ກອງປະຊຸມຄົບຄະນະກຳມະການເສດຖະກິດ, ແຜນການ ແລະ ການເງິນ ສະພາປະຊາຊົນແຂວງບໍ່ແກ້ວ ຊຸດທີ II ປະຈຳປີ 2024 ໄດ້ຈັດຂຶ້ນໃນວັນທີ 18 ທັນວາຜ່ານມາ ທີ່ຫ້ອງປະຊຸມສະພາແຂວງ, ໂດຍການເປັນປະທານຂອງທ່ານ ນາງ ບົວຄົມ ຂານສຸວົງ ປະທານຄະນະກຳມະການເສດຖະກິດ, ແຜນການ ແລະ ການເງິນ ສະພາປະຊາຊົນແຂວງ, ມີບັນດາປະທານຄະນະກຳມະການ, ຄະນະເລຂາທິການ, ກຳມະການຂອງກຳມາທິການເສດຖະກິດ, ແຜນການ ແລະ ການເງິນເຂົ້າຮ່ວມ.
ທ່ານນາງ ບົວຄົມ ຂານສຸວົງ ກ່າວວ່າ: ການຈັດກອງປະຊຸມຄັ້ງນີ້, ກໍເພື່ອກັນຄົ້ນຄວ້າ, ປຶກສາຫາລືື ແລະ ແລກປ່ຽນທັດສະນະຮ່ວມກັນກ່ຽວກັບບັນຫາທີ່ພົ້ນເດັ່ນເກີດຂຶ້ນໃນສັງຄົມ ທີ່ຕິດພັນກັບວຽກງານຂົງເຂດເສດຖະກິດ, ຮັບປະກັນເຮັດໃຫ້ເນື້ອໃນທີ່ຈະນຳມາເຂົ້າລຍງານຕໍ່ກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງ ຊຸດທີ II ໃຫ້ມີເນື້ອໃນຄົບຖ້ວນ, ສົມບູນ, ສາມາດພິຈາລະນາ, ຮັບຮອງເອົາ ແລະ ນຳໄປຈັດຕັ້ງປະຕິບັດໃນວຽກງານຕົວຈິງຢ່າງມີປະສິດທິພາບ ແລະ ປະຕິທິຜົນສູງ, ສຸມໃສ່ປະຕິບັດໜ້າທີ່ໃນການເປັນຕົວແທນແຫ່ງສິດຜົນປະໂຫຍດອັນຊອບທຳຂອງປະຊາຊົນບັນດາເຜົ່າໃຫ້ປະກົດປຜົນເປັນຈິງ. ຈາກນັ້ນ, ທ່ານ ນາງ ສຸກັນຍາ ຈັນສະຫວ່າງ ຫົວໜ້າຂະແໜງ ແຜນການ ແລະ ການເງິນ ສະພາປະຊາຊົນແຂວງ ໄດ້ສະຫຼຸບຕີລາຄາຄືນກ່ຽວກັບການເຄື່ອນໄຫວວຽກງານຂອງຄະນະກຳມະການເສດຖະກິດ, ແຜນການ ແລະ ການເງິນ ປະຈຳປີ 2024 ແລະ ທິດທາງແຜນການ ປະຈໍາປີ 2025. ຕະຫຼອດໄລຍະ 1 ປີຜ່ານມາການເຄື່ອນໄຫວວຽກງານວິຊາສະເພາະກໍຄືການປະຕິບັດດ້ານນິຕິກຳ ໃນການສ້າງ ແລະ ປັບປຸງນິຕິກຳໃຕ້ກົດໝາຍ ໂດຍປະສານສົມທົບກັບຄະນະກຳມະການຍຸຕິທຳ, ປກຊ-ປກສ ແລະ ຄະນະກຳມະການອື່ນພາຍໃນສະພາປະຊາຊົນແຂວງ ແລະ ພະແນກການກ່ຽວຂ້ອງເຂົ້າຮ່ວມທາບທາມຮ່າງກົດໝາຍ 13 ສະບັບ.
ກອງປະຊຸມ, ບັນດາຜູ້ເຂົ້າຮ່ວມໄດ້ປະກອບຄຳເຫັນຢ່າງກົງໄປກົງມາກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ການຈັດເກັບລາຍຮັບເຂົ້າງົບປະມານແຫ່ງລັດ, ການຊຸກຍູ້ຫົວໜ່ວຍການຜະລິດເປັນສິນຄ້າ, ການຄຸ້ມຄອງກອງທຶນພັດທະນາບ້ານລົບລ້າງຄວາມທຸກຍາກ ເພື່ອຮັບປະກັນໃຫ້ແກ່ການຈັດຕັ້ງປະຕິບັດວຽກງານໃຫ້ບັນລຸຜົນສຳເລັດເປັນກ້າວໆ.
(ຂ່າວ: ບຸນຈັນ ມະນີໄຊ)