ຂ່າວສານຫວຽດນາມລາຍງານວ່າ: ເມື່ອບໍ່ດົນມານີ້, ສະຫະພາບເອີຣົບ (ອີຢູ) ຢືນຢັນວ່າການສະ ໜອງອາຍແກັສຂອງບັນດາສະມາຊິກຍັງຄົງຕົວ.

ຂ່າວລະບຸວ່າ: ຖະແຫຼງການດັ່ງກ່າວມີຂຶ້ນໜຶ່ງມື້ຫຼັງຈາກການສົ່ງອອກແກັສທຳມະຊາດຂອງຣັດເຊຍ ຜ່ານທໍ່ສົ່ງອູແກຣນໄປຍັງເອີຣົບ ໄດ້ຖືກຢຸດຕິໃນວັນປີໃໝ່ 2025 ເນື່ອງຈາກສັນຍາການຜ່ານແດນໝົດກຳນົດ.

ໃນຖະແຫຼງການ, ໂປໂລຍ ປະເທດປະທານໝູນວຽນ EU ຢືນຢັນວ່າ: ສະພາບການຍັງຄົງຕົວຢູ່ໃນຂະນະທີ່ບັນດາສະມາຊິກໄດ້ນຳໃຊ້ການສົມທົບກັນກັບຄັງສຳຮອງຂອງລະດູໜາວ ແລະ ການນຳເຂົ້າຈາກບັນດາປະເທດທີ 3, ຊ່ວຍຕອບສະໜອງຄວາມຕ້ອງການ. ເຖິງວ່າໄດ້ມີການປ່ຽນແປງຢ່າງໃຫຍ່ຫຼວງໃນທ່າອ່ຽງການນຳເຂົ້າ, ແຕ່ລາຄາອາຍແກັສຍັງບໍ່ໄດ້ເພີ່ມຂຶ້ນຫຼວງຫຼາຍ. ຄະນະກໍາມະການເອີຣົບກ່າວວ່າໃນປັດຈຸບັນບໍ່ມີຄວາມກັງວົນກ່ຽວກັບການສະໜອງ.

ອີງຕາມຖະແຫຼງການໂປໂລຍ, ສະຖານະການໃນ ມອນດາວີ ແມ່ນໜ້າເປັນຫ່ວງ, ຍ້ອນວ່າໂຮງງານທັງໝົດໃນພາກພື້ນ ທຣານນີສເທຣຍ ໄດ້ຢຸດເຊົາການດໍາເນີນການ. ຄັງສຳຮອງອາຍແກັສໃນເຂດພາກເໜືອຂອງ ທຣານນີສເທຣຍ ແມ່ນພຽງພໍພຽງແຕ່ 10 ມື້. ບໍລິສັດພະລັງງານທ້ອງຖິ່ນຍັງໄດ້ຢຸດການໃຫ້ຄວາມຮ້ອນ ແລະ ການສະໜອງນ້ໍາຮ້ອນຊົ່ວຄາວໃຫ້ແກ່ປະຊາຊົນ.

ເຖິງວ່າອາຍແກັສຈາກຣັດເຊຍກວມເອົາໜ້ອຍກວ່າ 10% ຂອງຄວາມຕ້ອງການນຳເຂົ້າຂອງ EU ໃນປີ 2023, ແຕ່ບາງປະເທດສະມາຊິກພາກຕາເວັນອອກຍັງຂຶ້ນກັບແຫຼ່ງນຳເຂົ້ານີ້.