ໂດຍ: ວັນເພັງ

ແຂວງຄໍາມ່ວນ ເປັນແຂວງໜຶ່ງທີ່ມີສະຖານທີ່ທ່ອງທ່ຽວຫຼາກຫຼາຍແຫ່ງທີ່ສວຍງາມ ແລະ ມີຊື່ສຽງມີທັງແຫຼ່ງທ່ອງທ່ຽວທໍາມະຊາດ, ປະຫວັດສາດ ແລະ ວັດທະນະທໍາໂດຍຖືເອົາການພັດທະນາ ແລະ ຊຸກຍູ້ສົ່ງເສີມການທ່ອງທ່ຽວໃຫ້ມີການເຕີບໃຫຍ່ຂະຫຍາຍຕົວຢ່າງຕໍ່ເນື່ອງ ເພື່ອດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດ ໂດຍໄດ້ຈັດຕັ້ງປະຕິບັດບັນດາມາດຕະການພັດທະນາ ແລະ ສົ່ງເສີມການທ່ອງທ່ຽວຕ່າງໆ ສາມາດໂຄສະນາດຶງດູດນັກທ່ອງທ່ຽວເປັນຢ່າງດີ ຊຶ່ງເຫັນວ່າໃນປີ 2024 ມີນັກທ່ອງທ່ຽວເຂົ້າມາທ່ອງທ່ຽວຢ້ຽມຢາມເຖິງ 852,080 ຄົນ.

ໃນໂອກາດກົມໂຄສະນາການທ່ອງທ່ຽວ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ(ຖວທ) ສປປ ລາວ ຮ່ວມກັບສໍານັກຂ່າວໜັງສືພິມ, ໂທລະພາບ ແລະ ສື່ອອນລາຍຈາກສະມາຄົມນັກຂ່າວໄທໄດ້ຈັດກິດຈະກຳຢ້ຽມຢາມຜະລິດຕະພັນການທ່ອງທ່ຽວຢູ່ແຂວງຄໍາມ່ວນ ແລະ ສະຫວັນນະເຂດໃນລະຫວ່າງວັນທີ 25-30 ມັງກອນ 2025, ທ່ານ ສົມສັກດາ ແກ້ວມະນີ ຮອງຫົວໜ້າພະແນກ(ຖວທ) ແຂວງຄໍາມ່ວນ ຜູ້ຊີ້ນໍາວຽກງານທ່ອງທ່ຽວໄດ້ໃຫ້ສຳພາດກ່ຽວກັບການພັດທະນາ ແລະ ສົ່ງເສີມການທ່ອງທ່ຽວຂອງແຂວງຄໍາມ່ວນວ່າ: ເພື່ອເປັນການດຶງດູດການທ່ອງທ່ຽວຂອງແຂວງໃຫ້ດີຂຶ້ນພະແນກ ຖວທ ໄດ້ເອົາໃຈໃສ່ຊຸກຍູ້ພາກລັດ ແລະ ເອກະຊົນພັດທະນາກິດຈະກຳການທ່ອງທ່ຽວໃຫ້ມີຄວາມຫຼາກຫຼາຍເປັນທາງເລືອກໃຫ້ນັກທ່ອງທ່ຽວ. ໃນນັ້ນ, ກິດຈະກຳທີ່ໄດ້ຮັບຄວາມນິຍົມ ແລະ ເປີດບໍລິການແລ້ວໃນປັດຈຸບັນມີ: ການຂີ່ສະລິງ, ປີນຜາ, ລ່ອງເຮືອ, ຕັ້ງແຄ້ມ, ໂຮມສະເຕ, ຍ່າງປ່າ ແລະ ວົງຈອນເດິລຸບ. ນອກຈາກນັ້ນ, ຍັງໄດ້ເປັນເຈົ້າການປະສານສົມທົບກັບພາກສ່ວນທີ່ກ່ຽວຂ້ອງຈັດກິດຈະກຳສົ່ງເສີມການທ່ອງທ່ຽວຢູ່ພາຍໃນແຂວງຂຶ້ນຫຼາຍຄັ້ງເຊັ່ນ: