ໃນເວທີສາກົນ, ກອງປະຊຸມປະຈຳປີຂອງ “ສອງສະພາ” ຄື: ສະພາປະຊາຊົນແຫ່ງຊາດຈີນແລະສະພາປຶກສາການເມືອງປະຊາຊົນແຫ່ງຊາດຈີນແມ່ນກອງປະຊຸມສໍາຄັນທີ່ດຶງດູດຄວາມສົນໃຈຈາກຊາວໂລກຕະຫຼອດມາ. “ກອງປະຊຸມສອງສະພາ” ບໍ່ພຽງແຕ່ໄດ້ເສີມຂະຫຍາຍບົດບາດທີ່ສຳຄັນໃນດ້ານການວາງແຜນ ເພື່ອພັດທະນາເສດຖະກິດຂອງຈີນ ເທົ່ານັ້ນ, ຫາກຍັງໄດ້ສົ່ງສັນຍານກ່ຽວກັບນະໂຍບາຍແລະແນວຄິດຂອງການພັດທະນາຂອງຈີນທີ່ສົ່ງຜົນດີຕໍ່ບັນດາປະເທດໃນໂລກ ໂດຍສະເພາະແມ່ນປະເທດທີ່ມີການພົວພັນຮ່ວມມືກັບຈີນຢ່າງແໜ້ນແຟ້ນ, ໃນນີ້ ລວມທັງປະເທດລາວຊຶ່ງເປັນປະເທດຄູ່ຮ່ວມຊາຕາກໍາກັບຈີນ.

“ກອງປະຊຸມສອງສະພາ” ແມ່ນສ່ອງແສງໃຫ້ເຫັນເຖິງຄວາມຕັດສິນໃຈແລະທິດທາງການພັດທະນາຂອງຈີນ. ໃນໄລຍະຈັດກອງປະຊຸມດັ່ງກ່າວຈະມີການສະເໜີຂໍ້ຕົກລົງແລະທິດທາງນະໂຍບາຍຕ່າງໆທີ່ສຳຄັນເພື່ອປຶກສາຫາລືຮ່ວມກັນ.

ໃນຕອນເຊົ້າວັນທີ 5 ມີນານີ້, ກອງປະຊຸມຄັ້ງທີ 3 ຂອງສະພາປະຊາຊົນແຫ່ງຊາດຈີນສະໄໝທີ 14 ໄດ້ເປີດຂຶ້ນຢູ່ນະຄອນຫຼວງປັກກິ່ງ, ທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນປະທານປະເທດຈີນພ້ອມດ້ວຍຜູ້ນຳພັກ-ລັດທ່ານອື່ນໆໄດ້ເຂົ້າຮ່ວມ. ທ່ານຫຼີສຽງນາຍົກລັດຖະມົນຕີຈີນໄດ້ຂຶ້ນຜ່ານບົດລາຍງານຜົນສໍາເລັດການຈັດຕັ້ງປະຕິບັດວຽກງານຂອງລັດຖະບານຈີນໃນ 1 ປີຜ່ານມາ ແລະທິດທາງແຜນການປະຕິບັດວຽກງານໃນປີນີ້ ຊຶ່ງລວມທັງການພັດທະນາກຳລັງການຜະລິດທີ່ມີຄຸນນະພາບໃໝ່, ເປີດກວ້າງການເປີດປະຕູສູ່ພາຍນອກໃນລະດັບສູງ, ການເລັ່ງລັດການຫັນເປັນແບບສີຂຽວຢ່າງຮອບດ້ານຂອງການພັດທະນາເສດຖະກິດ-ສັງຄົມ, ການພັດທະນາເສດຖະກິດດີຈີຕອນແລະອື່ນໆ. ຈີນແລະລາວແມ່ນຄູ່ຮ່ວມຊາຕາກຳທີ່ມີຜົນປະໂຫຍດຮ່ວມຢ່າງກວ້າງຂວາງ. ແນວຄິດແລະທິດທາງການພັດທະນາດັ່ງກ່າວຂອງຈີນໄດ້ສ້າງພື້ນທີ່ ແລະພື້ນຖານການຮ່ວມມືຢ່າງກວ້າງຂວາງໃຫ້ແກ່ການຮ່ວມມືຂອງສອງປະເທດຈີນ-ລາວ.

