ພິທີໃສ່ບາດຖວາຍສັງຄະທານແດ່ພະສົງສາມະເນນໄຫວ້ພະຮັບສິນ, ຟັງທຳມະເທດສະໜາ ແລະຢາດນໍ້າຕາມຮີດຄອງປະເພນີທີ່ໄດ້ປະຕິບັດສືບທອດກັນມາແຕ່ບູຮານນະການໃນງານບຸນນະມັດສະການພະທາດຫຼວງວຽງຈັນປະຈໍາປີ 2024(ໃນມື້ຂຶ້ນ 15 ຄໍ່າເດືອນ 12 ພສ 2567)ໄດ້ຈັດຂຶ້ນໃນຕອນເຊົ້າຂອງວັນທີ 15 ພະຈິກນີ້ ທີ່ເດີ່ນພະທາດຫຼວງນະຄອນຫຼວງວຽງຈັນ, ໂດຍເປັນກຽດເຂົ້າຮ່ວມຂອງທ່ານ ທອງລຸນ ສີສຸລິດ ປະທານປະເທດແຫ່ງສປປລາວ,ມີຮອງປະທານປະເທດ, ເຈົ້າຄອງນະຄອນຫຼວງວຽງຈັນ ພ້ອມດ້ວຍການນຳພັກ-ລັດ ແລະ ມວນຊົນທັງພາຍໃນ ແລະ ຕ່າງປະເທດເຂົ້າຮ່ວມຢ່າງຫຼວງຫຼາຍ.
ພິທີໃສ່ບາດໃນງານບຸນນະມັດສະການພະທາດຫຼວງໄດ້ຈັດຂຶ້ນທຸກໆປີ ຊຶ່ງເປັນການຕັກບາດຖວາຍສັງຄະທານແດ່ພະພິຂຸສົງ-ສາມະເນນແລ້ວຍັງໄດ້ມີພິທີອື່ນໆຕາມຮີດຄອງປະເພນີຂອງຊາວລາວ, ພ້ອມນັ້ນ, ປີນີ້ເຫັນວ່າມວນຊົນຈາກທຸກທົ່ວສາລະທິດຕ່າງກໍມີຈິດໃຈໃສສັດທາຫຼັ່ງໄຫຼມາຮ່ວມງານບຸນປະເພນີນະມັດສະການພະທາດຫຼວງຢ່າງຫຼວງຫຼາຍແລະໄດ້ພ້ອມກັນໃສ່ບາດ, ຢາດນໍ້າ, ຮັບພອນ ແລະ ຟັງທຳມະເທດສະໜາເພື່ອອຸທິດສ່ວນບຸນກຸສົນໃຫ້ບັນພະບູລຸດ ແລະ ເຈົ້າກຳນາຍເວນຕາມຄວາມເຊື່ອຖືຂອງຊາວພຸດທີ່ເຄີຍສືບທອດກັນມາແຕ່ດົນນານເພື່ອເປັນການອະນຸລັກປົກປັກຮັກສາ ແລະ ເສີມຂະຫຍາຍວັດທະນະທຳຮີດຄອງປະເພນີອັນດີງາມຂອງຊາດ ແລະ ເພື່ອເປັນສິຣິມຸງຄຸນໃຫ້ແກ່ຊີວິດ ແລະ ຄອບຄົວ.ໃນພິທີ, ທ່ານ ທອງລຸນ ສີສຸລິດໄດ້ໃຫ້ກຽດໄຕ້ທຽນບູຊາ ແລະ ລັ່ນຄອງ 3 ບາດເພື່ອເປັນສິຣິມຸງຄຸນໃຫ້ແກ່ງານໃນຄັ້ງນີ້.
ໃນຕອນບ່າຍຂອງວັນດຽວກັນເວລາ13:00ໂມງໄດ້ມີພິທີແຫ່ລູກຄີ ແລະ ແຂ່ງຂັນກິລາປະເພນີຕີຄີທີ່ເດີ່ນພະທາດຫຼວງລະຫວ່າງການນຳພັກ-ລັດກັບທີມປະຊາຊົນ ແລະ ໃນຕອນຄໍ່າເວລາ 19:00 ໂມງມີພິທີວຽນທຽນຈູດທູບທຽນແລະຈຸດບັ້ງໄຟດອກເພື່ອສັກກາລະບູຊາພະທາດຫຼວງ ແລະ ກິດຈະກຳອື່ນໆຕາມຮີດຄອງປະເພນີລາວ. ຂ່າວ-ພາບ: ບຸນອູ້ມ
