ໃນວັນທີ 25 ກຸມພາຜ່ານມາ, ສານປະຊາຊົນແຂວງວຽງຈັນ ໄດ້ຈັດພິທີປະກາດການຈັດຕັ້ງຂຶ້ນຢູ່ທີ່ຫ້ອງປະຊຸມຂອງພາກສ່ວນດັ່ງກ່າວ, ໂດຍການເປັນປະທານຮ່ວມຂອງທ່ານ ພູທະນູເພັດ ໄຊສົມບັດ ຮອງເລຂາພັກແຂວງ ຮອງເຈົ້າແຂວງວຽງຈັນ, ທ່ານ ຄຳພັນ ບຸນພາຄົມ ຮອງປະທານສານປະຊາຊົນສູງສຸດ, ມີບັນດາແຂກຖືກເຊີນ ແລະ ພາກສ່ວນກ່ຽວຂ້ອງເຂົ້າຮ່ວມ .

ທ່ານ ສາກົນ ໄຊຍະລາດ ຮອງກົມຈັດຕັ້ງ- ພະນັກງານສານປະຊາຊົນສູງສຸດ ໄດ້ຂຶ້ນຜ່ານຂໍ້ຕົກລົງ ຂອງສານປະຊາຊົນສູງສຸດ ສະບັບເລກທີ 232/ສປສສ ລົງວັນທີ 24 ກຸມພາ 2025 ວ່າດ້ວຍການອະນຸມັດໃຫ້ພະນັກງານ-ລັດຖະກອນ ອອກຮັບອຸດໜູນບຳນານ ໂດຍເຫັນດີໃຫ້ທ່ານ ອຸດົມ ພົມມະລິນ ປະທານສານປະຊາຊົນແຂວງວຽງຈັນ ອອກຮັບອຸດໜູນບຳນານຕາມລະບຽບການ ແລະ ຂໍ້ຕົກລົງວ່າດ້ວຍ ການແຕ່ງຕັ້ງຜູ້ຮັກສາການປະທານສານປະຊາຊົນແຂວງວຽງຈັນ ໂດຍເຫັນດີແຕ່ງຕັ້ງ ທ່ານ ວຽງໄຊ ແສງນາລີ ຜູ້ພິພາກສາຊັ້ນ 4 ເປັນຜູ້ຮັກສາການປະທານສານປະຊາຊົນແຂວງວຽງຈັນຈົນກວ່າຈະມີການປ່ຽນແປງ.

(ແຫຼ່ງຂ່າວ: ແຂວງວຽງຈັນ)