ໂດຍ: ວັນໄຊ ຕະວິນຍານ

ເມືອງແກ່ນທ້າວ ແຂວງໄຊຍະບູລີ ໄດ້ກໍານົດແຜນພັດະນາເສດຖະກິດ-ສັງຄົມ ຄັ້ງທີ VIII (2025-2029) ໂດຍແນໃສ່ສ້າງບາດລ້ຽວໃໝ່ໃນການພັດທະນາຕາມທິດເສດຖະກິດ-ສັງຄົມ, ພູມປັນຍາສີຂຽວ ແລະ ຍືນຍົງ, ຜະລິດອຸດສາຫະກຳເປັນເສົາຄໍ້າ ແລະ ໂຄງລ່າງພື້ນຖານເສດຖະກິດທີ່ເຂັ້ມແຂງ.

ສໍາລັບການຫັນເປັນອຸດສາຫະກໍາ ແລະ ທັນສະໄໝ, ເສດຖະກິດຕະຫຼາດຕາມທິດສັງຄົມນິຍົມຈະສຸມໃສ່ຈັດຕັ້ງປະຕິບັດຢ່າງເປັນລະບົບຫຼາຍຂຶ້ນ; ສັງຄົມມີຄວາມສະຫງົບສຸກ, ຍຸຕິທຳ, ມີປະຊາທິປະໄຕ ແລະ ສີວິໄລ; ປະຊາຊົນມີຄວາມສາມັກຄີເປັນປຶກແຜ່ນ; ຫຼຸດຜ່ອນຄວາມແຕກໂຕນກັນທາງດ້ານການພັດທະນາລະຫວ່າງຕົວເມືອງ ແລະ ຊົນນະບົດ, ຊັ້ນຄົນຕ່າງໆໃນສັງຄົມຫຍັບໃກ້ເຂົ້າກັນ; ເຮັດໃຫ້ຄຸນນະພາບຊີວິດການເປັນຢູ່ຂອງປະຊາຊົນໄດ້ຮັບການຍົກລະດັບສູງຂຶ້ນ; ຊັບພະຍາກອນມະນຸດໄດ້ຮັບການພັດທະນາມີຄຸນນະພາບດີຂຶ້ນ; ປະຊາຊົນສາມາດເຂົ້າເຖິງການບໍລິການທີ່ມີຄຸນນະພາບຢ່າງທົ່ວເຖິງ;ພົນລະເມືອງມີການຮັບປະກັນດ້ວຍການຄຸ້ມຄອງຂອງລັດຕາມກົດໝາຍທີ່ສັກສິດ, ການປົກຄອງຕາມທິດ 3 ສ້າງມີຄວາມເຂັ້ມແຂງ; ສິ່ງແວດລ້ອມທຳມະຊາດໄດ້ຮັບການປົກປັກຮັກສາ ແລະ ນໍາໃຊ້ຢ່າງມີປະສິດທິພາບ, ມີເຫດຜົນ ແລະ ຍືນຍົງ; ລະບົບການເມືອງປະຊາທິປະໄຕໄດ້ຮັບການປັບປຸງຕາມທິດ ໜັກແໜ້ນ ແລະ ເຂັ້ມແຂງ; ເສດຖະກິດ-ສັງຄົມສາມາດເຊື່ອມໂຍງ ແລະ ເຊື່ອມຈອດກັບຕ່າງເມືອງ, ຕ່າງແຂວງ ແລະ ຕ່າງປະເທດຢ່າງກວ້າງຂວາງ.