ເມື່ອສັງເກດຕີລາຄາແລ້ວເຫັນວ່າ: ກ່ອນອື່ນ, ການພັດທະນາກຳລັງການຜະລິດທີ່ມີຄຸນນະພາບໃໝ່ໂດຍອີງຕາມສະພາບຕົວຈິງຂອງທ້ອງຖິ່ນແລະ ເລັ່ງລັດຫັນເປັນແບບສີຂຽວຢ່າງຮອບດ້ານຂອງການພັດທະນາເສດຖະກິດ-ສັງຄົມສາມາດເປັນບົດຮຽນທີ່ສຳຄັນໃຫ້ແກ່ການພັດທະນາຂອງລາວ. ປະເທດລາວມີຊັບພະຍາກອນດ້ານພະລັງງານແສງຕາເວັນ, ແຮງລົມແລະນ້ຳຢ່າງອຸດົມສົມບູນ.

ໃນເມື່ອກ່ອນ, ຍ້ອນມີຄວາມຈຳກັດດ້ານເຕັກນິກແລະງົບປະມານ, ພະລັງງານທີ່ສະອາດເຫຼົ່ານີ້ຈຶ່ງບໍ່ໄດ້ຮັບການພັດທະນາແລະນຳໃຊ້ຢ່າງເຕັມທີ່. ຈີນໄດ້ຮັບຜົນສຳເລັດເປັນຢ່າງດີໃນດ້ານການປະດິດສ້າງໃໝ່ຢ່າງພົ້ນເດັ່ນໃນຂົງເຂດພະລັງງານສະອາດ, ໃນນີ້ ລວມທັງເຕັກນິກພະລັງງານແສງຕາເວັນ, ພະລັງງານລົມແລະພະລັງງານນ້ຳພ້ອມດ້ວຍການນຳໃຊ້ເຕັກນິກສົ່ງໄຟຟ້າແຮງສູງໂດຍທົ່ວໄປ. ໃນຊຸມປີຜ່ານມາ, ວິສາຫະກິດຈີນໄດ້ເຂົ້າຮ່ວມການກໍ່ສ້າງໂຄງການພະລັງງານສະອາດຂອງລາວທີ່ລວມທັງພະລັງງານນ້ຳ, ພະລັງງານລົມແລະພະລັງງານແສງຕາເວັນຊຶ່ງໄດ້ສ້າງພະລັງຂັບເຄື່ອນໃໝ່ທີ່ແຂງແຮງໃຫ້ແກ່ການຫັນເປັນສີຂຽວຂອງລາວ.

