ກິລາກະຕໍ້ ໃນງານມະຫະກິລານັກຮຽນ ທົ່ວປະເທດ ຄັ້ງທີ 7 ທີ່ແຂວງສາລະວັນ ຊີງຫຼຽນຄຳມື້ທຳອິດ ວັນທີ 15 ທັນວານີ້ ລາຍການ ຍິງ 4 ຄົນ ແລະ ທີມຊຸດຄູ່ຊາຍ ແຂ່ງຂັນທີ່ສະໜາມກິລາກາງຂອງແຂວງ.

ຄູ່ຊີງຊະນະເລີດ ກະຕໍ້ຍິງ 4 ຄົນ ເປັນການພົບກັນລະຫວ່າງ ແຂວງບໍລິຄຳໄຊ ກັບ ແຂວງສະຫວັນນະເຂດ ຜ່ານການແຂ່ງຂັນປະກົດວ່າ: ບໍລິຄຳໄຊ ຫຼິ້ນໄດ້ດີກວ່າ ສາມາດເອົາຊະນະ ສະຫວັນນະເຂດ 2-0 ເຊັດ: 15-10, 15-7ໄດ້ຫຼຽນຄຳທຳອິດໃຫ້ກັບແຂວງບໍລິຄຳໄຊ, ສະຫວັນນະເຂດ ໄດ້ຫຼຽນເງິນ ແລະ ຫຼຽນທອງຮ່ວມເປັນຂອງ ນະຄອນຫຼວງວຽງຈັນ ແລະ ແຂວງຄຳມ່ວນ.

ປະເພດ ກິລາກະຕໍ້ລາຍການຄູ່ຊຸດຊາຍແຂວງຄໍາມ່ວນ ລົງແຂ່ງຂັນຮອບຮອງຊະນະເລີດ ໃນຕອນເຊົ້າຂອງວັນທີ 15 ທັນວາ ນີ້ ຢູ່ເດີ່ນກິລາກາງແຂວງສາລະວັນ, ແຂວງຄໍາມ່ວນເອົາຊະນະຈໍາປາສັກ 2 ຕໍ່ 1 ຄູ່,ຮອບຊີງຊະນະເລີດສາມາດເອົາຊະນະສະຫວັນນະເຂດ 2 ຕໍ່ 1 ຄູ່ເຊັ່ນກັນໄດ້ຄອງແຊັມລາຍການແຂ່ງຂັນກິລາປະເພດກະຕໍ້ຄູ່ຊຸດຊາຍໄດ້ຮັບຫຼຽນຄຳ ເປັນຫຼຽນທຳອິດໃຫ້ແກ່ທີມນັກກິລາແຂວງຄໍາມ່ວນ.

ສຳລັບກິລາກະຕໍ້ ໃນງານຄັ້ງນີ້ມີນັກກິລາຈາກ 13 ແຂວງເຂົ້າຮ່ວມຊີງໄຊຄື: ສາລະວັນ ເຈົ້າພາບ, ແຂວງວຽງຈັນ, ບໍລິຄຳໄຊ, ຄຳມ່ວນ, ໄຊສົມບູນ, ສະຫວັນນະເຂດ, ຈຳປາສັກ, ເຊກອງ, ອັດຕະປື, ບໍ່ແກ້ວ, ຫຼວງນໍ້າທາ, ຫຼວງພະບາງ ແລະ ນະຄອນຫຼວງວຽງຈັນ, ໃນນີ້ ປະເພດຍິງ 8 ພາກສ່ວນ, ປະເພດຊາຍ 11 ພາກສ່ວນ, ຊີງໄຊ 6 ລາຍການ ປະກອບມີ: ທີມຊຸດຄູ່ຊາຍ, ທີມຍິງ 4 ຄົນ, ທີມດ່ຽວຍິງ-ຊາຍ, ທີມຄູ່ຍິງ ແລະ ທີມຄູ່ຊາຍ ໂດຍແຂ່ງຂັນແຕ່ວັນທີ 11-21 ທັນວານີ້ ຈຶ່ງຈະສຳເລັດ.

(ຂ່າວ, ພາບ: ບຸນອູ້ມ)