ຈັດການແຂ່ງຂັນກິລາສົກມວຍ 1 ຄັ້ງ, ມີຜູ້ເຂົ້າຮ່ວມ 2,000 ກວ່າຄົນ, ຈັດການແຂ່ງຂັນກິລາເຕະບານມິດຕະພາບລາວ-ໄທ ກັບທີມງານອໍສະຕາ 1 ຄັ້ງ, ມີຜູ້ເຂົ້າຮ່ວມ 3,000 ກວ່າຄົນ, ຈັດການແຂ່ງຂັນກິລາເຕະບານມິດຕະພາບລາວ-ໄທ ທ່າແຂກ-ສະກົນນະຄອນ 1 ຄັ້ງ, ມີຜູ້ເຂົ້າຮ່ວມ 500 ກວ່າຄົນ, ຈັດງານກິລາປັ່ນລົດຖີບມິດຕະພາບລາວ-ໄທ 5 ຄັ້ງ, ມີຜູ້ເຂົ້າຮ່ວມ 2,500 ກວ່າຄົນ,ຈັດງານເທດສະການອາຫານ, ວາງສະແດງ ແລະ ຈຳໜ່າຍສິນຄ້າທ້ອງຖິ່ນ 5 ຄັ້ງ, ມີຜູ້ເຂົ້າຮ່ວມ 5,000 ກວ່າຄົນ,ຈັດງານກິລາ "ໜຶ່ງຄົນລອຍ ຫຼາຍຄົນໃຫ້” 1 ຄັ້ງ, ມີຜູ້ເຂົ້າຮ່ວມ 3,000 ກວ່າຄົນ, ເປັນເຈົ້າພາບຈັດກອງປະຊຸມ 3 ແຂວງ 3 ປະເທດ ຮ່ວມມືທາງດ້ານການທ່ອງທ່ຽວ 1 ຄັ້ງ, ມີຜູ້ເຂົ້າຮ່ວມ 700 ກວ່າຄົນ, ໄດ້ຕິດຕໍ່ຮ່ວມມືກັບຢູທູບເບີ້ ຊື່ດັງຂອງປະເທດໄທສ້າງສາລະຄະດີທ່ອງທ່ຽວຂອງແຂວງໂຄສະນາທາງຊ່ອງເຟສບຸກ (Facbook), ຢູທູບ (Youtube) ໄດ້ 15 ຕອນ. ພາຍຫຼັງລັດຖະບານໄດ້ກຳນົດເອົາປີ 2024 ເປັນປີທ່ອງທ່ຽວລາວ ແຂວງຄໍາມ່ວນໄດ້ກຳນົດເອົາ 27 ກິດຈະກຳສົ່ງເສີມການທ່ອງທ່ຽວຂອງແຂວງ ຊຶ່ງມີ 1 ກິດຈະກຳລະດັບຊາດ, 2 ກິດຈະກຳລະດັບແຂວງ ແລະ 24 ກິດຈະກຳລະດັບເມືອງ ຕິດພັນກັບ 3 ຍອດຍິ່ງທາງທຳມະຊາດ, ວັດທະນະທຳ ແລະ ປະຫວັດສາດ, ການຈັດຕັ້ງປະຕິບັດໄດ້ສຳເລັດໄປແລ້ວ 25 ກິດຈະກຳກວມເອົາ 93%. ຜ່ານການຈັດຕັ້ງປະຕິບັດບັນດາມາດຕະການສົ່ງເສີມການທ່ອງທ່ຽວຕ່າງໆ ສາມາດໂຄສະນາດຶງດູດການທ່ອງທ່ຽວຂອງແຂວງດ້ວຍຜົນສໍາເລັດອັນຈົບງາມ, ຈໍານວນນັກທ່ອງທ່ຽວທີ່ເຂົ້າມາຢ້ຽມຢາມແຂວງຄໍາມ່ວນ ໃນປີ 2024 ມີເຖິງ 852,080 ຄົນ, ສ້າງລາຍຮັບໄດ້ 1,012 ຕື້ກວ່າກີບ ທຽບໃສ່ແຜນການ (500,000 ຄົນ) ແມ່ນລື່ນແຜນ 170%.

