ໂຮງຮຽນວັດທະນະທຳຊົນເຜົ່າກອງທັບ ໄດ້ຈັດພິທີປະກາດຮັບຮອງເອົາຄະນະບໍລິຫານງານພັກໂຮງຮຽນ ສະໄໝທີ I ຂຶ້ນໃນວັນທີ 14 ພະຈິກນີ້ ທີ່ໂຮງຮຽນດັ່ງກ່າວໂດຍການເປັນປະທານຂອງສະຫາຍ ພົນຈັດຕະວາ ພູມີ ດາລາເພັດ ກຳມະການຄະນະພັກກະຊວງປ້ອງກັນປະເທດຮອງຫົວໜ້າກົມໃຫຍ່ການເມືອງກອງທັບ, ມີກົມຈັດຕັ້ງພັກ, ຄະນະພັກ-ຄະນະອຳນວຍການ, ພະນັກງານ-ສະມາຊິກພັກທົ່ວໂຮງຮຽນເຂົ້າຮ່ວມ.

ສະຫາຍ ພົນຈັດຕະວາ ຈັນທາ ບຸນນະວົງ ຄະນະພັກກົມໃຫຍ່ການເມືອງກອງທັບ ຫົວໜ້າກົມຈັດຕັ້ງພັກ ກົມໃຫຍ່ການເມືອງກອງທັບ ໄດ້ຜ່ານມະຕິຕົກລົງຂອງຄະນະພັກກະຊວງປ້ອງກັນປະເທດ ວ່າດ້ວຍການຮັບຮອງເອົາຄະນະບໍລິຫານງານພັກໂຮງຮຽນວັດທະນະທຳຊົນເຜົ່າກອງທັບ ສະໄໝທີ I ຈຳນວນ 11 ສະຫາຍຄື: ສະຫາຍ ພັນເອກ ສະແຫວງ ແດນນາມົນ, ສະຫາຍ ພັນເອກ ເພັດສະໝອນ ວິລະວອນ, ສະຫາຍ ພັນເອກ ສັງທອງ ສຸກສີສະຫວາດ, ສະຫາຍ ພັນເອກ ວັນໄຊ ວົງປັນຍາ, ສະຫາຍ ພັນໂທ ຄຳສິງ ບຸດຈັນແພງ, ສະຫາຍ ພັນໂທ ວີຄຳ ສັງໂຄມະລາດ, ສະຫາຍ ພັນໂທ ຄຳພູວິກ ດາລາເພັດ, ສະຫາຍ ພັນໂທ ບົວຄິດ ດາລາວົງ, ສະຫາຍ ພັນໂທ ມີໄຊ ວົງພະຈັນ, ສະຫາຍ ພັນຕີ ອຸໄລກອນ ກົມມະເມືອງ ແລະ ສະຫາຍ ພັນໂທ ແກ້ວມະນີ ພິມມະສອນ; ຮັບຮອງເອົາຄະນະປະຈຳພັກ 3 ສະຫາຍຄື: ສະຫາຍ ພັນເອກ ສະແຫວງ ແດນນາມົນ, ສະຫາຍ ພັນເອກ ເພັດສະໝອນ ວິລະວອນ ແລະ ສະຫາຍ ພັນເອກ ສັງທອງ ສຸກສີສະຫວາດ; ຮັບຮອງເອົາເລຂາ, ຮອງເລຂາຄະນະບໍລິຫານງານພັກໂຮງຮຽນຄື: ສະຫາຍ ພັນເອກ ສະແຫວງ ແດນນາມົນ ເປັນເລຂາ, ສະຫາຍ ພັນເອກ ເພັດສະໝອນ ວິລະວອນ ເປັນຮອງເລຂາ ແລະ ຮັບຮອງເອົາປະທານ-ຮອງປະທານຄະນະກວດກາພັກ 3 ສະຫາຍຄື: ສະຫາຍ ພັນເອກ ສັງທອງ ສຸກສີສະຫວາດ ເປັນປະທານຄະນະກວດກາພັກ, ສະຫາຍ ພັນຕີ ບົວລອຍ ພົມມະວົງສາ ເປັນຮອງປະທານຄະນະກວດກາພັກ ແລະ ສະຫາຍ ພັນຕີ ບູລ່ຽມ ຄຳໄຊ ເປັນຮອງປະທານຄະນະກວດກາພັກ.

ໂອກາດນີ້, ສະຫາຍ ພົນຈັດຕະວາ ພູມີ ດາລາເພັດ ໄດ້ເນັ້ນໜັກໃຫ້ຄະນະພັກຊຸດໃໝ່ສືບຕໍ່ເພີ່ມທະວີວຽກງານສຶກສາອົບຮົມການເມືອງ-ນຳພາແນວຄິດໃຫ້ຖັນແຖວພະນັກງານ, ສະມາຊິກພັກ-ນັກຮົບເປັນເຈົ້າການຄົ້ນຄວ້າ, ເຊື່ອມຊຶມແນວທາງນະໂຍບາຍຂອງພັກ, ກົດໝາຍຂອງລັດ, ກົດລະບຽບຂອງກອງທັບ, ມີແບບແຜນວິທີເຮັດວຽກຖືກຕ້ອງ, ມີຄວາມເປັນເອກະພາບ, ລະອຽດ, ຊັດເຈນ, ໂປ່ງໃສ ແລະ ແບ່ງວຽກໃຫ້ບຸກຄົນຮັບຜິດຊອບ, ຍົກສູງຄຸນນະພາບການຮຽນ-ການສອນໃຫ້ໄດ້ຕາມລະດັບຄາດໝາຍທີ່ວາງໄວ້.

ຂ່າວ-ພາບ: ໂອລິນ ມິ່ງມີໄຊ