ຫວ່າງບໍ່ດົນມານີ້ ທີ່ເມືອງວັງວຽງ ແຂວງວຽງຈັນ, ກຳມາທິການວັດທະນະທຳ-ສັງຄົມ (ກວທສ) ໄດ້ດຳເນີນກອງປະຊຸມສຳມະນາວິທະຍາສາດວຽກງານວັດທະນະທຳ-ສັງຄົມ ພາຍໃຕ້ການເປັນປະທານຂອງທ່ານ ບຸນຕາ ເທບພະວົງ ກຳມະການສຳຮອງສູນກາງພັກ ຄະນະປະຈຳສະພາແຫ່ງຊາດ ປະທານ ກວທສ ໂດຍການເຂົ້າຮ່ວມໂອ້ລົມ ຂອງທ່ານ ຄຳໃບ ດຳລັດ ກຳມະການສູນກາງພັກ ຮອງປະທານສະພາແຫ່ງຊາດ; ມີບັນດາທ່ານປະທານ-ຮອງປະທານສະພາປະຊາຊົນຂັ້ນແຂວງ, ສະມາຊິກສະພາແຫ່ງຊາດ ປະຈໍາ 18 ເຂດເລືອກຕັ້ງທົ່ວປະເທດ, ຜູ້ຕາງໜ້າຈາກກະຊວງ ແລະ ອົງການທີ່ກ່ຽວຂ້ອງ, ຊ່ຽວຊານອົງການອຸຍນີເຊັບ ແລະ ອົງການອາຫານໂລກ ພ້ອມດ້ວຍແຂກຖືກເຊີນຈໍານວນໜຶ່ງເຂົ້າຮ່ວມ.

ກອງປະຊຸມໄດ້ຄົ້ນຄວ້າ 6 ຫົວຂໍ້ຄື: 1. ນຳສະເໜີສະຖານະພາບຕົວຊີ້ບອກກ່ຽວກັບວຽກງານການສຶກສາຂອງເດັກນ້ອຍ ຈາກຜົນການສຳຫຼວດດັດຊະນີໝາຍສັງຄົມລາວໃນລະຫວ່າງ 5 ປີຜ່ານມາ (LSIS 2017-LSIS 2023), 2. ສະຖານະພາບຂອງເດັກໃນໄລຍະວິກິດການອັນຜັນຜວນ: ທົບທວນຄືນທ່າອ່ຽງທາງດ້ານມະຫາພາກໃນລະດັບສາກົນຕໍ່ການພັດທະນາແບບຍືນຍົງໃນອະນາຄົດ, 3. ການສ້າງຮາກຖານເພື່ອອະນາຄົດຂອງເດັກນ້ອຍໃນ ສປປ ລາວ, 4. ວຽກງານສາທາລະນະສຸກ ລວມມີການຄວບຄຸມການສູບຢາ, 5. ບົດນຳສະເໜີກ່ຽວກັບການສົ່ງເສີມສັກກະຍະພາບເດັກນ້ອຍ ແລະ ໄວໜຸ່ມ ໃນຍຸກຂອງການປ່ຽນແປງຕາມລະບົບປະຊາທິປະໄຕຂອງ ສປປ ລາວ, 6. ການສ້າງນະໂຍບາຍ ແລະ ແຜນຍຸດທະສາດການພັດທະນາທຶນດ້ານຊັບພະຍາກອນມະນຸດ.

(ຂ່າວ: ກວທສ ສພຊ)