ສະຫາຍທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ສະຫາຍ ເສີນ ກ່າງ ເລຂາຄະນະພັກ ປະທານສະພາປະຊາຊົນເຂດປົກຄອງຕົນເອງຊົນເຜົ່າຈ້ວງກວາງຊີສປຈີນ ໃນວັນທີ 24 ກຸມພາຜ່ານມາທີ່ຫ້ອງວ່າການສູນກາງພັກ, ໂອກາດທີ່ ສະຫາຍເສີນກ່າງເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນລະຫວ່າງວັນທີ 21-24 ກຸມພາ 2025.

ໃນໂອກາດນີ້, ສະຫາຍ ທອງລຸນ ສີສຸລິດ ໄດ້ສະແດງຄວາມຍິນດີຕ້ອນຮັບຕໍ່ການເດີນທາງມາຢ້ຽມຢາມເຮັດວຽກຢູ່ ສປປ ລາວ ໃນຄັ້ງນີ້, ພ້ອມທັງສະແດງຄວາມຊົມເຊີຍຕໍ່ ສະຫາຍ ເສີນ ກ່າງ ທີ່ໄດ້ຮັບການແຕ່ງຕັ້ງດໍາລົງຕໍາແໜ່ງເປັນ ເລຂາຄະນະພັກ, ທັງເປັນປະທານສະພາປະຊາຊົນເຂດປົກຄອງຕົນເອງຊົນເຜົ່າຈ້ວງກວາງຊີ. ພ້ອມນີ້, ກໍໄດ້ຢືນຢັນຄືນວ່າ ພັກແລະລັດຖະບານລາວຢຶດໝັ້ນທັດສະນະສະເໝີຕົ້ນສະເໝີປາຍຂອງຕົນ ໃນການສະໜັບສະໜູນຫຼັກການຈີນດຽວແລະການທ້ອນໂຮມປະເທດຊາດໂດຍສັນຕິວິທີຂອງພັກແລະລັດຖະບານສປຈີນ, ທັງຍັງໄດ້ຕາງໜ້າພັກ, ລັດຖະບານ ແລະ ປະຊາຊົນລາວ ສະແດງຄວາມຂອບໃຈຢ່າງຈິງໃຈ ແລະ ຄວາມຮູ້ບຸນຄຸນຢ່າງເລິກເຊິ່ງ ຕໍ່ພັກ, ລັດຖະບານ ແລະ ປະຊາຊົນຈີນ ໂດຍສະເພາະແມ່ນເຂດກວາງຊີ ທີີ່ໄດ້ໃຫ້ການຊ່ວຍເຫຼືອອັນລໍ້າຄ່າ ແກ່ ສປປ ລາວ ຕະຫຼອດມາ ບໍ່ວ່າຈະໃນເມື່ອກ່ອນ ຈົນເຖິງປັດຈຸບັນ.

