ກອງປະຊຸມໃຫຍ່ຜູ້ແທນຄັ້ງທີ VIII ຂອງອົງຄະນະພັກ ເມືອງບໍ່ແຕນ ແຂວງໄຊຍະບູລີ ໄດ້ໄຂຂຶ້ນຢ່າງເປັນທາງການໃນວັນທີ 13 ກຸມພານີ້ ທີ່ຫ້ອງປະຊຸມໃຫຍ່ຂອງເມືອງ, ໂດຍການເປັນປະທານຂອງ ສະຫາຍ ບຸນພະລັງ ວິໄລສັກ ວ່າການເລຂາພັກເມືອງ ວ່າການເຈົ້າເມືອງ, ເຂົ້າຮ່ວມເປັນກຽດມີ ສະຫາຍ ພົງສະຫວັນ ສິດທະວົງ ກໍາມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງໄຊຍະບູລີ, ມີແຂກຮັບເຊີນ ແລະ ຜູ້ແທນສົມບູນ 103 ສະຫາຍ ຍິງ 7 ສະຫາຍ ທີ່ເປັນຕົວແທນໃຫ້ແກ່ສະມາຊິກພັກທົ່ວເມືອງ 983 ສະຫາຍ.

ກອງປະຊຸມ, ໄດ້ສະຫຼຸບຕີລາຄາຄືນສະພາບການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ VII ຂອງອົງຄະນະພັກເມືອງໃນ 5 ປີຜ່ານມາ. ໃນນີ້, ໄດ້ເອົາໃຈໃສ່ວຽກງານປ້ອງກັນຊາດ-ປ້ອງກັນຄວາມສະຫງົບເປັນວຽກງານທີ່ສຳຄັນ, ອັນໄດ້ເຮັດໃຫ້ທົ່ວເມືອງມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ, ໄດ້ຫັ້ນເອົາພະນັກງານລົງກໍ່ສ້າງຮາກຖານການເມືອງຕາມ 4 ເນື້ອໃນ 4 ຄາດໝາຍ, ເຮັດໃຫ້ເສດຖະກິດ-ສັງຄົມມີການຂະຫຍາຍຕົວຢ່າງຕໍ່ເນື່ອງສະເລ່ຍ 5.5% ຕໍ່ປີ. ໃນ​ນີ້, ຂະ​ແໜງກະສິ​ກຳຂະຫຍາຍຕົວ 5%, ຂະ​ແໜງ​ອຸດ​ສາ​ຫະ​ກຳຂະຫຍາຍຕົວ 5%, ຂະແໜງ​ບໍ​ລິ​ການຂະ​ຫຍາຍ​ຕົວ 6%, ລວມຍອດຜະລິດຕະພັນພາຍໃນ ມາຮອດປັດຈຸບັນບັນລຸ 509.98 ຕື້ກີບ ສະເລ່ຍໃສ່ຫົວຄົນໄດ້ 26.07 ລ້ານກີບ ຕໍ່ຄົນຕໍ່ປີ, ການຈັດເກັບລາຍຮັບເຂົ້າງົບປະມານໄດ້ທັງໝົດ 15.50 ຕື້ກີບ ທຽບໃສ່ແຜນການປະຕິບັດໄດ້ 122%, ຄຸ້ມຄອງລາຍຈ່າຍ ປະຕິບັດໄດ້ 11.44 ຕື້ກີບ ເທົ່າກັບ 99%, ການສົ່ງ​ອອກສິນຄ້າ​ຜະ​ລິດ​ຕະ​ພັນ​ກະ​ສິ​ກຳ ປະຕິບັດໄດ້ 56.65 ຕື້ກວ່າກີບ, ການນໍາເຂົ້າສີນຄ້າປະຕິບັດໄດ້ 4.21 ຕື້ກວ່າກີບ, ການ​ລົງ​ທຶນ​ທົ່ວ​ສັງ​ຄົມທັງ​ໝົດ 91 ຕື້ກວ່າກີບ. ໃນນີ້, ທຶນຂອງລັດກວມເອົາ 5%, ທຶນກູ້ຢືມ ແລະ ຊ່ວຍເຫຼືອທາງການເພື່ອການພັດນາຈາກຕ່າງປະເທດ ກວມເອົາ 6.16%, ທຶນຂອງເອກະຊົນພາຍໃນ ແລະ ຕ່າງປະເທດ ກວມເອົາ 88.84%. ການ​ລ້ຽງ​ສັດໄດ້ຫັນໄປສູ່ການລ້ຽງແບບເປັນກຸ່ມ ຕິດພັນກັບການປູກຫຍ້າ ແລະ ດູແລຮັກສາສຸຂະພາບສັດ ເຮັດໃຫ້ຝູງສັດຂະ​ຫຍາຍ​ຕົວ ​ເພີ່ມ​ຂຶ້ນ​ສະ​ເລ່ຍ 8% ຕໍ່​ປີ, ສາມາດຜະລິດຊີ້ນ, ປາ ແລະ ໄຂ່ ໄດ້ທັງໝົດ 1,310.82 ໂຕນ ສະເລ່ຍໃສ່ຫົວຄົນໄດ້ 67 ກິໂລຕໍ່ຄົນຕໍ່ປີ; ສິ່ງທີ່ພົ້ນເດັ່ນແມ່ນສາມາດສົ່ງອອກສັດໃຫຍ່ເປັນສິນຄ້າ ສະເລ່ຍ 16,395 ໂຕຕໍ່ປີ, ສາມາດຜະລິດເຂົ້າໄດ້ທັງໝົດ 12 ພັນກວ່າໂຕນ ສະເລ່ຍໃສ່ຫົວຄົນໄດ້ 568 ກິໂລ/ຄົນ/ປີ, ການປູກພືດເປັນສິນຄ້າ ໄດ້ມີທ່າອ່ຽງເພີ່ມຂຶ້ນ ສິ່ງທີ່ພົ້ນເດັ່ນແມ່ນຂະບວນການປູກຢາງພາລາ. ປັດຈຸບັນ ສາມາດຂີດຢາງໄດ້ແລ້ວ 418 ເຮັກຕາ ກວມເອົາ 81%. ກອງປະຊຸມ​ຄັ້ງນີ້, ຍັງຈະ​ໄດ້​ປ່ອນບັດ​ເລືອກ​ຕັ້ງ​ເອົາ​ຄະນະ​ບໍລິຫານ​ງານ​ພັກ​ເມືອງ​ຊຸດ​ທີ VIII, ​​ເລືອກ​ຕັ້ງ​ເອົາຄະນະ​ປະ​ຈໍາ​ພັກ​ເມືອງ, ​ເລຂາ, ຮອງ​ເລຂາ​ ​ແລະ ປະທານ, ຮອງປະທານ​ກວດກາ​ພັກ, ​ພ້ອມທັງດໍາ​ເນີນ​ການ​ປ່ອນ​ບັດ​ຄັດ​ເລືອ​ກ​ເອົາຜູ້ແທນທີ່ເປັນຕົວແທນໃຫ້ແກ່ອົງຄະນະພັກເມືອງ​ຈະໄປ​ຮ່ວມ​ກອງປະຊຸມ​ໃຫຍ່​ຄັ້ງ​ທີ VIII ຂອງອົງຄະນະ​ພັກ​ແຂວງ ແລະ ກອງປະຊຸມຈະໄດ້ດຳເນີນໄປເປັນເວລາ 2 ວັນ ຈິ່ງສຳເລັດ.

(ຂ່າວ-ພາບໂດຍ: ອຸ່ນເຮືອນ ໂພທິລັກ)