ໃນວັນທີ 22 ມັງກອນ ນີ້, ກະຊວງແຜນການ ແລະ ການລົງທຶນ ຮ່ວມກັບ ສະພາການຄ້າ ແລະ ອຸດສາຫະກໍາ ແຫ່ງຊາດລາວ, ສູນການຄ້າ ອາຊຽນ-ຍີ່ປຸ່ນ (AJC) ແລະ ອົງການສົ່ງເສີມການຄ້າຍີ່ປຸ່ນ (JETRO) ໄດ້ຈັດກອງປະຊຸມພົບປະທຸລະກິດຂັ້ນສູງແບບໂຕະມົນ ລາວ-ຍີ່ປຸ່ນ ທີ່ ນະຄອນໂຕກຽວ, ປະເທດຍີ່ປຸ່ນ ໂດຍມີແຂກຜູ້ເຂົ້າຮ່ວມຈາກພາກລັດ ເເລະ ພາກທຸລະກິດ ຈໍານວນ 100 ກວ່າທ່ານ. ກອງປະຊຸມພົບປະໄດ້ຮັບກຽດເປັນປະທານໂດຍ ພະນະທ່ານ ສອນໄຊ ສີພັນດອນນາຍົກລັດຖະມົນຕີເເຫ່ງ ສປປ ລາວ ເເລະ ເປັນກຽດເຂົ້າຮ່ວມຂອງບັນດາຜູ້ແທນຂັ້ນສູງ ແລະ ຜູ້ບໍລິຫານຂັ້ນສູງຂອງວິສາຫະກິດ ລາວ ແລະ ຍີ່ປຸ່ນ.

ກອງປະຊຸມພົບປະທຸລະກິດ ລາວ-ຍີ່ປຸ່ນ ໃນຄັ້ງນີ້ຈັດຂຶ້ນໃນບັນຍາກາດແຫ່ງການສະເຫຼີມສະຫຼອງສາຍພົວພັນທາງການທູດ ລາວ-ຍີ່ປຸ່ນ ຄົບຮອບ 70 ປີ ແລະ ໄດ້ເປີດໂອກາດໃຫ້ຜູ້ບໍລິຫານຂັ້ນສູງຂອງວິສາຫະກິດຍີ່ປຸ່ນ ໄດ້ມີຂໍ້ສະເໜີ ແລະ ຄຳຄິດຄຳເຫັນຕໍ່ ການນຳຂັ້ນສູງຂອງລາວ ພ້ອມທັງໃຫ້ນັກທຸລະກິດລາວທີ່ມີທ່າແຮງ ສາມາດພົບປະ ແລະ ແລກປ່ຽນ ຮ່ວມກັບພາກທຸລະກິດຂອງຍີ່ປຸ່ນ ເພື່ອເປັນການສ້າງເງື່ອນໄຂໃຫ້ແກ່ພາກທຸລະກິດຂອງ 2 ປະເທດ ໄດ້ຮູ້ຈັກຊຶ່ງກັນ ແລະ ກັນ ໃຫ້ຫຼາຍຂຶ້ນແລະ ສືບຕໍ່ແລກປ່ຽນຄໍາຄິດເຫັນໃນການສົ່ງເສີມທາງດ້ານທຸລະກິດ, ການຄ້າ ແລະ ການລົງທຶນ ລະຫວ່າງສອງປະເທດ ໃຫ້ເພີ່ມຂຶ້ນໃນຕໍ່ໜ້າ.

ພາຍໃນກອງປະຊຸມ, ພະນະທ່ານ ນາຍົກລັດຖະມົນຕີແຫ່ງ ສປປ ລາວ ໄດ້ຍົກໃຫ້ເຫັນວ່າ: ການສະເຫຼີມສະຫຼອງ ສາຍພົວພັນທາງການທູດ ລາວ-ຍີ່ປຸ່ນ ຄົບຮອບ 70 ປີ ຖືເປັນຂີດໝາຍ ແລະ ໝາກຜົນອັນສໍາຄັນ ພາຍຫຼັງ 2 ປະເທດໄດ້ປະກາດຍົກລະດັບ ສາຍພົວພັນ ແລະ ການຮ່ວມມື ລາວ-ຍີ່ປຸ່ນ ຈາກ “ຄູ່ຮ່ວມມືຍຸດທະສາດ” ເປັນ “ຄູ່ຮ່ວມຍຸດທະສາດຮອບດ້ານ” ປະກອບສ່ວນຢ່າງຕັ້ງໜ້າຕໍ່ການຮ່ວມມືດ້ານເສດຖະກິດ, ການຄ້າ ແລະ ການລົງທຶນ ລະຫວ່າງສອງປະເທດ ໃຫ້ມີບາດກ້າວຂະຫຍາຍຕົວຢ່າງພົ້ນເດັ່ນຍິ່ງຂຶ້ນ ໃນຊຸມປີຕໍ່ໜ້າ. ພ້ອມນັ້ນ, ທ່ານນາຍົກລັດຖະມົນຕີ ໄດ້ເນັ້ນເຖິງບັນດາທ່າແຮງທີ່ເປັນໂອກາດແກ່ການລົງທຶນ ຕາມທິດສີຂຽວຂອງ ສປປ ລາວ ຄືດັ່ງນີ້: ທາງດ້ານພະລັງງານສະອາດ, ການຊື້-ຂາຍສິນເຊື່ອກາກບອນ, ການຜະລິດ ແລະ ປຸງແຕ່ງສິນຄ້າກະສິກຳທີ່ມີຄຸນນະພາບສູງ ແລະອຸດສາຫະກຳປຸງແຕ່ງທີ່ນຳໃຊ້ພະລັງງານສະອາດ.

