ຂ່າວຕ່າງປະເທດລາຍງານ ຫວ່າງບໍ່ດົນມານີ້ວ່າ: ທ່ານ ອັບເດລ - ຟັດຕາ ອັລ - ຊີຊີ ປະທານາທິບໍດີເອຢິບ ເປີດເຜີຍວ່າ: ລາຍຮັບຈາກຄອງຊູແອດ ຫຼຸດລົງຫຼາຍກວ່າ 60%ໃນປີ 2024 ທ່າມກາງບັນຫາສິ່ງທ້າທາຍໃນພາກພື້ນ.
ຖະແຫຼງການຂອງທຳນຽບປະທານາທິບໍດີເອຢິບ ລະບຸວ່າ:ໃນການພົບປະກັບທ່ານໂອຊາມາ ເຣບີປະທານອົງການຄອງຊູແອດ(SCA)ຂອງເອຢິບ, ທ່ານ ອັລ - ຊີຊີ ກ່າວວ່າ:ເອຢິບໄດ້ສູນເສຍລາຍຮັບຈາກຄອງຊູແອດ ປະມານ 7 ຕື້ໂດລາ ໃນປີ 2024 ທ່າມກາງສະພາບການໃນປັດຈຸບັນຢູ່ທະເລແດງ ແລະ ພາກພື້ນຊ່ອງແຄບບາບ ອັລ - ມັນດາບ ຊຶ່ງສົ່ງຜົນສະທ້ອນທາງລົບຕໍ່ການເດີນເຮືອໃນຄອງຊູແອດ ແລະ ຄວາມຍືນຍົງຂອງການຄ້າໂລກ.
ທ່ານ ອັລ - ຊີຊີ ສັ່ງໃຫ້ອົງການSCAເດີນໜ້າໂຄງການພັດທະນາຄອງຊູແອດ, ສະໜອງການບໍລິການຂົນສົ່ງທີ່ດີທີ່ສຸດ ແລະ ເສີມຂະຫຍາຍບົດບາດຂອງຄອງຊູແອດ ໃນຖານະເປັນເສົາຄ້ຳທີ່ສຳຄັນສຳລັບການຄ້າທົ່ວໂລກ.
ທັງນີ້, ຄອງຊູແອດ ຖືວ່າເປັນເສັ້ນທາງການຂົນສົ່ງຍຸດທະສາດແລະເປັນເສົາຄ້ຳຫຼັກຂອງເສດຖະກິດເອຢິບ ຊຶ່ງກຳລັງປະເຊີນກັບບັນຫາເສດຖະກິດທີ່ຍືດເຍື້ອ.
