ຕາມການລາຍງານຂອງຫົວໜ້າພະແນກພະລັງງານ ແລະ ບໍ່ແຮ່ແຂວງຄໍາມ່ວນ ຕໍ່ສື່ມວນຊົນແຂວງ ໃນວັນທີ 7 ມັງກອນຜ່ານມາ ກ່ຽວກັບຄວາມຄືບໜ້າການຕິດຕາມກວດກາ ສະຖານທີ່ເກີດດິນຍຸບຕົວ ຢູ່ເຂດ ບ້ານປາກເປັ່ງ ເມືອງທ່າແຂກ ແຂວງຄໍາມ່ວນ ນອນໃນເຂດສໍາປະທານໂຄງການຂຸດຄົ້ນ ແລະ ປຸງແຕ່ງແຮ່ເກືອໂປຕາສ ໃນເນື້ອທີ່ 17,980 ເຮັກຕາ ຂອງບໍລິສັດ ຊີໂນ-ອາກຣີ ພັດທະນາບໍ່ແຮ່ ຈຳກັດວ່າ: ປັດຈຸບັນຄະນະທີມງານຕິດຕາມກວດກາ ຮູເຈາະສໍາຫຼວດ, ວັດແທກອຸມົງໃຕ້ດິນ ແລະ ສະຖານທີ່ເກີດດິນຍຸບຕົວ ໄດ້ສຳເລັດການວັດແທກອຸມົງໃຕ້ດິນ, ສຳເລັດການຖົມດິນອັດຂຸມດິນຍຸບຕົວ ແລະ ຕິດຕັ້ງເຄື່ອງເຈາະຈຳນວນ 2 ເຄື່ອງ ແລະ ໄດ້ເລີ່ມດໍາເນີນການຊີເຈາະ ຊຶ່ງເຄື່ອງເຈາະທີ 1 ເຈາະຮອດລະດັບ 10 ແມັດ ແລະ ເຄື່ອງທີ 2 ເຈາະຮອດລະດັບ 20 ແມັດ ເພື່ອສຶກສາເບິ່ງໂຄງສ້າງຂອງດິນ ແລະ ຊອກຫາສາເຫດຂອງການເກີດດິນຍຸບຕົວ. ພາກໜ້າດິນ: ໄດ້ສໍາເລັດການ ສ້າງຈຸດ BM ຢູ່ໃນເຂດສໍາປະທານຂອງບໍລິສັດ ຈໍານວນ 5 ຈຸດ, ສ້າງຮົ້ວກັ້ນເພື່ອປ້ອງກັນຄົນ ຫຼື ສັດ ເຂົ້າໄປໃນບໍລິເວນດິນຍຸບ, ສ້າງຈຸດຕິດຕາມກວດກາການເໜັງຕິງຂອງໜ້າດິນທັງໝົດ 8 ຈຸດ (CJ1 ເຖິງ CJ8) ອ້ອມຮອບບໍລິເວນທີ່ມີສະພາບດິນຍຸບຕົວ; ໄດ້ສໍາເລັດການອັດຖົມດິນຄືນຈຸດດິນຍຸບຕົວ ແລະ ປັບພື້ນທີ່ໃຫ້ເປັນສະພາບໄຮ່ນາຄືນແລ້ວ. ນອກນີ້, ຍັງໄດ້ຈັດກອງປະຊຸມລາຍງານຄວາມຄືບໜ້າການຈັດຕັ້ງປະຕິບັດວຽກງານແກ້ໄຂ ແລະ ແຜນວຽກກວດສອບຫາສາເຫດດິນຍຸບຕົວໃນຕໍ່ໜ້າ ໂດຍມີພາກສ່ວນທີ່ກ່ຽວຂ້ອງຂອງແຂວງ, ເມືອງ ແລະ ອໍານາດການປົກຄອງ ບ້ານ ພ້ອມດ້ວຍຕາງໜ້າບໍລິສັດເຂົ້າຮ່ວມ.

ສໍາລັບຂ່າວລືທີ່ວ່າ: "ລັດຖະບານໃຫ້ບໍລິສັດ ອາຊີ-ໂປ ຕາສ ສາກົນ (ລາວ) ຢຸດຕິກິດຈະກຳການຂຸດຄົ້ນ" ແມ່ນບໍ່ມີມູນຄວາມຈິງ. ນັບແຕ່ເກີດສະພາບການດິນຍຸບສອງຄັ້ງຜ່ານມາ ການຈັດຕັ້ງພາກລັດ, ທັງສູນກາງ ແລະ ທ້ອງຖິ່ນ ໄດ້ມີຄວາມເປັນຫ່ວງເປັນໄຍ, ໃກ້ຊິດຕິດແທດຊີ້ນໍາ ດ້ວຍດີຕະຫຼອດມາ ໂດຍສະເພາະອົງການປົກຄອງແຂວງ ຄໍາມ່ວນ ແລະ ໜ່ວຍງານວິຊາສະເພາະໄດ້ຈັດຕັ້ງປະຕິບັດວຽກງານ ກວດກາຊອກຫາສາເຫດຢ່າງຕັ້ງໜ້າ ແລະ ໃນວັນດຽວກັນ ທ່ານ ວັນໄຊ ພອງສະຫວັນ ເຈົ້າແຂວງ ຄໍາມ່ວນ ພ້ອມດ້ວຍພະແນກການກ່ຽວຂ້ອງ ໄດ້ລົງເຄື່ອນໄຫວຊຸກຍູ້ຕິດຕາມຄວາມຄືບໜ້າການດໍາເນີນງານຊີເຈາະສໍາຫຼວດເພື່ອຊອກຫາສາເຫດດິນຍຸບຕົວ ຢູ່ບໍລິເວນບ່ອນເກີດດິບຍຸບຕົວ (ພາກສະໜາມ) ແລະ ມີຄໍາເຫັນຊີ້ນໍາພາກສ່ວນກ່ຽວຂ້ອງໃຫ້ສືບຕໍ່ເອົາໃຈໃສ່ຈັດຕັ້ງປະຕິບັດດ້ານຫຼັກວິຊາການ, ດ້ານເຕັກນິກຕ່າງໆ ເພື່ອຊອກຫາສາເຫດລະອຽດການເກີດສະພາບດິນຍຸບຕົວ ແລະ ນໍາສະເໜີຕໍ່ປະຊາຊົນກໍຄືສັງຄົມໃຫ້ຮັບຮູ້ໂດຍໄວ.

(ຂ່າວ: ມະນີວັນ)