ກອງປະຊຸມໃຫຍ່ ຜູ້ແທນອົງຄະນະພັກເມືອງປາກແຊງ ແຂວງຫຼວງພະບາງ ຄັ້ງທີ VII ໄດ້ໄຂຂຶ້ນ ໃນຕອນເຊົ້າຂອງວັນທີ່ 13 ກຸມພານີ້ ທີ່ສະໂມສອນຫຼັງໃໝ່ຂອງເມືອງ, ມີສະຫາຍ ຄໍາຂັນ ຈັນທະວີສຸກ ກຳມະການສູນກາງພັກ ເລຂາຄະນະບໍລິຫານງານພັກແຂວງຫຼວງພະບາງ ພ້ອມດ້ວຍຜູ້ແທນຮັບເຊີນ ແລະ ຜູ້ແທນສົມບູນ ຈຳນວນ 112 ສະຫາຍ ຍີງ 7 ສະຫາຍ ທີ່ເປັນຕົວແທນໃຫ້ແກ່ສະມາຊິກພັກ ໃນທົ່ວເມືອງຫຼາຍກວ່າ 1,400 ສະຫາຍ ເຂົ້າຮ່ວມ.
ສະຫາຍ ດວງເພັດ ຢວນໄຊສົມແພງ ຮັກສາການແທນເລຂາພັກເມືອງປາກແຊງ ໄດ້ຂຶ້ນກ່າວໄຂກອງປະຊຸມວ່າ: ກອງປະຊຸມໃຫຍ່ ຄັ້ງນີ້, ມີໜ້າທີ່ຄົ້ນຄວ້າ ແລະ ຮັບຮອງເອົາລາຍງານການເມືອງ ແລະແຜນພັດທະນາເສດຖະກິດ-ສັງຄົມ ຂອງເມືອງ ໄລຍະ 2025-2029 ແລະ ບົດສໍາຫຼວດການນຳພາລວມຂອງຄະນະພັກ ພ້ອມກັນນັ້ນ ຈະໄດ້ເລືອກຕັ້ງເອົາຄະນະບໍລິຫານງານພັກເມືອງຊຸດໃໝ່ ເພື່ອສືບຕໍ່ ນຳພາຊີ້ນຳ ພາລະກິດໃນການປົກປັກຮັກສາ ແລະ ສ້າງສາພັດທະນາເມືອງປາກແຊງ ໃຫ້ກ້າວຂຶ້ນຢ່າງຕໍ່ເນື່ອງສູ່ຈຸດໝາຍທີ່ວາງໄວ້. ຈາກນັ້ນ, ສະຫາຍ ທອງສີງ ໄຊຍະສຸກ ຮອງເລຂາພັກເມືອງ ໄດ້ຂຶ້ນຜ່ານຮ່າງບົດລາຍງານການເມືອງ ຊຶ່ງຜ່ານມາອົງຄະນະພັກເມືອງ ໄດ້ຕັ້ງໜ້າສຶກສາອົບຮົມການເມືອງ-ແນວຄິດ, ເຊື່ອມຊຶມບັນດາເອກະສານສຳຄັນຂອງພັກ ດ້ວຍຫຼາຍຮູບການຢ່າງເປັນປົກກະຕິ ອັນໄດ້ເຮັດໃຫ້ສະມາຊິກພັກ, ພະນັກງານ, ປະຊາຊົນບັນດາເຜົ່າໄດ້ຮັບຮູ້ ແລະ ເຂົ້າໃຈ ຕໍ່ແນວທາງປ່ຽນແປງໃໝ່ຢ່າງມີຫຼັກການ ຂອງພັກແຕ່ລະໄລຍະ; ດ້ານວິຊາສະເພາະ ຢູ່ພາຍໃນ ແລະ ຕ່າງປະເທດ ທັງໄລຍະສັ້ນ ແລະ ໄລຍະຍາວທັງໝົດ 109 ສະຫາຍ, ຍິງ 28 ສະຫາຍ ຕາມແຜນກໍານົດສ້າງແຕ່ລະໄລຍະ ຕາມທິດຫັນເປັນໜຸ່ມ, ຜ່ານຝຶກຝົນຫຼໍ່ຫຼອມ ແລະ ທົດສອບໃນຂະບວນການວຽກງານຕົວຈິງ ໄດ້ມີການຈັດວາງ, ຊັບຊ້ອນໃຫ້ ເໝາະສົມກັບຄວາມຮູ້-ຄວາມສາມາດ ແລະ ປະສົບການຕົວຈິງ ຕິດພັນກັບການປະຕິບັດນະໂຍບາຍ ຕາມລະບຽບການຢ່າງເໝາະສົມ. ວຽກງານກວດກາ ໄດ້ຮັບການປັບປຸງເຂັ້ມແຂງກວ່າເກົ່າ, ສາມາດແກ້ໄຂປະກົດການຫຍໍ້ທໍ້, ຄໍາຮ້ອງ-ຄໍາສະເໜີ ຂອງບຸກຄົນ ແລະ ການຈັດຕັ້ງ ທີ່ສວຍໂອກາດລະເມີດລະບຽບກົດໝາຍ ຫຼຸດລົງເປັນກ້າວໆ.
ກອງປະຊຸມຄັ້ງນີ້, ດໍາເນີນພາຍໃຕ້ຄໍາຂວັນ “ປັບປຸງການນໍາພາຂອງຄະນະໜ່ວຍພັກໃຫ້ເຂັ້ມແຂງ, ໜັກແໜ້ນ, ສ້າງເງື່ອນໄຂໃຫ້ເມືອງປາກແຊງ ເປັນເມືອງພົ້ນທຸກ, ຊຸກຍູ້ການລ້ຽງສັດໃຫຍ່, ປູກພືດອຸດສາຫະກໍາເປັນສິນຄ້າ ຕາມທິດສີຂຽວ ແລະ ຍືນຍົງ”, ຊຶ່ງພາຍຫຼັງສໍາເລັດການຜ່ານຮ່າງບົດລາຍງານການເມືອງທັງສອງພາກ, ຜູ້ເຂົ້າຮ່ວມໄດ້ຮັບຟັງການຜ່ານແຜນພັດທະນາເສດຖະກິດ-ສັງຄົມ, ການປະກອບຄຳເຫັນຈາກຕົວແບບແຕ່ລະດ້ານ, ທັງຈະໄດ້ຮັບຟັງການຜ່ານບົດສຳຫຼວດການນຳພາລວມ ຂອງຄະນະບໍລິຫານງານພັກເມືອງ ສະໄໝທີ່ VI.
(ຂ່າວ: ອາພຸດເດດ ບຸບຜາ, ພາບ: ທະນູສີນ ອິດທິພົນ)