ທ່ານ ສົມສັກດາ ແກ້ວມະນີ ກ່າວຕື່ມວ່າ: ສ່ວນແຫຼ່ງທ່ອງທ່ຽວໄດ້ຮັບຄວາມນິຍົມຫຼາຍແມ່ນແຫຼ່ງທ່ອງທ່ຽວທຳມະຊາດ, ປະຫວັດສາດ ແລະ ວັດທະນະທຳເຊັ່ນ: ພະທາດສີໂຄດຕະບອງ, ຖໍ້າກອງລໍ, ພູຜາມ່ານ, ຂຸນກອງແລງ, ຖ້ຳນາງແອ່ນ, ທ່າຝຣັ່ງ, ກຳແພງຍັກ, ຖໍ້ານໍ້າລອດເຊບັ້ງໄຟ, ວົງຈອນເດິລຸບ ແລະ ອື່ນໆ. ມາຮອດປັດຈຸບັນທົ່ວແຂວງມີແຫຼ່ງທ່ອງທ່ຽວທີ່ໄດ້ຂຶ້ນບັນຊີໄວ້ແລ້ວຈໍານວນ 210 ແຫ່ງ.ໃນນັ້ນ, ມີແຫຼ່ງທ່ອງທ່ຽວທໍາມະຊາດ 145 ແຫ່ງ, ແຫຼ່ງທ່ອງທ່ຽວວັດທະນະທໍາ 33 ແຫ່ງ ແລະ ແຫຼ່ງທ່ອງທ່ຽວປະຫວັດສາດ 32 ແຫ່ງ, ເປີດນໍາໃຊ້ແລ້ວ 87 ແຫ່ງ,ພັດທະນາ ແລະ ເປີດຢ່າງເປັນທາງການແລ້ວ 25 ແຫ່ງ,ມີໂຮງແຮມ 24 ແຫ່ງ, ເຮືອນພັກ 105 ແຫ່ງ, ຣີສອດ 10 ແຫ່ງ, ຮ້ານອາຫານ-ກິນດື່ມ 189 ແຫ່ງ, ຮ້ານບັນເທີງ-ຄາຣາໂອເກະ 19 ແຫ່ງ, ບໍລິສັດທ່ອງທ່ຽວ 7 ແຫ່ງ.

ໂອກາດນີ້, ທ່ານ ສົມສັກດາ ແກ້ວມະນີ ກ່າວຕື່ມວ່າ: ເພື່ອເປັນການສືບຕໍ່ເຮັດໃຫ້ການທ່ອງທ່ຽວຂອງແຂວງຄໍາມ່ວນມີການຂະຫຍາຍຕົວໃນປີ 2025 ນີ້, ພະແນກ ຖວທ ຈະຕ້ອງເອົາໃຈໃສ່ປັບປຸງບູລະນະແຫຼ່ງທ່ອງທ່ຽວທີ່ມີການບໍລິການແລ້ວໃຫ້ດີຂຶ້ນ ແລະ ພັດທະນາແຫຼ່ງທ່ອງທ່ຽວແຫ່ງໃໝ່ ແລະ ເປີດບໍລິການຕື່ມອີກ, ສ້າງຜະລິດຕະພັນການທ່ອງທ່ຽວໃໝ່ທີ່ມີຄວາມຫຼາກຫຼາຍຮັບປະກັນຄຸນນະພາບ ແລະ ປັບປຸງການບໍລິການໃຫ້ດີຂຶ້ນ. ສືບຕໍ່ປະສານສົມທົບຮ່ວມມືກັບພາກລັດ ແລະ ພາກທຸລະກິດຈັດກິດຈະກຳສົ່ງເສີມການທ່ອງທ່ຽວໃຫ້ມີຄວາມຫຼາກຫຼາຍສີສັນ ທີ່ຕິດພັນກັບການອະນຸລັກຮີດຄອງປະເພນີຂອງທ້ອງຖິ່ນ; ປັບປຸງບັນດາໂຄງລ່າງພື້ນຖານພາຍໃນແຫຼ່ງທ່ອງທ່ຽວໃຫ້ມີຄວາມສະດວກສະບາຍ ແລະ ສວຍງາມ, ສ້າງຄວາມປະທັບໃຈ, ມີຄວາມປອດໄພ ແລະ ສາມາດດຶງດູດນັກທ່ອງທ່ຽວໃຫ້ໄດ້ຫຼາຍຂຶ້ນ; ຫັນລະບົບການເກັບລາຍຮັບຈາກການທ່ອງທ່ຽວໃຫ້ທັນສະໄໝ, ຮັບປະກັນຄວາມໂປງໃສ, ແກ້ໄຂປະກົດການຫຍໍ້ທໍ້ທີ່ສົ່ງຜົນກະທົບຕໍ່ການທ່ອງທ່ຽວໃຫ້ຫຼຸດໜ້ອຍຖອຍລົງເທື່ອລະກ້າວ.