ພິທີປະກາດຮັບຮອງຈຸດສຸມບ້ານມອມ ເມືອງຕົ້ນເຜີ້ງແຂວງບໍ່ແກ້ວ ເປັນຕົວເມືອງນ້ອຍໃນຊົນນະບົດ ໄດ້ຈັດຂຶ້ນເມື່ອບໍ່ດົນນີ້ ທີ່ເດີ່ນໂຮງຮຽນປະຖົມສົມບູນບ້ານມອມໂດຍການເຂົ້າຮ່ວມເປັນປະທານມີທ່ານ ຄຳພະຫຍາ ພົມປັນຍາ ຄະນະປະຈຳພັກແຂວງ ຮອງເຈົ້າແຂວງບໍ່ແກ້ວ, ມີທ່ານ ຄຳແຍງ ຄອນໄຊຍະກິດ ກຳມະການພັກແຂວງ ເລຂາພັກເມືອງ ເຈົ້າເມືອງໆຕົ້ນເຜິ້ງ, ມີທ່ານ ເພັດສະໝອນ ຖານະສັກ ຮອງຫົວໜ້າກົມພັດທະນາຊົນນະບົດ, ມີແຂກຖືກເຊີນ ແລະ ພາກສ່ວນກ່ຽວຂ້ອງເຂົ້າຮ່ວມ.

ພິທີ ທ່ານ ອຸ່ນແສງ ທິບພະສົມບັດ ເລຂາຄະນະພັກ ນາຍບ້ານໆ ມອມ ໄດ້ລາຍງານການສ້າງຈຸດສຸມບ້ານມອມເປັນຕົວເມືອງໃນຊົນນະບົດຈຸດສຸມບ້ານມອມ ມີທີ່ຕັ້ງຢູ່ຫ່າງຈາກເທດສະບານເມືອງຕົ້ນເຜິ້ງ ໄປທາງທິດເໜືອປະມານ 20 ກມ ພູມສັນຖານເປັນເຂດທົ່ງພຽງກວມປະມານ 70% ຂອງເນື້ອທີ່ທັງໝົດຂອງຈຸດສຸມ ພາຍໃນຈຸດສຸມ ປະກອບມີ 5 ບ້ານ, ມີ 554 ຄອບຄົວ, ມີ 2,315 ຄົນຍິງ 1,225 ຄົນ, ມີຄອບຄົວພົ້ນທຸກ 505 ຄອບຄົວ ກວມ 91.15% ແລະ ມີຄອບຄົວພັດທະນາ 495 ຄອບຄົວ ກວມ 89% (ຕາມຂໍ້ມູນຂອງດໍາລັດ 348/ລບ ປະຈຳປີ 2024), ຢູ່ໃນຈຸດສູມປະກອບມີ 4 ເຜົ່າຄື: ເຜົ່າລື້, ເຜົ່າອາຄາ, ໄທດຳ ແລະ ເຜົ່າຄະມຸ, ອາຊີບຕົ້ນຕໍຂອງປະຊາຊົນ ແມ່ນເຮັດການຜະລິດກະສິກໍາ, ເຮັດການບໍລິການ ແລະ ການຄ້າຂາຍ, ສະ​ເລ່ຍ​ລາຍ​ຮັບ GDP ຕໍ່​ຫົວ​ຄົນ​ໄດ້ 35,700,000 ກີບ/ຄົນ/ປີ.

ຜົນສໍາເລັດໃນການສ້າງຈຸດສຸມບ້ານມອມ ເປັນຕົວເມືອງໃນຊົນນະບົດ, ຜ່ານການກວດກາ ແລະ ປະເມີນຈຸດສຸມບ້ານມອມ ຂອງຄະນະຮັບຜິດຊອບ ແລະ ກອງເລຂາ 348 ຂັ້ນເມືອງ ແລະ ແຕ່ລະຂະແໜງການທີ່ກ່ຽວຂ້ອງໄດ້ຢັ້ງຢືນວ່າ: ຈຸດສຸມບ້ານມອມ ໄດ້ມີເງື່ອນໄຂຄົບຕາມ 16 ຕົວຊີ້ບອກຂອງການສ້າງບ້ານໃຫຍ່ເປັນຕົວເມືອງໃນຊົນນະບົດ ທີ່ໄດ້ກຳນົດໄວ້ໃນມາດຕາ 9 ຂອງດຳລັດເລກທີ 348/ລບ. ຈາກນັ້ນ ທ່ານ ອິ່ນຄຳ ແກ້ວນາລີ ຄະນະປະຈຳພັກເມືອງ ຫົວໜ້າຄະນະຈັດຕັ້ງເມືອງ ຜ່ານຂໍ້ຕົກລົງຂອງເຈົ້າແຂວງໆ ບໍ່ແກ້ວ ວ່າດ້ວຍການຢັ້ງຢືນຮັບຮອງບ້ານມອມເປັນຕົວເມືອງນ້ອຍໃນຊົນນະບົດ ໃຫ້ກຽດຂຶ້ນມອບໃບຍັ້ງຍືນໂດຍທ່ານ ຮອງເຈົ້າແຂວງບໍ່ແກ້ວ ພ້ອມທັງເປີດປ້າຍ ແລະລັ່ນ ຄ້ອງ 9 ບາດ ແລະ ໃນພິທີຍັງໄດ້ມອບໃບຍ້ອງຍໍ ໃຫ້ແກ່ບຸກຄົນ, ກົມກອງທີ່ໄດ້ໃຫ້ການຊຸກຍູ້ເຂົ້າໃນການປະກາດຮັບຮອງບ້ານມອມເປັນຕົວເມືອງນ້ອຍໃນຊົນນະບົດ.

(ພາບ-ຂ່າວ: ສ ປັນຍາທອງ)