ກອງປະຊຸມໃຫຍ່ ຜູ້ແທນອົງຄະນະພັກ ເມືອງໂພນໂຮງແຂວງວຽງຈັນ ຄັ້ງທີ VIII ໄດ້ຈັດຂຶ້ນ ໃນລະຫວ່າງ ວັນທີ 10-11 ມີນາ 2025 ທີ່ສະໂມສອນຂອງເມືອງ ໂດຍການເຂົ້າຮ່ວມຂອງ ສະຫາຍ ຄຳພັນ ສິດທິດຳພາ ກຳມະການສູນກາງພັກເລຂາພັກແຂວງເຈົ້າແຂວງວຽງຈັນ, ມີແຂກຖືກເຊີນ ແລະ ຜູ້ແທນສົມບູນ136 ສະຫາຍຍິງ 24 ສະຫາຍ ຊຶ່ງເປັນຕົວແທນໃຫ້ແກ່ສະມາຊິກພັກໃນທົ່ວເມືອງ ຈຳນວນ 2.353 ສະຫາຍຍິງ 914 ສະຫາຍ.
      ສະຫາຍ ສົມປະສົງ ສຸວົງຄຳຈັນ ກຳມະການພັກແຂວງເລຂາພັກເມືອງເຈົ້າເມືອງໂພນໂຮງ ໄດ້ກ່າວເປີດກອງປະຊຸມວ່າ: ໃນໄລຍະ 5 ປີຜ່ານມາ ອົງຄະນະພັກເມືອງໂພນໂຮງ ໄດ້ຮ່ວມກັບສະມາຊິກພັກ, ປະຊາຊົນບັນດາເຜົ່າ ພາຍໃນເມືອງໄດ້ຜ່ານຜ່າບັນດາອຸປະສັກ, ສິ່ງທ້າທາຍ, ຄວາມຫຍຸ້ງຍາກຕ່າງໆນາໆ ຊຶ່ງເປັນສີ່ງທ້າທາຍທົດສອບ ແລະ ສິ່ງດັ່ງກ່າວເຮັດໃຫ້ພວກເຮົາໄດ້ພ້ອມກັນຮ່ວມແຮງຮ່ວມໃຈກັນຕັ້ງໜ້າບຸກບືນສູ້ຊົນປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິ VI ຂອງອົງຄະນະພັກແຂວງວຽງຈັນ ແລະ ມະຕິກອງປະຊຸມໃຫຍ່ຜູ້ແທນອົງຄະນະພັກເມືອງໂພນໂຮງ ຄັ້ງທີ VII ດ້ວຍຫຼາຍມາດຕະການ, ວິທີການອັນເໝາະສົມໃນແຕ່ລະໄລຍະ,  ອັນພົ້ນເດັ່ນແມ່ນການນໍາເອົາມະຕິກອງປະຊຸມໃຫຍ່ຫັນເປັນແຜນງານ, ໂຄງການລະອຽດເປັນແຕ່ລະດ້ານ. ຫັນເອົາພະນັກງານລົງກໍ່ສ້າງຮາກຖານການເມືອງ ພັດທະນາຊົນນະບົດຮອບດ້ານ ຕາມ 4 ເນື້ອໃນ 4 ຄາດໝາຍ ແລະ ຊຸກຍູ້ວຽກງານ 3 ສ້າງເຂົ້າສູ່ລວງເລິກ. ເອົາໃຈໃສ່ນໍາພາສຶກສາອົບຮົມການເມືອງ-ແນວຄິດ ໃຫ້ແກ່ສະມາຊິກພັກ, ພະນັກງານ-ລັດຖະກອນ ແລະ ປະຊາຊົນບັນດາເຜົ່າ ຮັບຮູ້ເຂົ້າໃຈແຈ້ງ ເພື່ອເຂົ້າຮ່ວມປະຕິບັດແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ເອົາໃຈໃສ່ພັດທະນາເສດຖະກິດ, ວັດທະນະທໍາ-ສັງຄົມ, ດໍາເນີນຊີວິດການເມືອງປັບປຸງປົວແປງພາຍໃນພັກ ແລະ ປັບປຸງລະບົບການເມືອງ ເລີ່ມແຕ່ຂັ້ນຮາກຖານບ້ານ ໃຫ້ເຂັ້ມແຂງຂຶ້ນເທື່ອລະກ້າວ.
     ກອງປະຊຸມໃຫຍ່ຄັ້ງນີ້, ຈະໄດ້ສຸມໃສ່ການຄົ້ນຄວ້າພິຈາລະນາຮັບຮອງເອົາຮ່າງບົດລາຍງານການເມືອງ, ແຜນພັດທະນາເສດຖະກິດ-ສັງຄົມ 5 ປີ ແລະ ທິດທາງຄາດໝາຍສູ້ຊົນ ໃນຊຸມປີຕໍ່ໜ້າ ແລະ ຄົ້ນຄວ້າຮັບຮອງເອົາບົດສໍາຫຼວດການນໍາພາລວມ ຂອງຄະນະພັກເມືອງໂພນໂຮງ ສະໄໝທີ VII. ພ້ອມນີ້ຈະໄດ້ດໍາເນີນການປ່ອນບັດເລືອກຕັ້ງເອົາຄະນະບໍລິຫານງານພັກເມືອງຊຸດໃໝ່ ເພື່ອສືບຕໍ່ນໍາພາຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ VIII ໃຫ້ປະກົດຜົນເປັນຈິງ ແລະ ເລືອກເອົາຜູ້ແທນເພື່ອເປັນຕົວແທນຂອງອົງຄະນະພັກເມືອງ ໄປຮ່ວມກອງປະຊຸມໃຫຍ່ຜູ້ແທນອົງຄະນະພັກແຂວງ ຄັ້ງທີ VII  ໃນຕໍ່ໜ້າ ແລະ ຈະໄດ້ຮັບຟັງການໂອ້ລົມຈາກສະຫາຍ ເລຂາພັກແຂວງ.
    (ແຫຼ່ງຂ່າວ: ເມືອງໂພນໂຮງ)