວນໍາພາຂອງພັກເຮົາໃຫ້ສູງຂຶ້ນ.

2. ສ້າງການຫັນປ່ຽນໃຫ້ແຂງແຮງ ແລະ ເລິກເຊິ່ງ ໃນການເຜີຍແຜ່-ເຊື່ອມຊຶມບັນດາມະຕິຂອງພັກ ໂດຍເອົາເປົ້າໝາຍການສ້າງຄວາມເຂົ້າໃຈຖືກຕ້ອງ, ເອກະພາບກ່ຽວກັບບັນດາເນື້ອໃນພື້ນຖານແຕ່ລະດ້ານຂອງແຜນນະໂຍບາຍທີ່ກໍານົດໃນມະຕິຂອງພັກ ຕິດພັນກັບການສ້າງຄວາມເຂົ້າໃຈ ແລະ ຄວາມຮັບຜິດຊອບຕົວຈິງໃນການປະຕິບັດຢູ່ແຕ່ລະຂັ້ນ ກໍຄື ພະນັກງານ-ສະມາຊິກພັກແຕ່ລະຄົນ, ເຮັດໃຫ້ການສ້າງຄວາມຮັບຮູ້-ເຂົ້າໃຈ, ຕື່ນຕົວຮັບຜິດຊອບ ແລະ ການຈັດຕັ້ງນໍາພາປະຕິບັດຕົວຈິງ ບໍ່ຕັດແຍກອອກຈາກກັນ ແລະ ກາຍເປັນຂະບວນການຢ່າງຕໍ່ເນື່ອງ ແລະ ແຂງແຮງ.

3. ການເຄື່ອນໄຫວຂອງຄະນະພັກແຕ່ລະຂັ້ນ, ລວມທັງບັນດາການຈັດຕັ້ງທີ່ເຮັດໜ້າທີ່ໃນຂົງເຂດແນວຄິດ-ທິດສະດີຂອງພັກ, ຂອງການຈັດຕັ້ງລັດ ກໍຄື ຂອງແນວລາວສ້າງຊາດ ແລະ ບັນດາອົງການຈັດຕັ້ງມະຫາຊົນ ຕ້ອງສຸມໃສ່ສ້າງການຫັນປ່ຽນດ້ານຈິນຕະນາການ, ສ້າງຄວາມປອດໃສຂາວສະອາດພາຍໃນການຈັດຕັ້ງ ແລະ ຖັນແຖວຂອງຕົນ, ສະກັດກັ້ນປະກົດການ “ຫັນປ່ຽນດ້ວຍຕົນເອງ”,“ການປ່ຽນຄຸນເສື່ອມທາດເອງ”. ພ້ອມທັງ ປູກຈິດສໍານຶກ ແລະ ກະຕຸ້ນມານະຈິດການປະຕິວັດຂອງພະນັກງານ-ສະມາຊິກພັກ; ປຸກລະດົມຂະບວນການຕໍ່ສູ້ຕີຖອຍບັນດາປະກົດການຫຍໍ້ທໍ້ໃນສັງຄົມ, ເຊີດຊູຈິດໃຈຮັກຊາດ ຮັກລະບອບໃໝ່, ເພີ່ມທະວີຄວາມສາມັກຄີເປັນປຶກແຜ່ນຂອງປະຊາຊົນບັນດາເຜົ່າ, ທັບມ້າງທຸກການເຄື່ອນໄຫວທໍາລາຍມ້າງເພຂອງອິດທິກໍາລັງປໍລະປັກຕໍ່ພັກ ແລະ ລະບອບໃໝ່ຂອງພັກເຮົາ.

4. ການເຄື່ອນໄຫວສຶກສາອົບຮົມການເມືອງ-ແນວຄິດ ຕ້ອງຕິດພັນກັບເປົ້າໝາຍການພັດທະນາຄົນລາວ ຊຶ່ງນອກຈາກຮັບປະກັນໃຫ້ມີຄວາມຮູ້ພື້ນຖານດ້ານວິຊາຊີບຕ່າງໆແລ້ວ ຍັງຕ້ອງຕັ້ງໜ້າສຶກສາອົບຮົມ ສ້າງໃຫ້ມີທັດສະນະອອກແຮງງານ, ຄວາມດຸໝັ່ນຂະຫຍັນພຽນ, ອົດທົນ, ມີລະບຽບວິໄນ ແລະ ມີຄວາມຊື່ສັດ, ປະຢັດ ແລະ ທ່ຽງທໍາ; ພ້ອມທັງ ມີມານະຈິດບຸກບືນຜ່ານຜ່າຄວາມຫຍຸ້ງຍາກ ແລະ ຕື່ນຕົວໃນການພັດທະນາຕົນເອງ ເພື່ອກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ.