ທ່ານ ຄໍາປຸ່ນ ນວນສະບັບ ວ່າການເລຂາພັກເມືອງ ວ່າການເຈົ້າເມືອງແກ່ນທ້າວ ກ່າວຕໍ່ນັກຂ່າວໜັງສືພິມປະຊາຊົນວ່າ: ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII (2025-2029) ແມ່ນເປັນແຜນຈະຕ້ອງໄດ້ສູ້ຊົນສືບຕໍ່ຜັນຂະຫຍາຍ ໄລຍະທ້າຍຂອງວິໄສທັດຮອດປີ 2029 ຊຶ່ງໃນ 5 ປີ ຕໍ່ ໜ້າຕ້ອງໄດ້ສືບຕໍ່ບຸກທະລຸຢ່າງແຂງແຮງໃນການພັດທະນາເສດຖະກິດ-ສັງຄົມ. ສຸມໃສ່ປຸກລະດົມ, ຊຸກຍູ້ກຳລັງແຮງຂອງທຸກພາກສ່ວນເສດຖະກິດ ເພື່ອຂຸດຄົ້ນທ່າແຮງບົ່ມຊ້ອນຂອງເມືອງ ມາຮັບໃຊ້ການພັດທະນາເມືອງ; ແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ; ບັນລຸເປົ້າໝາຍການເຕີບໂຕສີຂຽວ ແລະ ການພັດທະນາແບບຍືນຍົງ (SDGs) ໃນປີ 2029. ສືບຕໍ່ສ້າງເມືອງແກ່ນທ້າວໃຫ້ເປັນເມືອງບໍລິການດ້ານການຄ້າ-ການທ່ອງທ່ຽວ, ອຸດສາຫະກຳປຸງແຕ່ງຜະລິດຕະພັນກະສິກຳ, ລ້ຽງສັດແບບເປັນຟາມໄດ້ມາດຕະຖານຕາມທິດສີຂຽວ ແລະ ຍືນຍົງ. ການສ້າງເສດຖະກິດເອກະລາດເປັນເຈົ້າຕົນເອງໃນໄລຍະໃໝ່: ບຸກທະລຸດ້ານຈິນຕະນາການ, ສ້າງຄວາມຮັບຮູ້ ແລະ ຄວາມເຂົ້າໃຈຂອງທຸກພາກສ່ວນໃນສັງຄົມຕໍ່ການສ້າງຄວາມເປັນເຈົ້າຕົນເອງໃນການພັດທະນາຢ່າງເລິກເຊິ່ງ ເພື່ອຂຸດຄົ້ນ ແລະ ນໍາໃຊ້ທ່າແຮງບົ່ມຊ້ອນຂອງເມືອງໃນສິ່ງທີ່ເຮົາສາມາດເຮັດໄດ້; ວາງແຜນໃນການຂຸດຄົ້ນ, ຄຸ້ມຄອງ ແລະ ນຳໃຊ້ຊັບພະຍາກອນທຳມະຊາດທີ່ມີຢ່າງມີປະສິດທິຜົນ ໃຫ້ອອກມາເປັນທຶນຮອນດ້ວຍຄວາມຮັບຜິດຊອບ ແລະ ມີປະສິດທິຜົນ, ສ້າງໃຫ້ປະຊົນເປັນເຈົ້າຫຼາຍຂຶ້ນ ໃນການພັດທະນາເສດຖະກິດ; ສ້າງມູນຄ່າເພີ່ມຂຶ້ນໃໝ່ຢ່າງບໍ່ຢຸດຢັ້ງ. ພ້ອມກັນນີ້, ກໍຕ້ອງຮູ້ຜະລິດ ແລະ ຊອກຕະຫຼາດເພື່ອສ້າງລາຍຮັບໃຫ້ສົມຄູ່ກັບທ່າແຮງທີ່ມີ.

ຍູ້ແຮງໃຫ້ເຮັດໃຫ້ເສດຖະກິດຂອງເມືອງຂະຫຍາຍຕົວຢ່າງຕໍ່ເນື່ອງໂດຍສະເລ່ຍບໍ່ໃຫ້ຫຼຸດ 7.7% ຕໍ່ປີ, ລວມຍອດມູນຄ່າຜົນຜະລິດຂອງເມືອງໃຫ້ບັນລຸ 2,054.78 ຕື້ກີບ, ສະເລ່ຍໃສ່ຫົວຄົນໜຶ່ງໄດ້ 44.94 ລ້ານກີບຕໍ່ຄົນຕໍ່ປີ ເທົ່າກັບ 2,247 ໂດລາຕໍ່ຄົນຕໍ່ປີ. ໃນນີ້: ຂະແໜງກະສິກໍາ-ປ່າໄມ້ ມີມູນຄ່າການຜະລິດເພີ່ມຂຶ້ນສະເລ່ຍ 3% ຕໍ່ປີ, ກວມເອົາ 27.03%, ຂະແໜງອຸດສາຫະກໍາ-ຫັດຖະກໍາໃຫ້ເພີ່ມຂຶ້ນໃນອັດຕາສະເລ່ຍ 12.4% ຕໍ່ປີ, ກວມເອົາ 31.21%, ຂະແໜງການບໍລິການ ເພີ່ມຂຶ້ນສະເລ່ຍ 9.4% ຕໍ່ປີ; ກວມເອົາ 42.76%.

