ຂ່າວຕ່າງປະເທດລາຍງານ ໃນວັນທີ 5 ມັງກອນ ຜ່ານມາ; ອົງການຂົນສົ່ງນະຄອນນິວຢອກ (MTA) ເປີດເຜີຍວ່າ: ໄດ້ບັງຄັບໃຊ້ແຜນການເກັບຄ່າທໍານຽມສຳລັບການສັນຈອນທີ່ແອອັດ ຊຶ່ງກວມເອົາເຂດເມນຮັດຕັນ ລຸ່ມ ແລະ ກາງ ໃນນະຄອນນິວຢອກ ໃນວັນ 5 ມັງກອນ ຜ່ານມາ, ເຮັດໃຫ້ນະຄອນນິວຢອກ ເປັນເມືອງທຳອິດຂອງສະຫະລັດ ອາເມຣິກາ ທີ່ຈະບັງຄັບໃຊ້ແຜນການດັ່ງກ່າວ.

ອົງການ MTA ລະບຸວ່າ: ຈະມີການເກັບຄ່າທຳນຽມກັບພາຫະນະທີ່ເຂົ້າສູ່ເຂດບັນເທົາການຈະລາຈອນແອອັດ (Congestion Relief Zone – CRZ). ໂດຍອັດຕາຄ່າທໍານຽມຈະຂຶ້ນກັບປະເພດຂອງລົດ, ໃນໄລຍະເວລາຂອງມື້, ການຫຼຸດຄ່າທຳນຽມ ແລະ ວິທີການຊໍາລະເງິນທີ່ມີສ່ວນຫຼຸດ ແລະ ຂໍ້ຍົກເວັ້ນ ທີ່ບັງຄັບໃຊ້ກັບຜູ້ຂັບຂີ່ ຫຼື ລົດບາງປະເພດ.

ລົດໂດຍສານ ແລະ ລົດການຄ້າຂະໜາດນ້ອຍ, ລົດບັນທຸກ, ລົດເມ ແລະ ລົດຈັກ ທີ່ເຂົ້າມາໃນເຂດບັນເທົາຄວາມແອອັດ ຈະຖືກເກັບຄ່າທຳນຽມ 1 ຄັ້ງຕໍ່ມື້. ຜູ້ໂດຍສານລົດແທັກຊີ ແລະ ລົດເຊົ່າແມ່ນເກັບຄ່າທຳນຽມສຳລັບການເຂົ້າ-ອອກແຕ່ລະຄັ້ງ ລວມທັງການຢູ່ພາຍໃນ ຫຼື ຂັບລົດຜ່ານເຂດດັ່ງກ່າວ.

ນອກຈາກນີ້, ອັດຕາຄ່າທໍານຽມຍັງຈະຖືກປັບຂຶ້ນໃນປີ 2028 ແລະ 2031 ເນື່ອງຈາກອົງການ MTA ຈະຍົກເລີກສ່ວນຫຼຸດ 40% ທີ່ໄດ້ສະເໜີໃນໄລຍະເລີ່ມຕົ້ນ.

ອົງການ MTA ຄາດວ່າ: ແຜນການກຳນົດຄ່າທຳນຽມດັ່ງກ່າວຈະເຮັດໃຫ້ຈຳນວນລົດທີ່ເຂົ້າສູ່ເຂດດັ່ງກ່າວຫຼຸດລົງ 10% ແລະ ລົດທີ່ຜ່ານເຂດດັ່ງກ່າວຫຼຸດລົງ 5%.

ອົງການ MTA ຍັງຄາດວ່າ: ຈະສາມາດເກັບລາຍຮັບໄດ້ 1 ຕື້ໂດລາຕໍ່ປີ ເພື່ອສະໜັບສະໜູນແຜນການໃຊ້ຈ່າຍເງິນທຶນຂອງຕົນ ຊຶ່ງມີມູນຄ່າເຖິງ 15 ຕື້ໂດລາ.