5. ປັບປຸງເນື້ອໃນ ແລະ ຮູບການເຄື່ອນໄຫວວຽກງານການເມືອງ-ແນວຄິດ ໃຫ້ແທດຕົວຈິງ, ມີຊີ

ວິດຊີວາ ແລະ ສອດຫ້ອຍໃນທຸກການເຄື່ອນໄຫວຂອງສັງຄົມ, ຕິດພັນກັບການເພີ່ມທະວີໂຄສະນາ-ປຸກ ລະດົມຂະບວນການຕ່າງໆດ້ານການເມືອງ, ເສດຖະກິດ, ວັດທະນະທໍາ-ສັງຄົມ... ພາຍໃຕ້ການນໍາພາຂອງການຈັດຕັ້ງພັກແຕ່ລະຂັ້ນ.

ໃນມະຕິກອງປະຊຸມໃຫຍ່ ຄັ້ງທີ XI ຂອງພັກ ໄດ້ກໍານົດໄວ້ວ່າ: “ຢຶດໝັ້ນທັດສະນະພື້ນຖານຂອງພັກ ກ່ຽວກັບສ້າງການຫັນປ່ຽນໃໝ່ດ້ານຈິນຕະນາການ, ຍົກລະດັບຄຸນນະພາບວຽກງານການເມືອງ-ແນວຄິດ ແລະ ທິດສະດີຂອງພັກ”.

ກ່ອນອື່ນ ຕ້ອງເຮັດໃຫ້ຖັນແຖວພະນັກງານນໍາພາຂັ້ນຍຸດທະສາດ, ພະນັກງານຫຼັກແຫຼ່ງແຕ່ລະຂັ້ນ ໄດ້ຮັບການປະກອບຄວາມຮູ້ດ້ານລັດທິມາກ-ເລນິນ ທີ່ເປັນທິດສະດີພື້ນຖານກ່ຽວກັບການປະຕິວັດ ເວົ້າລວມ ແລະ ແນວຄິດ ໄກສອນ ພົມວິຫານ ທີ່ເປັນຜົນແຫ່ງການຄົ້ນຄວ້າ, ໝູນໃຊ້ ແລະ ປະດິດສ້າງທິດສະດີລວມ ເຂົ້າໃນພຶດຕິກໍາແຫ່ງການນໍາພາ ພາລະກິດປະຕິວັດຂອງພັກເຮົາ ແລະ ຂອງປະທານ ໄກສອນ ພົມວິຫານ; ພ້ອມນັ້ນ ຍັງຕ້ອງສືບຕໍ່ຮຽນຮູ້ບົດຮຽນການສ້າງສັງຄົມນິຍົມຢູ່ບັນດາປະເທດອ້າຍນ້ອງ ກໍຄືບົດຮຽນການພັດທະນາເສດຖະກິດ-ສັງຄົມຂອງປະເທດຕ່າງໆ. ຈາກນັ້ນ, ດ້ານໜຶ່ງ ເປັນການປັບປຸງ ແລະ ເພີ່ມທະວີຄວາມໜັກແໜ້ນດ້ານການເມືອງ, ຈົງຮັກພັກດີ ແລະ ເຊື່ອໝັ້ນຕໍ່ອຸດົມການອັນສູງສົ່ງຂອງພັກ ນໍາພາປະເທດຊາດກ້າວເດີນສູ່ຈຸດໝາຍສັງຄົມນິຍົມ; ດ້ານໜຶ່ງອີກ ສ້າງພື້ນຖານດ້ານທິດສະດີ ແລະ ພັດທະນາທັກສະຂອງຖັນແຖວສະມາຊິກພັກ-ພະນັກງານ ໂດຍສະເພາະແມ່ນຜູ້ນໍາພາຫຼັກແຫຼ່ງແຕ່ລະຂັ້ນ ໃນການວິເຄາະ, ໄຈ້ແຍກ ສັງລວມສະພາບການພາຍໃນ, ທັງຮຽນຮູ້ຈາກປະສົບການເຄື່ອນໄຫວພຶດຕິກໍາຂອງພັກ ແລະ ຂອງສັງຄົມ ເພື່ອກໍາແໜ້ນບັນຫາໃໝ່ໆ ທີ່ເລັ່ງທວງໃຫ້ມີການແກ້ໄຂໃນແຕ່ລະໄລຍະ; ພ້ອມທັງ ຕໍ່ສູ້ ແລະ ປົດປ່ອຍອອກຈາກແນວຄິດ ແລະ ການເຄື່ອນໄຫວແບບຄອງເດີມ, ບໍ່ກ້າປ່ຽນແປງ, ບໍ່ມອງກວ້າງເຫັນໄກ ຫຼື ອອກຈາກສະພາວະກໍານົດເນື້ອໃນນໍາພາແບບລວມໆ, ເຄື່ອນໄຫວໜັກຮູບການ, ບໍ່ແທດຕົວຈິງ, ເຮັດຫຼາຍ ແຕ່ປະສິດທິຜົນຕໍ່າ... ທີ່ເປັນປະກົດການແຜ່ຫຼາຍໃນໄລຍະຜ່ານມາ.