ສະຫາຍ ທອງລຸນ ສີສຸລິດ ຍັງໄດ້ຕີລາຄາສູງຕໍ່ສາຍພົວພັນມິດຕະພາບອັນເປັນມູນເຊື້ອ ແລະ ການເປັນຄູ່ຮ່ວມຍຸດທະສາດຮອບດ້ານ ໝັ້ນຄົງຍາວນານຕາມທິດ 4 ດີ,​ ການເປັນຄູ່ຮ່ວມຊາຕາກໍາ ລາວ-ຈີນ, ຈີນ-ລາວ ທີ່ນັບມື້ນັບໄດ້ຮັບການເສີມຂະຫຍາຍຢ່າງຕໍ່ເນື່ອງ ທັງທາງກວ້າງ ແລະ ທາງເລິກ ກໍຄືການພົວພັນ ລະຫວ່າງ ສປປ ລາວ ກັບ ເຂດປົກຄອງຕົນເອງຊົນເຜົ່າຈ້ວງກວາງຊີ, ສປ ຈີນ, ເປັນຕົ້ນແມ່ນການຈັດຕັ້ງປະຕິບັດບັນດາໂຄງການຮ່ວມມືລະຫວ່າງສອງປະເທດ ກໍຄືການລົງທຶນ ແລະ ດໍາເນີນທຸລະກິດຢູ່ ສປປ ລາວ ຂອງວິສາຫະກິດ, ນັກລົງທຶນຂອງຈີນ ອັນໄດ້ປະກອບສ່ວນສໍາຄັນເຂົ້າໃນການພັດທະນາເສດຖະກິດ-ສັງຄົມຂອງ ສປປ ລາວ, ໂດຍສະເພາະພາຍຫຼັງເປີດການນຳໃຊ້ເສັ້ນທາງລົດໄຟ ລາວ-ຈີນ, ຈີນ-ລາວ ເຫັນວ່າໄດ້ຮັບຜົນດີຫຼາຍ ຊຶ່ງເປັນການຢັ້ງຢືນເຖິງທັດ​ສະນະທີ່ຖືກຕ້ອງຂອງສອງພັກ-ສອງລັດ ໃນການເຊື່ອມໂຍງ, ເຊື່ອມຈອດເຂົ້າກັນໄດ້ເປັນຢ່າງດີ ລະຫວ່າງ ນະໂຍບາຍ ໜຶ່ງແລວໜຶ່ງເສັ້ນທາງ ຂອງ ສະຫາຍ ປະທານປະເທດ ສີ ຈິ້ນຜິງ ແລະ ນະໂຍບາຍຫັນປະເທດລາວໃຫ້ກາຍເປັນປະເທດເຊື່ອມໂຍງເຊື່ອມຈອດໃນອະນຸພາກພື້ນ. ພ້ອມກັນນັ້ນ, ກໍໄດ້ສະແດງຄວາມຫວັງວ່າ ສະຫາຍ ເສີນ ກ່າງ ຈະຊຸກຍູ້ໃຫ້ພາກສ່ວນກ່ຽວຂ້ອງ ເປັນເຈົ້າການໃນການຜັນຂະຫຍາຍການຮ່ວມມືລະຫວ່າງສອງຝ່າຍ ລາວ-ຈີນ ແລະ ການເປັນຄູ່ຮ່ວມຊາຕາກຳ ລາວ-ຈີນ ຈີນ-ລາວ ໃຫ້ເລິກເຊິ່ງຍິ່ງຂຶ້ນ ໂດຍສະເພາະແມ່ນຂົງເຂດເສດຖະກິດ, ການຄ້າຂາຍ, ການທ່ອງທ່ຽວ, ດ້ານພະລັງງານ, ໂຄງລ່າງພື້ນຖານ ແລະ ອື່ນໆທີ່ສອງຝ່າຍເຫັນວ່າຈະເປັນຜົນປະໂຫຍດຮ່ວມກັນ ເພື່ອນໍາເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ລາວ-ຈີນ, ຈີນ-ລາວ ໃຫ້ນັບມື້ນັບຫຼາຍຂຶ້ນ.

ໃນໂອກາດດຽວກັນນີ້, ສະຫາຍ ເສີນ ກ່າງ ໄດ້ສະແດງຄວາມຂອບໃຈຢ່າງຈິງໃຈ ຕໍ່ການຕ້ອນຮັບອັນອົບອຸ່ນ ຄັ້ງນີ້, ພ້ອມທັງໄດ້ແຈ້ງໃຫ້ຊາບໂດຍຫຍໍ້ເຖິງຜົນການຢ້ຽມຢາມແຂວງຫຼວງພະບາງ ແລະ ການພົບປະເຮັດວຽກຮ່ວມ ກັບ ກະຊວງແຜນການ ແລະ ການລົງທຶນ ແລະ ກະຊວງເຕັກໂນໂລຊີ ແລະ ການສື່ສານ ຂອງລາວ ທີ່ ນະຄອນຫຼວງວຽງຈັນ, ລວມເຖິງແຜນການທີ່ຈະສືບຕໍ່ດໍາເນີນຕະຫຼອດການຢ້ຽມຢາມ ສປປ ລາວ ໃນຄັ້ງນີ້. ພ້ອມນີ້, ກໍໄດ້ສະແດງຄວາມເຫັນດີເປັນເອກະພາບກັບ ສະຫາຍ ທອງລຸນ ສີສຸລິດ ຕໍ່ການຕີລາຄາສູງສາຍພົວພັນ ແລະ ການຮ່ວມມື ລະຫວ່າງ ສປ ຈີນ ແລະ ສປປ ລາວ ກໍຄື ເຂດປົກຄອງຕົນເອງຊົນເຜົ່າຈ້ວງກວາງຊີ, ສປ ຈີນ ກັບ ສປປ ລາວ, ທັງຍັງຢືນຢັນທີ່ຈະຮ່ວມເຮັດວຽກກັບ ສປປ ລາວ ຢ່າງໃກ້ຊິດ ແລະ ຊຸກຍູ້ພາກສ່ວນກ່ຽວຂ້ອງ ເປັນເຈົ້າການໃນການຜັນຂະຫຍາຍການຮ່ວມມືລະຫວ່າງສອງຝ່າຍ ຈີນ-ລາວ ແລະ ການເປັນຄູ່ຮ່ວມຊາຕາກຳ ລາວ-ຈີນ, ຈີນ-ລາວ ໃຫ້ເລິກເຊິ່ງຍິ່ງໆຂຶ້ນ ເພື່ອນໍາເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ຈີນ-ລາວ, ລາວ-ຈີນ.

(ຂ່າວ: ສຸກສະຫວັນ, ຂໍ້ມູນ-ພາບ: ກົມການຂ່າວ ຕປທ)