ວັນທີ 27 ຕຸລາ ນີ້ທີ່ສະໂມສອນເມືອງເງິນ ແຂວງໄຊຍະບູລີ ໄດ້ຈັດກອງປະຊຸມເຊື່ອມຊຶມ ແລະ ຜັນຂະຫຍາຍຜົນສໍາເລັດກອງປະຊຸມຄົບຄະນະກາງສະໄໝ ຂອງຄະນະບໍລິຫານງານສູນກາງພັກ(ຄສພ) ສະໄໝທີ XI ໂດຍມີຄະນະບໍລິຫານງານພັກເມືອງ, ຫົວໜ້າ-ຮອງຫົວໜ້າຫ້ອງການ, ກົມກອງ, ດ່ານສາກົນນໍ້າເງິນ, ລັດວິສາຫະກິດ, ອໍານວຍການໂຮງຮຽນ-ໂຮງໝໍ, ທ່ານນາຍບ້ານ ແລະ ພະນັກງານລັດຖະກອນທົ່ວເມືອງເຂົ້າຮ່ວມ. 
    ໃນກອງປະຊຸມ ສະຫາຍ ທະວີສັກ ໄຊຍະວົງ ເລຂາພັກເມືອງ ເຈົ້າເມືອງ-ເມືອງເງິນ ໄດ້ເປັນກຽດຂຶ້ນເຜີຍແຜ່ ເຊື່ອມຊຶມມະຕິກອງປະຊຸມ ຄົບຄະນະກາງສະໄໝ ຂອງຄະນະບໍລິຫານງານສູນກາງພັກ ສະໄໝທີ XI ບົດຄໍາເຫັນຊີ້ນໍາ ຂອງສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດແຫ່ງ ສປປລາວ ຕໍ່ກອງປະຊຸມຄົບຄະນະກາງສະໄໝຂອງຄະນະບໍລິຫານງານສູນກາງພັກສະໄໝ ທີ XI ຮັບຟັງການຕີລາຄາການຈັດຕັ້ງປະຕິບັດ ມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກໃນໄລຍະຜ່ານມາ, ຕີລາຄາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX (2021-2025) ໄລຍະກາງສະໄໝ ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ ແລະ ຜ່ານເອກະສານມະຕິ ວ່າດ້ວຍການສືບຕໍ່ຍູ້ແຮງການຜັນຂະຫຍາຍແນວທາງປ່ຽນແປງໃໝ່ ສູ່ລວງເລິກ, ສ້າງການຫັນປ່ຽນທີ່ແຂງແຮງ ເລິກເຊິ່ງ ແລະ ຮອບດ້ານໃນການນໍາພາຂອງພັກ ສະບັບເລກທີ 05/ຄບສພ, ລົງວັນທີ 5 ກັນຍາ 2023, ຈຸດປະສົງ ກໍເພື່ຶອແນໃສ່ເຮັດໃຫ້ພະນັກງານ, ທະຫານ, ຕໍາຫຼວດ ແລະ ພະນັກງານ-ລັດຖະກອນ ແລະ ທ່ານນາຍບ້ານ ໄດ້ມີຄວາມຮັບຮູ້ເຂົ້າໃຈ, ເຊື່ອມຊຶມ, ກໍາແໜ້ນຢ່າງເລິກເຊິ່ງ ທົ່ວເຖິງ ແລະ ມີຄວາມເປັນເອກະພາບສູງ ຕໍ່ເນື້ອໃນກອງປະຊຸມຄົບຄະນະກາງສະໄໝ ຂອງຄະນະບໍລິຫານງານສູກາງພັກສະໄໝ ທີ XI ເພື່ອແນໃສ່ປະຕິບັດບັນດາຄາດໝາຍສູ້ຊົນ ວຽກງານຈຸດສຸມ ແລະ ແຜນປະຕິບັດງານຢ່າງລະອຽດ ໃນການຜັນຂະຫຍາຍ ໃຫ້ເຂົ້າສູ່ການຈັດຕັ້ງປະຕິບັດຕົວຈິງ ແລະ ມີຜົນສໍາເລັດສູງ.
    ຕອນທ້າຍ, ສະຫາຍ ທະວີສັກໄຊຍະວົງ ໄດ້ມີຄໍາເຫັນຊີ້ນໍາ ກ່ອນອື່ນສະຫາຍໄດ້ຮຽກຮ້ອງມາຍັງຄະນະພັກ ທີ່ຮັບຜິດຊອບແຕ່ລະບ້ານໃນທົ່ວເມືອງ ຕ້ອງໄດ້ພ້ອມກັນນໍາເອົາເນື້ອໃນມະຕິດັ່ງກ່າວ ລົງເຜີຍແຜ່ເຊື່ອມຊຶມ ໃຫ້ອົງການປົກຄອງບ້ານ ແລະ ປະຊາຊົນ ໃຫ້ທົ່ວເຖິງ.
 (ຂ່າວ ເມືອງເງິນ)