ສູນກາງພັກ ຕ້ອງຮັບປະກັນເຮັດໃຫ້ບັນດາອົງການເສນາທິການ ຫຼື ອົງການວິຊາການຕ່າງໆທີ່ເຮັດໜ້າທີ່ໃນຂົງເຂດການເມືອງ-ແນວຄິດ ແລະ ທິດສະດີຂອງພັກ ໄດ້ຮັບການຍົກລະດັບຄວາມສາມາດໃນການເຄື່ອນໄຫວປະຕິບັດພາລະບົດບາດຂອງຕົນ ເຊັ່ນ: ຄະນະໂຄສະນາອົບຮົມແຕ່ລະຂັ້ນ, ສະພາທິດສະດີສູນກາງ, ສະຖາບັນການເມືອງ ແລະ ການປົກຄອງແຫ່ງຊາດ, ສະຖາບັນຄົ້ນຄວ້າເສດຖະກິດ-ສັງຄົມແຫ່ງຊາດ... ທັງນີ້ ກໍເພື່ອສາມາດຊ່ວຍສູນກາງພັກຄົ້ນຄວ້າ ສ້າງບັນດາເນື້ອໃນການເຄື່ອນໄຫວທີ່ສອດຄ່ອງກັບການສ້າງການຫັນປ່ຽນໃໝ່ທີ່ແຂງແຮງ, ເລິກເຊິ່ງ ແລະ ຮອບດ້ານ, ບໍ່ວ່າຈະຕໍ່ການນໍາພາພັດທະນາເສດຖະກິດ-ສັງຄົມ ກໍຄື ໃນການປັບປຸງພາຍໃນຂອງພັກເຮົາ, ເປັນພື້ນຖານອັນໜັກແໜ້ນໃຫ້ແກ່ການຊີ້ນໍາທີ່ເຂັ້ມແຂງແຕ່ເທິງລົງລຸ່ມ.

ເພີ່ມທະວີການເຄື່ອນໄຫວດ້ານການເມືອງ ແລະ ນໍາພາແນວຄິດຢູ່ພາຍໃນການຈັດຕັ້ງທຸກຂັ້ນ ຕິດພັນກັບການດໍາເນີນການປົວແປງພາຍໃນຢ່າງຕໍ່ເນື່ອງ ໂດຍຖືການຕໍ່ສູ້ຕ້ານແນວຄິດຄອງເດີມ,ທັດສະນະການເມືອງທີ່ຜິດເຂວ, ແບບແຜນນໍາພາທີ່ບໍ່ຖືກຕ້ອງ ກໍຄື ຄ່ານິຍົມທີ່ບໍ່ເໝາະສົມຢູ່ພາຍໃນຖັນແຖວສະມາ ຊິກພັກ... ເປັນເນື້ອໃນພື້ນຖານຂອງການດໍາເນີນຊີວິດຂອງຄະນະພັກແຕ່ລະຂັ້ນ, ທັງດໍາເນີນການປຸກລະດົມຂະບວນການຝຶກຝົນຫຼໍ່ຫຼອມຄຸນທາດການເມືອງ, ຄຸນສົມບັດສິນທໍາປະຕິວັດ ແລະ ຄວາມເປັນແບບຢ່າງນໍາໜ້າຂອງສະມາຊິກພັກ-ພະນັກງານ ເປັນຕົ້ນແມ່ນສະມາຊິກພັກ-ພະນັກງານທີ່ເປັນຫຼັກແຫຼ່ງນໍາພາຢູ່ແຕ່ລະບ່ອນ, ແກ້ໄຂສະພາບຖືເບົາການພັດທະນາຕົນເອງໃນດ້ານນີ້.

(ຂໍ້ມູນຈາກ: ກົມອົບຮົມ ຄອສພ)