ວິທະຍຸກະຈາຍສຽງຫວຽດນາມລາຍງານ, ໃນວັນທີ 1 ມັງກອນ ຜ່ານມາສຳນັກຂ່າວສານ TASS ຂອງ ຣັດເຊຍ ລາຍງານວ່າ: ທ່ານ ວະລາດາເມຍ ປູຕິນປະທານາທິບໍດີ ຣັດເຊຍ ຮຽກຮ້ອງໃຫ້ລັດຖະບານ ແລະ Sberbank (ທະນາຄານໃຫຍ່ສຸດຂອງຣັດເຊຍ) ພັດທະນາກົນໄກຮ່ວມມືກັບ ຈີນ ໃນຂົງເຂດປັນຍາປະດິດ (AI). ປັດຈຸບັນ, ຣັດເຊຍ ພວມລົງທຶນຢ່າງແຂງແຮງເພື່ອສາມາດເປັນເຈົ້າຂອງເຕັກໂນໂລຊີຊິບຄວາມໄວສູງ, ໜຶ່ງໃນບັນດາຂົງເຂດເຕັກໂນໂລຊີທີ່ຈຳເປັນ ແລະ ເຕັມໄປດ້ວຍຄວາມມຸ່ງໝາຍຂອງສະຕະວັດທີ XXI.

ບັນດາບໍລິສັດຜະລິດຊິບໃນໂລກ ໄດ້ຢຸດຕິການສົ່ງອອກຜະລິດຕະພັນໄປຍັງ ຣັດເຊຍ, ຍ້ອນຖືກຜົນກະທົບຈາກບັນດາມາດຕະການຈໍາກັດການສົ່ງອອກເຕັກໂນໂລຊີທີ່ກ້າວໜ້າ ໂດຍບັນດາປະເທດຕາເວັນຕົກ. ສິ່ງດັ່ງກ່າວຖືວ່າ ສົ່ງຜົນກະທົບຫຼາຍຢ່າງຕໍ່ບັນດາເປົ້າໝາຍພັດທະນາ AI ຂອງ ຣັດເຊຍ. ໃນສານອວຍພອນປີໃໝ່ສົ່ງເຖິງທ່ານ ວະລາດີເມຍ ປູຕິນ ປະທານາທິບໍດີ ຣັດເຊຍ ໃນວັນທີ 31 ທັນວາ 2024, ທ່ານ ສີຈີ້ນຜິງ ປະທານປະເທດ ຈີນ ຢັ້ງຢືນເຖິງ ສາຍພົວພັນຄູ່ຮ່ວມມືອັນເລິກເຊິ່ງກວ້າງຂວາງ ແລະ ຍືນຍົງລະຫວ່າງສອງປະເທດ.