ພິທີປະກາດຍົກຍ້າຍ, ບົ່ງຕົວແຕ່ງຕັ້ງຮັກສາການເລຂາພັກເມືອງ, ຮັກສາການເຈົ້າເມືອງ ແລະ ລະຫວ່າງເລຂາພັກເມືອງ, ເຈົ້າເມືອງຜູ້ເກົ່າ ແລະ ຮັກສາການເລຂາພັກເມືອງ, ຮັກສາການເຈົ້າເມືອງທົ່ງມີໄຊ ແຂວງ ໄຊຍະບູລີ ຜູ້ໃໝ່ ໄດ້ຈັດຂຶ້ນໃນຕອນເຊົ້າຂອງວັນທີ 3 ມັງກອນ 2025 ທີ່ຫ້ອງປະຊຸມໃຫຍ່ຂອງເມືອງ, ເຂົ້າຮ່ວມເປັນກຽດມີ ທ່ານ ພົງສະຫວັນ ສິດທະວົງ ກໍາມະການສູນກາງພັກເລຂາຄະນະບໍລິຫານງານພັກແຂວງເຈົ້າແຂວງ ໄຊຍະບູລີ, ມີຄະນະປະຈໍາພັກແຂວງ, ມີການນໍາຂອງເມືອງ, ພະນັກງານຫຼັກແຫຼ່ງທົ່ວເມືອງເຂົ້າຮ່ວມ.

ໃນພິທີ ທ່ານ ສໍາລານ ສຸວັນນະໂຊດ ກໍາມະການປະຈໍາພັກແຂວງ ຫົວໜ້າຄະນະຈັດຕັ້ງແຂວງ ໄຊຍະບູລີ ໄດ້ຂຶ້ນຜ່ານແຈ້ງການຂອງຫົວໜ້າຄະນະຈັດຕັ້ງສູນກາງພັກ ວ່າດ້ວຍການຍົກຍ້າຍ ແລະ ແຕ່ງຕັ້ງພະນັກງານຮັບໜ້າທີ່ໃໝ່, ຜ່ານຂໍ້ຕົກລົງຂອງທ່ານເຈົ້າແຂວງ ໄຊຍະບູລີ ວ່າດ້ວຍການຍົກຍ້າຍພະນັກງານໄປຮັບໜ້າທີ່ໃໝ່ຄື: ຍົກຍ້າຍ ທ່ານ ກາວີ ເກດດົມລິ ກໍາມະການພັກແຂວງເລຂາພັກເມືອງ, ເຈົ້າເມືອງ ທົ່ງມີໄຊ ໄປປະຈໍາການຢູ່ຫ້ອງການແນວລາວສ້າງຊາດແຂວງ, ຂໍ້ຕົກລົງຂອງກອງພົນທະຫານຮາບທີ 2 ວ່າດ້ວຍການນໍາສົ່ງນາຍທະຫານໄປຮັບໜ້າທີ່ໃໝ່ຢູ່ແຂວງ ໄຊຍະບູລີ ໂດຍນໍາສົ່ງ ທ່ານ ພັນເອກ ສົມດີ ໄຊຍະລາດ ຫົວໜ້າການທະຫານກອງພັນໃຫຍ່ທະຫານຮາບ 202 ກອງພົນທະຫານຮາບທີ 2 ໄປຮັບໜ້າທີ່ໃໝ່ເປັນຮັກສາການເລຂາພັກເມືອງ, ຮັກສາການເຈົ້າເມືອງທົ່ງມີໄຊ, ຂໍ້ຕົກລົງຂອງທ່ານເຈົ້າແຂວງ ໄຊຍະບູລີ ວ່າດ້ວຍການແຕ່ງຕັ້ງຮັກສາການເຈົ້າເມືອງ ທົ່ງມີໄຊ ເຈົ້າແຂວງຕົກລົງແຕ່ງຕັ້ງ ທ່ານ ພັນເອກ ສົມດີ ໄຊຍະລາດ ຫົວໜ້າການທະຫານກອງພັນໃຫຍ່ທະຫານຮາບ 202 ກອງພົນທະຫານຮາບທີ 2 ເປັນຮັກສາການເຈົ້າເມືອງທົ່ງມີໄຊ, ຜ່ານມະຕິຂອງຄະນະປະຈໍາສະພາປະຊາຊົນແຂວງວ່າດ້ວຍການພິຈາລະນາຮັບຮອງເອົາການສະເໜີຍົກຍ້າຍບຸກຄະລາກອນແຂວງ ໄຊຍະບູລີ, ຄະນະປະຈໍາສະພາປະຊາຊົນແຂວງຕົກລົງເຫັນດີຮັບຮອງເອົາການສະເໜີຍົກຍ້າຍ ທ່ານ ກາວີ ເກດດົມລິ ກໍາມະການພັກແຂວງເລຂາພັກເມືອງເຈົ້າເມືອງ ທົ່ງມີໄຊ ໄປປະຈໍາການຢູ່ຫ້ອງການແນວລາວສ້າງຊາດແຂວງຕາມການສະເໜີຂອງທ່ານເຈົ້າແຂວງ ໄຊຍະບູລີ, ຜ່ານມະຕິຂອງຄະນະປະຈໍາພັກແຂວງວ່າດ້ວຍການບົ່ງຕົວແຕ່ງຕັ້ງຮັກສາການເລຂາພັກເມືອງ, ຄະນະປະຈໍາພັກແຂວງຕົກລົງ ບົ່ງຕົວແຕ່ງຕັ້ງ ສະຫາຍ ພັນເອກ ສົມດີ ໄຊຍະລາດ ເປັນຮັກສາການເລຂາພັກເມືອງ ທົ່ງມີໄຊ.

(ຂ່າວ-ພາບ: ອຸ່ນເຮືອນ ໂພທິລັກ)