ສອງ, ໃນຂົງເຂດເສດຖະກິດການຄ້າ, ການຮ່ວມມືຈີນ-ລາວໄດ້ຮັບໝາກຜົນຢ່າງອຸດົມສົມບູນແລະມີອະນາຄົດຢ່າງກວ້າງຂວາງຮ່ວມກັນ. ຈີນເປັນປະເທດໃຫຍ່ອັນດັບໜຶ່ງໃນຈໍານວນ 50 ກວ່າປະເທດທີ່ເຂົ້າໄປລົງທຶນຢູ່ລາວ ແລະເປັນຄູ່ການຄ້າໃຫຍ່ອັນດັບສອງຂອງລາວ. ຄຽງຄູ່ກັບຈີນເປີດກວ້າງການເປີດປະຕູສູ່ພາຍນອກໃນລະດັບສູງຢ່າງບໍ່ຢຸດຢັ້ງ, ຜະລິດຕະພັນກະສິກຳ, ຜະລິດຕະພັນຫັດຖະກຳແລະສິນຄ້າອື່ນໆຂອງລາວຈະສາມາດເຂົ້າສູ່ຕະຫຼາດຂອງຈີນໄດ້ຢ່າງສະດວກສະບາຍກວ່າເກົ່າຊຶ່ງບໍ່ພຽງແຕ່ຈະເປີດກວ້າງພື້ນທີ່ຕະຫຼາດໃຫ້ແກ່ຜະລິດຕະພັນຂອງລາວເທົ່ານັ້ນ, ຫາກຍັງຈະເຮັດໃຫ້ລູກຄ້າຂອງຈີນສາມາດເຂົ້າເຖິງສິນຄ້າທີ່ດີມີຄຸນນະພາບຂອງລາວໄດ້ຫຼາຍກວ່າເກົ່າອີກດ້ວຍ; ໃນຂະນະດຽວກັນ, ວິສາຫະກິດຂອງຈີນກໍຈະເພີ່ມການລົງທຶນຢູ່ລາວເພື່ອເພີ່ມກຳລັງໃຫ້ແກ່ການພັດທະນາອຸດສາຫະກຳຂອງລາວ. ນອກນີ້, ນັບແຕ່ທາງລົດໄຟລາວ-ຈີນເປີດການນຳໃຊ້ເປັນຕົ້ນມາໄດ້ຂົນສົ່ງຜູ້ໂດຍສານຫຼາຍກວ່າ 48 ລ້ານເທື່ອຄົນແລະຂົນສົ່ງສິນຄ້າຫຼາຍກວ່າ 54 ລ້ານໂຕນຊຶ່ງເປັນການຊຸກຍູ້ການໄປມາຫາສູ່ກັນລະຫວ່າງປະຊາຊົນ, ການຄ້າແລະການຈໍລະຈອນສິນຄ້າ. ໃນອະນາຄົດ, ທາງລົດໄຟສາຍນີ້ຈະເສີມຂະຫຍາຍບົດບາດທີ່ສຳຄັນກວ່າເກົ່າໃນການເຊື່ອມໂຍງເຂົ້າກັນຂອງເສດຖະກິດພາກນີ້ແລະ ກາຍເປັນສາຍພານທີ່ເຊື່ອມຕໍ່ຈີນແລະລາວກໍຄືບັນດາປະເທດໃນອາຊີຕາເວັນອອກສ່ຽງໃຕ້ຫຼື ອາຊຽນ.

ສິ່ງທີ່ໜ້າເວົ້າເຖິງເປັນພິເສດນັ້ນກໍຄືໃນປີຜ່ານມາ, ຈີນ ມີຄວາມຄືບໜ້າຢ່າງພົ້ນເດັ່ນໃນຂົງເຂດປັນຍາປະດິດຫຼື AI. ຄິດວ່າເພື່ອນມິດຊາວລາວທັງຫຼາຍອາດຈະໄດ້ຮູ້ຂ່າວແລ້ວວ່າບັນດາວິສາຫະກິດຈີນ ໂດຍສະເພາະDeepSeekເປັນຕົ້ນໄດ້ພັດທະນາກ້າວຂຶ້ນຢ່າງວ່ອງໄວຊຶ່ງໄດ້ສ່ອງແສງໃຫ້ເຫັນເຖິງກຳລັງຕົວຈິງຂອງຈີນໃນຂົງເຂດປັນຍາປະດິດ.

