ກອງປະຊຸມໃຫຍ່ ຄັ້ງທີ III ຂອງໜ່ວຍພັກສະຖາບັນຄົ້ນຄວ້າ ແລະ ຝຶກອົບຮົມ ສານປະຊາຊົນສູງສຸດ ໄດ້ຈັດຂຶ້ນໃນວັນທີ 13 ມີນາຜ່ານມາ ທີ່ ສານປະຊາຊົນສູງສຸດ (ສປສສ), ພາຍໃຕ້ການເປັນປະທານຂອງສະຫາຍ ກັ້ງ ເຕັມສົມບັດ ເລຂາໜ່ວຍພັກສະຖາບັນຄົ້ນຄວ້າ ແລະ ຝຶກອົບຮົມ, ໃຫ້ກຽດເຂົ້າຮ່ວມໂອ້ລົມ ຂອງສະຫາຍ ນາງ ວຽງທອງ ສີພັນດອນ ຄະນະເລຂາທິການສູນກາງພັກ ເລຂາຄະນະບໍລິຫານງານພັກ ປະທານສານສານປະຊາຊົນສູງສຸດ ພ້ອມດ້ວຍສະມາຊິກພັກ ແລະ ແຂກ ຖືກເຊີນເຂົ້າຮ່ວມ.

ສະຫາຍ ກັ້ງ ເຕັມສົມບັດ ໄດ້ລາຍງານວ່າ: ກອງປະຊຸມທີ່ມີຄວາມໝາຍສຳຄັນໃນຄັ້ງນີ້ບັນດາສະມາຊິກພັກ ໄດ້ຍົກສູງຄວາມຮັບຜິດຊອບ ແລະ ສຸມສະຕິປັນຍາຂອງຕົນເຂົ້າໃນການຄົ້ນຄວ້າ ປະກອບຄຳຄິດ ຄຳເຫັນ ຢ່າງກົງໄປ ກົງມາເຮັດໃຫ້ກອງປະຊຸມເຕັມໄປດ້ວຍເນື້ອໃນທີ່ມີຄວາມໝາຍເລິກເຊິ່ງ ແລະ ມີຄວາມເປັນເອກະພາບສູງ ຮັບຮອງເອົາຢ່າງເປັນເອກະສັນກ່ຽວກັບບົດລາຍງານການເມືອງ ແຜນພັດທະນາ ບົດສຳຫຼວດການນຳພາຂອງຄະນະໜ່ວຍພັກໃນ 5 ປີ ຜ່ານມາ ແລະ ພ້ອມນັ້ນ ຍັງໄດ້ພ້ອມກັນຄົ້ນຄວ້າຢ່າງເລິກເຊິ່ງ ຕໍ່ກັບແຜນພັດທະນາສະຖາບັນ 5 ປີ ຄັ້ງທີ III (2025-2030) ປະກອບມີ 5 ແຜນງານ , 12 ໂຄງການ, 43 ກິດຈະກຳ ຄື: ແຜນງານທີ 1 ການພັດທະນາພື້ນຖານໂຄງຮ່າງ ສະຖາບັນຄົ້ນຄວ້າ ແລະ ຝຶກອົບຮົມ ປະກອບມີ 3 ໂຄງການ 3 ກິດຈະກຳ; 2. ພັດທະນາແບບແຜນກົນໄກການບໍລິຫານສັງລວມ-ຂໍ້ມູນຂ່າວສານ ປະກອບມີ 2 ໂຄງການ 9 ກິດຈະກຳ; 3. ພັດທະນາວຽກງານຝຶກອົບຮົມ ປະກອບມີ 3 ໂຄງການ ແລະ 14 ກິດຈະກຳ; 4. ພັດທະນາຫຼັກສູດ ແລະ ຄູຝຶກ ປະກອບມີ 2 ໂຄງການ ແລະ 10 ກິດຈະກຳ ແລະ ແຜນງານທີ 5 ພັດທະນາຫໍສະໝຸດຕຸລາການ ປະກອບມີ 2 ໂຄງການ ແລະ 7 ກິດຈະກຳ.

