ພິທີເປີດງານບຸນກິນຈຽງປີໃໝ່ຊົນເຜົ່າມົ້ງຂອງບ້ານນໍ້າຫຍາມ ເມືອງທຸລະຄົມ ແຂວງວຽງຈັນ ຈັດຂຶ້ນໃນວັນທີ 1 ມັງກອນ 2025ຜ່ານມາ ຢູ່ທີ່ບ້ານດັ່ງກ່າວ, ໂດຍການເປັນປະທານຂອງ ທ່ານ ຊໍຢ່າງ ຈໍກາທົ່ງ ນາຍບ້ານໆນໍ້າຫຍາມ, ເປັນກຽດເຂົ້າຮ່ວມມີ ທ່ານ ນາງ ວົງເດືອນ ວັດຕະໂສ ເຈົ້າເມືອງໆທຸລະຄົມ, ມີແຂກຖືກເຊີນ ແລະ ພາກສ່ວນຕ່າງໆກ່ຽວຂ້ອງເຂົ້າຮ່ວມ.

ໃນພິທີ, ທ່ານ ຊໍຢ່າງ ຈໍກາທົ່ງ ໄດ້ຂຶ້ນລາຍງານສະພາບລວມ, ສະພາບຈຸດພິເສດຂອງບ້ານ ຕິດພັນກັບການ ເຄື່ອນໄຫວຊີ້ນໍາ-ນໍາພາວຽກງານໄລຍະ 1 ປີຜ່ານມາ ແລະ ຜ່ານກ່ຽວກັບຄວາມເປັນມາຂອງຮີດຄອງການຈັດງານບຸນກິນຈຽງປີໃໝ່ຊົນເຜົ່າມົ້ງໂດຍຫຍໍ້.ຈາກນັ້ນ ທ່ານ ເຈົ້າເມືອງທຸລະຄົມ ໄດ້ມີຄໍາເຫັນຕໍ່ພິທີ, ຝາກຄວາມຢື້ຢາມຖາມຂ່າວ ເຖິງການຈັດຕັ້ງ, ລູກຫຼານພໍ່ແມ່ປະຊາຊົນ, ກ່າວຍ້ອງຍໍຊົມເຊີຍຕໍ່ການພ້ອມພຽງຮຽງໜ້າຂອງປະຊາຊົນພາຍໃນບ້ານທີ່ໄດ້ເອົາໃຈໃສ່ຈັດຕັ້ງປະຕິບັດແຜນພັດທະນາເສດຖະກິິດ-ສັງຄົມຂອງບ້ານໃຫ້ມີການພັດທະນາມີການຫັນປ່ຽນທີ່ດີຂຶ້ນ ຕິດພັນກັບແຜນພັດທະນາເສດຖະກິດ-ສັງຄົມຂອງເມືອງ ກໍຄືຂອງແຂວງວຽງຈັນ;ຈາກນັນໄດ້ຮັບຊົມການສະແດງຟ້ອນສະແດງສິລະປະຊົນເຜົ່າມົ້ງຈາກໂຮງຮຽນ ມໍຕົ້ນ ແລະ ມໍປາຍ ປາກຫາງ, ຟ້ອນສະແດງສິລະປະຂອງຊົນເຜົ່າມົ້ງໂຮງຮຽນປະຖົມບ້ານນໍ້າຫຍາມ, ຊົມການເປົ່າແຄນເຜົ່າມົ້ງ, ສາທິດການຕໍາເຂົ້າປະປາປີໃໝ່, ໂຍນໝາກຄອນ ແລະ ມ່ວນຊື່ນລໍາວົງສາມັກຄີ ຕາມວັດທະນະທໍາຮີດຄອງປະເພນີອັນເປັນເອກະລັກທີ່ມີມາແຕ່ດົນນານ, ເປັນພາບອານຸສອນຄວາມຊົງຈໍາຂອງງານສົ່ງທ້າຍປີເກົ່າ 2024 ແລະ ຕ້ອນຮັບປີໃໝ່ສາກົນ ປີ 2025 ຂອງບ້ານດັ່ງກ່າວອີກດ້ວຍ.

(ຂ່າວ: ເມືອງທຸລະຄົມ)