ໃນບົດລາຍງານວຽກງານຂອງລັດຖະບານຈີນປີນີ້ ໄດ້ລະບຸວ່າ: ຈີນຈະສືບຕໍ່ຊຸກຍູ້ຄວາມມີຊີວິດຊີວາດ້ານການປະດິດສ້າງໃໝ່ຂອງເສດຖະກິດດີຈີຕອນ, ສືບຕໍ່ຊຸກຍູ້ການເຄື່ອນໄຫວ “ປັນຍາປະດິດ+”, ສະໜັບສະໜູນການນຳໃຊ້ແບບຈຳລອງໃຫຍ່ຢ່າງກວ້າງຂວາງແລະອອກແຮງພັດທະນາອຸປະກອນປາຍທາງອັດສະລິຍະ ແລະ ເຄື່ອງຈັກອັດສະລິຍະສຳລັບການຜະລິດອຸດສາຫະກຳຮຸ່ນໃໝ່. ທີ່ຈິງແລ້ວ, ຈີນໄດ້ຢຶດໝັ້ນແນວຄິດໂອເພັນຊອສແລະຊົມໃຊ້ຮ່ວມກັນຢ່າງສະເໝີຕົ້ນສະເໝີປາຍ, ຊຸກຍູ້ການນໍາໃຊ້ເຕັກໂນໂລຊີປັນຍາປະດິດໃນຂອບເຂດທົ່ວໂລກ, ປະກອບສ່ວນດ້ານ “ສະຕິປັນຍາຂອງຈີນ” ເຂົ້າໃນການພັດທະນາຂອງໂລກ. ກ່ອນໜ້ານີ້ບໍ່ດົນ, ຈີນແລະລາວໄດ້ຮ່ວມກັນລົງນາມໃນສັນຍາວ່າດ້ວຍການຮ່ວມກັນສ້າງສູນຮ່ວມມືການປະດິດສ້າງໃໝ່ດ້ານປັນຍາປະດິດຫຼື AI ເພື່ອຊ່ວຍລາວສ້າງແບບຈຳລອງ AI ຂະໜາດໃຫຍ່ຂອງຕົນເອງແລະຄວບຄຸມດ້ວຍຕົນເອງ. ເຊື່ອໝັ້ນວ່າ: ພາຍໃຕ້ຄວາມພະຍາຍາມຮ່ວມຂອງສອງຝ່າຍ, ປັນຍາປະດິດຈະສາມາດສ້າງໂອກາດຫຼາຍກວ່າເກົ່າໃຫ້ແກ່ການຮ່ວມມືຂອງສອງປະເທດ ຈີນ-ລາວ.

ແນ່ນອນແລ້ວ, ໂອກາດການຮ່ວມມືລະຫວ່າງຈີນກັບລາວນັບແຕ່ນີ້ຕໍ່ໄປ ຍັງມີອີກຫຼາຍດ້ານເຊັ່ນ: ການທ່ອງທ່ຽວ, ການສຶກສາ, ວັດທະນະທຳແລະອື່ນໆຊຶ່ງກໍມີຄວາມສາມາດບົ່ມຊ້ອນອັນມະຫາສານ.

ເຊື່ອໝັ້ນຢ່າງໜັກແໜ້ນວ່າ: ພາຍຫຼັງສໍາເລັດ “ກອງປະຊຸມສອງສະພາ”ແຫ່ງຊາດຈີນໃນຄັ້ງນີ້,ຈະເຮັດໃຫ້ການຮ່ວມມືລະຫວ່າງຈີນ-ລາວໄດ້ຮັບການເສີມຂະຫຍາຍນັບມື້ກ້າວຂຶ້ນສູ່ລະດັບໃໝ່ເພື່ອນໍາເອົາຄວາມຜາສຸກ ແລະ ຄວາມຈະເລີນສີວິໄລມາໃຫ້ປະຊາຊົນສອງປະເທດຈີນ-ລາວ ນັບມື້ຫຼາຍຂຶ້ນຢ່າງບໍ່ຢຸດຢັ້ງແລະປະກອບສ່ວນສໍາຄັນເຂົ້າໃນການພັດທະນາຂອງພາກພື້ນນັບມື້ຫຼາຍຂຶ້ນກວ່າເກົ່າ.