ທ່ານ ຄໍາປຸ່ນ ນວນສະບັບ ກ່າວຕື່ມວ່າ: ເພື່ອໃຫ້ບັນລຸຕາມຄາດໝາຍດັ່ງກ່າວ ເມືອງຈະຕ້ອງສຸມໃສ່ ສູ້ຊົນຜະລິດເຂົ້າໃຫ້ໄດ້ຫຼາຍກວ່າ 33,210 ໂຕນ, ປູກພືດສະບຽງອາຫານໃນແຕ່ລະປີບໍ່ໃຫ້ຫຼຸດ 14,387.7ໂຕນ, ປູກພືດເປັນສິນຄ້າບໍ່ໃຫ້ລຸດ 562,345 ໂຕນ, ປູກໄມ້ໃຫ້ໝາກບໍ່ໃຫ້ຫຼຸດ 2,850 ໂຕນ;ຫັນການລ້ຽງສັດແບບທຳມະຊາດໄປສູ່ການລ້ຽງແບບເປັນກຸ່ມ, ເປັນຟາມ ເຮັດໃຫ້ຝູງສັດເພີ່ມຂຶ້ນສະເລ່ຍ 9.12% ຕໍ່ປີ; ສະໜອງຜົນຜະລິດຊີ້ນ, ປາ, ໄຂ່ ໃຫ້ໄດ້ 28,668.50 ໂຕນ; ສົ່ງອອກສັດປະເພດງົວ-ຄວາຍ ແລະ ໝູໃຫ້ໄດ້ 47,317 ໂຕຂຶ້ນໄປ; ເອົາໃຈໃສ່ປັບປຸງຫົວງານ, ຄອງເໝືອງ, ປ່ຽນຄອງເໝືອງດິນເປັນຄອງເໝືອງເບຕົງທີ່ຖາວອນສຳລັບບ່ອນທີ່ມີເງື່ອນໄຂ, ຫັນເອົາຈັກສູບນ້ຳໃຫ້ເປັນທັນສະໄໝໂດຍການນຳໃຊ້ພະລັງງານໄຟຟ້າໃຫ້ມີປະສິດຕິຜົນສູງ, ສືບຕໍ່ສ້າງອ່າງເກັບນໍ້າຊົນລະປະທານ. (ໃນນີ້: ຖືເອົາການສ້າງຝາຍນໍ້າລົ້ນ ຫ້ວຍນໍ້າພະນອນ 01, ຫ້ວຍນໍ້າພະນອນ 02 (ບ້ານປົ່ງແດງ) ຝາຍນໍ້າລົ້ມ ຫ້ວຍຄຸງແຮດ (ບ້ານລາດຂາມປ້ອມ) ແລະ ຊົນລະປະທານນໍ້າຊາງ (ບ້ານຫ້ວຍເລິກ) ເປັນບຸລິມະສິດ ໃນການສົ່ງເສີມ ແລະ ລົງທຶນ; ສະໜອງນ້ຳໃຫ້ແກ່ການຜະລິດສະບຽງອາຫານ ແລະ ປູກພືດເປັນສິນຄ້າ ໃນລະດູຝົນໃຫ້ໄດ້ 2,596.41 ເຮັກຕາ/ປີ ແລະ ລະດູແລ້ງ 55.00 ເຮັກຕາ/ປີ, ສູ້ຊົນເຮັດໃຫ້ມູນຄ່າການຜະລິດອຸດສາຫະກໍາປຸງແຕ່ງ ແລະ ຫັດຖະກໍາໃຫ້ຂະຫຍາຍຕົວສະເລ່ຍ 12% ຕໍ່ປີ, ມູນຄ່າການສົ່ງອອກສິນຄ້າໃຫ້ຂະຫຍາຍຕົວສະເລ່ຍ 7% ຕໍ່ປີ, ຄຸ້ມຄອງການນຳເຂົ້າສິນຄ້າຂະຫຍາຍຕົວສະເລ່ຍບໍ່ເກີນ 10% ຕໍ່ປີ, ສູ້ຊົນເຮັດໃຫ້ມູນຄ່າຈໍລະຈອນສິນຄ້າໃຫ້ຂະຫຍາຍຕົວສະເລ່ຍບໍ່ຫຼຸດ 10% ຕໍ່ປີ, ປະລິມານການຂົນສົ່ງຜູ້ໂດຍສານຂະຫຍາຍຕົວ 5% ຕໍ່ປີ, ປະລິມານການຂົນສົ່ງສິນຄ້າຂະຫຍາຍຕົວໃຫ້ບໍ່ຫລຸດ 10% ຕໍ່ປີ; ດຶງດູດນັກທ່ອງທ່ຽວເຂົ້າມາເມືອງແກ່ນທ້າວໃຫ້ໄດ້ 1,000 ຄົນ, ໄລຍະການພັກເຊົານັກທ່ອງທ່ຽວສະເລ່ຍ 3 ວັນຕໍ່ຄົນ, ສຳຫຼວດ, ຈັດສັນກໍານົດຂອບເຂດໃຫ້ໄດ້ຂຶ້ນບັນຊີຮອງຮັບເປັນແຫຼ່ງທ່ອງທ່ຽວຂັ້ນທ້ອງຖິ່ນຈຳນວນ 3 ແຫ່ງ, ສູ້ຊົນຈັດເກັບລາຍຮັບເຂົ້າງົບປະມານ ໃຫ້ໄດ້ 33,571.03 ລ້ານກີບ (ໂຕເລກຄາດຄະເນ 5 ປີ); ດ້ານລາຍຈ່າຍ ສູ້ຊົນບໍ່ໃຫ້ເກີນ 136,544.92 ລ້ານກີບ.