ໃນກອງປະຊຸມດັ່ງກ່າວ, ທ່ານລັດຖະມົນຕີ ກະຊວງແຜນການ ແລະ ການລົງທຶນ ສປປ ລາວ ໄດ້ລາຍງານຕໍ່ທີ່ປະຊຸມວ່າ: ການລົງທຶນຂອງປະເທດຍີ່ປຸນ, ນັບແຕ່ ສປປ ລາວ ເປີດຮັບເອົາການລົງທຶນຈາກຕ່າງປະເທດ ໃນປີ 1989 ມາຮອດປັດຈຸບັນ (ປີ 2024), ຍີ່ປຸ່ນ ໄດ້ເຂົ້າມາລົງທຶນໃນກິດຈະການສຳປະທານ ແລະ ບັນຊີຄວບຄຸມ ຊຶ່ງບັນລຸໄດ້ທັງໝົດ 93 ໂຄງການ, ລວມມູນຄ່າການລົງທຶນທັງໝົດ 157 ລ້ານກວ່າໂດລາຊຶ່ງການລົງທຶນຂອງປະເທດຍີ່ປຸ່ນແມ່ນຈັດຢູ່ອັນດັບ 14 ຈາກຈໍານວນ 53 ປະເທດທີ່ເຂົ້າມາລົງທຶນ ຢູ່ ສປປ ລາວ. ນອກນັ້ນ, ທ່ານ ຍັງໄດ້ຖືໂອກາດນີ້ ແຈ້ງຕໍ່ຝ່າຍຍີ່ປຸ່ນ ຕື່ມອີກວ່າ: ລັດຖະບານ ສປປ ລາວ ແມ່ນໄດ້ສໍາເລັດການປັບປຸງກົດໝາຍວ່າດ້ວຍການສົ່ງເສີມການລົງທຶນ ທີ່ຮັບຮອງໂດຍ ສະພາແຫ່ງຊາດ ແລະ ໄດ້ປະກາດນຳໃຊ້ຢ່າງເປັນທາງການ ໃນທ້າຍປີ 2024 ເພື່ອສືບຕໍ່ປັບປຸງສະພາບແວດລ້ອມການດຳເນີນທຸລະກິດ ແລະ ການລົງທຶນໃຫ້ດີຂຶ້ນ ໂດຍໄດ້ຕັດ ຂອດ-ຂັ້ນ ທີ່ບໍ່ຈຳເປັນອອກ ແລະ ປັບປຸງບັນດາກົນໄກ ແລະລະບຽບການໃຫ້ສະດວກ ແລະ ງ່າຍດາຍຂຶ້ນ ໂດຍແນໃສ່ຫຼຸດໄລຍະເວລາ ກໍຄືຕົ້ນທຶນໃນການດຳເນີນທຸລະກິດຢູ່ໃນສປປ ລາວ.

ພາຍໃນກອງປະຊຸມ, ທ່ານລັດຖະມົນຕີ ກະຊວງ ອຸດສາຫະກຳ ແລະ ການຄ້າ ສປປ ລາວ ຍັງໄດ້ນຳສະເໜີວ່າ: ມູນຄ່າການຄ້າ 2 ຝ່າຍໃນໄລຍະຜ່ານໆມາ ນັບແຕ່ປີ 2018 ເຖິງປັດຈຸບັນ ມີມູນຄ່າການຄ້າ ລວມຫຼາຍກວ່າ 1 ພັນລ້ານໂດລາ. ສະເພາະ ປີ 2024 ມູນຄ່າການຄ້າສອງຝ່າຍ ຫຼາຍກວ່າ 255 ລ້ານໂດລາ ຊຶ່ງເພີ່ມຂຶ້ນ ປະມານ 10.40% ທຽບກັບປີ 2023. ສິນຄ້າຫຼັກທີ່ມີການຊື້-ຂາຍຫຼາຍກວ່າໝູ່ ລະຫວ່າງ ລາວ ແລະ ຍີ່ປຸ່ນ ແມ່ນສິນຄ້າປະເພດເຄື່ອງນຸ່ງຮົ່ມ, ເຄື່ອງໃຊ້ໄຟຟ້າ, ອຸປະກອນເຄື່ອງໃຊ້ໄຟຟ້າ, ພາຫະນະທາງບົກ, ອຸປະກອນກົນຈັກ, ເສັ້ນໄຍສັງເຄາະ ແລະ ອື່ນໆ.

ໃນວາລະສຸດທ້າຍຂອງກອງປະຊຸມ ທ່ານນາຍົກລັດຖະມົນຕີ ໄດ້ເປີດໂອກາດໃຫ້ ບັນດາ ບໍລິສັດຊັ້ນນໍາຂອງ ຍີ່ປຸ່ນ ປະກອບຄຳຄິດຄຳເຫັນຕໍ່ກອງປະຊຸມ ເເລະ ຖືເອົາໂອກາດນີ້ໃຫ້ທິດຊີ້ນຳ ກ່ຽວກັບ ນະໂຍບາຍ ຂອງລັດຖະບານ ຕໍ່ກັບການລົງທຶນຂອງຕ່າງປະເທດ ຊຶ່ງໄດ້ສ້າງຄວາມໝັ້ນໃຈໃຫ້ແກ່ວິສາຫະກິດຍີ່ປຸ່ນໃນການຕັດສິນໃຈມາລົງທຶນຢູ່ ສປປ ລາວ ໃຫ້ຫຼາຍຂຶ້ນ.

ຂ່າວ-ພາບ: ກະຊວງການຕ່າງປະເທດ