ເມື່ອບໍ່ດົນມານີ້, ຢູ່ທີ່ຫ້ອງປະຊຸມຫ້ອງວ່າການເມືອງເງິນ ແຂວງໄຊຍະບູລີ ໄດ້ຈັດພິທີລົງນາມບັນທຶກຂໍ້ຕົກລົງຄວາມເຂົ້າໃຈແຜນການສະໜັບສະໜູນດຳເນີນໂຄງການພັດທະນາເສດຖະກິດ-ສັງຄົມ ເມືອງເງິນ ປີ 2025 ພາຍໃຕ້ການເປັນປະທານຂອງ ທ່ານ ທະວີສັກ ໄຊຍະວົງ ເຈົ້າເມືອງໆເງິນ, ມີທ່ານ ຄະທາຍຸດ ຊູພູນ ຜູ້ອຳນວຍການໃຫຍ່ບໍລິສັດ ໄຟຟ້າຫົງສາ ຈໍາກັດ ແລະ ພາກສ່ວນກ່ຽວຂ້ອງທັງສອງຝ່າຍເຂົ້າຮ່ວມ

ທ່ານ ທອງພັນ ສຸກສະຫວັດ ຮອງເຈົ້າເມືອງໆເງິນ ຜູ້ຊີ້ນຳວຽກງານຂົງເຂດເສດຖະກິດ ໄດ້ລາຍງານສະພາບການຈັດຕັ້ງປະຕິບັດບັນດາກິດຈະກໍາພັດທະນາເສດຖະກິດ-ສັງຄົມຂອງເມືອງ ປະຈໍາປີ 2024 ທີ່ໄດ້ຮັບການສະໜັບສະໜູນທຶນຈາກ ບໍລິສັດ ໄຟຟ້າ ຫົງສາ ຈໍາກັດ ແລະ ສະເໜີແຜນກິດຈະກຳການພັດທະນາເສດຖະກິດ-ສັງຄົມຂອງເມືອງ ປະຈໍາປີ 2025 ຈໍານວນ 1 ໂຄງການມູນຄ່າ 3.000.000 ບາດ (ສະກຸນເງິນໄທ). ທ່ານ ຄະທາຍຸດ ຊູພູນ ໃນນາມຕາງໜ້າບໍລິສັດໄຟຟ້າຫົງສາຈໍາກັດໄດ້ຕົກລົງມອບທຶນສະໜັບສະໜູນໃຫ້ແກ່ອົງການປົກຄອງເມືອງໆເງິນ ເພື່ອສະໜັບສະໜູນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງເມືອງໃນປີ 2025 ມູນຄ່າ 3,000,000 ບາດ. ຊຶ່ງໃຫ້ກຽດມອບໂດຍແມ່ນ ທ່ານ ຄະທາຍຸດ ຊູພູນ ແລະ ກ່າວຮັບໂດຍ ທ່ານ ທະວີສັກ ໄຊຍະວົງ.

(ຂ່າວ: ດາວສຸກ ສຸລິຍະພອນ)