ຈາກນັ້ນ, ກອງປະຊຸມ ໄດ້ພ້ອມກັນ ໃຊ້ສິດປະຊາທິໄຕຂອງຕົນ ປ່ອນບັດເລືອກຕັ້ງເອົາຄະນະໜ່ວຍພັກຊຸດໃໝ່ ບົນພື້ນຖານ ຫຼັກການລວມສູນປະຊາທິປະໄຕ ພ້ອມທັງຖືກຕ້ອງສອດຄ່ອງ ກັບມາດຖານເງື່ອນໄຂທີ່ກຳນົດໄວ້, ມີຜູ້ອອກສະໝັກຮັບເລືອກຕັ້ງ 5 ສະຫາຍ ຍິງ 2 ສະຫາຍ ແລະ ໄດ້ເລືອກເອົາ 3 ສະຫາຍ ຍິງ 1 ສະຫາຍ. ກອງປະຊຸມຄັ້ງປະຖົມມະລືກເລືອກເອົາສະຫາຍ ກັ້ງ ເຕັມສົມບັດ ເປັນເລຂາໜ່ວຍພັກສະຖາບັນຄົ້ນຄວ້າ ແລະ ຝຶກອົບຮົມ, ສະຫາຍ ນາງ ຈັນໄທ ໄຊຍະວົງ ເປັນຮອງເລຂາ ທັງເປັນປະທານກວດກາ, ສະຫາຍ ບຸນປະສົງ ຈິດຕະກອນ ເປັນຄະນະ ແລະ ສະຫາຍ ຄຳສະຫວັນ ທຸມມະອາໄຟ ເປັນຮອງປະທານກວດກາ.

ໃນໂອກາດດັ່ງກ່າວ ສະຫາຍ ນາງ ວຽງທອງ ສີພັນດອນ ໄດ້ໃຫ້ກຽດໂອ້ລົມ ສະແດງຄວາມຍ້ອງຍໍຊົມເຊີຍບັນດາ ຄະນະໜ່ວຍພັກ ສະມາຊິກພັກ ທຸກສະຫາຍ ແລະ ພະນັກງານ-ລັດຖະກອນ ໃນສະຖາບັນຄົ້ນຄວ້າ ແລະ ຝຶກອົບຮົມ ທີ່ໄດ້ເຮັດຫຼອນໜ້າການເມືອງຂອງຕົນຮັບຜິດຊອບມີຜົນສຳເລັດຫຼາຍດ້ານ ຕະຫຼອດໄລຍະ 5 ປີຜ່ານມາ ແລະ ໃນຊຸມປີຕໍ່ໜ້າ ບັນດາສະຫາຍ ຍັງມີຫຼາຍດ້ານທີ່ຈະຕ້ອງເອົາໃຈໃສ່ປັບປຸງແກ້ໄຂ ເປັນຕົ້ນໃຫ້ສືບຕໍ່ ເອົາໃຈໃສ່ວຽກງານສຶກສາອົບຮົມການເມືອງ-ແນວຄິດ ໃຫ້ສະມາຊິກພັກ-ພະນັກງານ ສຶກສາຄົ້ນຄວ້າຮ່ຳຮຽນແນວທາງນະໂຍບາຍຂອງພັກ, ກົດໝາຍຂອງລັດ, ກໍາແໜ້ນທາດແທ້ຊົນຊັ້ນ ແລະ ຄຸນສົມບັດສິນທໍາປະຕິວັດ ໄປຄຽງຄູ່ກັບການຍົກສູງຄວາມຮູ້ຄວາມສາມາດທາງດ້ານວິຊາສະເພາະວິຊາການ ແລະ ໃຫ້ມີຄວາມຊໍານານ ກາຍເປັນມືອາຊີບໃນການກໍ່ສ້າງບຸກຄະລາກອນຕຸລາການ. ຍົກສູງຄວາມຮັບຜິດຊອບການເມືອງຂອງຕົນ, ເອົາໃຈໃສ່ຝຶກຝົນຫຼໍ່ຫຼອມຕົນເອງຢູ່ສະເໝີ ໃຫ້ມີຄວາມຮູ້, ເປັນນັກວິຊາການທີ່ເກັ່ງ, ຊຳນານແບບມືອາຊີບ, ມີປະສົບການຝຶກຝົນຫຼໍ່ຫຼອມຄຸນທາດການເມືອງ, ຄຸນສົມບັດສິນທຳປະຕິວັດ, ເພື່ອຮັບໃຊ້ໜ້າທີ່ວຽກງານສຳຄັນຂອງພັກ, ລັດ ແລະ ເຮັດໜ້າທີ່ຕາມພາລະບົດບາດຂອງຕົນໄດ້ເປັນຢ່າງດີ; ເອົາໃຈໃສ່ນໍາພາ-ຊີ້ນຳ ສ້າງໜ່ວຍພັກ ໃຫ້ເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ຢ່າງຕໍ່ເນື່ອງ, ນໍາພາ ຕາມຫຼັກການລວມສູນປະຊາທິປະໄຕ, ມີການແບ່ງຄວາມຮັບຜິດຊອບໃຫ້ກັນຢ່າງລະອຽດ, ຍົກສູງບົດບາດການນຳພາຂອງພັກ ເພື່ອເຮັດໃຫ້ພະນັກງານສະມາຊິກພັກພາຍໃຕ້ການ ນໍາພາ-ຊີ້ນຳຂອງຕົນ ມີຄວາມເຊື່ອໝັ້ນຕໍ່ການນຳພາຂອງໜ່ວຍພັກ, ຖືເອົາການຕິຊົມຕົນເອງ, ຕິຊົມກັນ ເປັນກົດເກນແຫ່ງການຄົງຕົວ ແລະ ຂະຫຍາຍຕົວຂອງພັກ; ສືບຕໍ່ນຳພາ-ຊີ້ນຳ ການຍົກສູງຄວາມເປັນແບບຢ່າງນໍາໜ້າ ແລະ ເພີ່ມທະວີຄວາມສາມັກຄີເປັນເອກະພາບ, ສ້າງຄວາມເຂັ້ມແຂງໃຫ້ແກ່ອົງການຕຸລາການ, ປະຕິບັດໜ້າທີ່ຕາມພາລະບົດບາດຂອງສະຖາບັນຄົ້ນຄວ້າ ແລະ ຝຶກອົບຮົມ; ເອົາໃຈໃສ່ນໍາພາ-ຊີ້ນໍາບັນດາອົງການຈັດຕັ້ງມະຫາຊົນ ໃຫ້ປະຕິບັດຂໍ້ແຂ່ງຂັນຂອງຕົນເອງຢ່າງຫ້າວຫັນ ໃຫ້ສາມາດບັນລຸຕາມເປົ້າໝາຍ ຊາວໜຸ່ມ 4 ບຸກ, ກໍາມະບານ 5 ເປັນເຈົ້າ ແລະ ແມ່ຍິງ 3 ດີ ; ເອົາໃຈໃສ່ນຳພາ-ຊີ້ນຳ ດ້ານວິຊາສະເພາະ, ພາສາຕ່າງປະເທດ ແລະ ດ້ານອື່ນໆ ເພື່ອໃຫ້ສາມາດຈັດຕັ້ງວຽກງານຝຶກອົບຮົມ ທັນກັບຄວາມຮຽກຮ້ອງຕ້ອງການ ໃນການສ້າງ ແລະ ພັດທະນາບຸກຄະລາກອນຂອງສານປະຊາຊົນໃນຂອບເຂດທົ່ວປະເທດ ມີຄຸນນະພາບ ແລະ ກ້າວສູ່ທັນສະໄໝ ເທື່ອລະກ້າວ;

ເອົາໃຈໃສ່ນໍາພາ-ຊີ້ນໍາວຽກງານການຮ່ວມມືກັບຕ່າງປະເທດ, ໂດຍໃຫ້ສົມທົບຢ່າງໃກ້ຊິດກັບກົມຮ່ວມມືສາກົນ, ສານປະຊາຊົນສູງສຸດ ໃນການຄົ້ນຄວ້າລະດົມ ແລະ ຍາດແຍ່ງການຊ່ວຍເຫຼືອດ້ານທຶນຮອນ, ການຊ່ວຍເຫຼືອດ້ານວິຊາການ, ຊ່ຽວຊານຈາກສາກົນທີ່ມີປະສົບການ ເພື່ອນຳມາພັດທະນາບຸກຄະລາກອນຂອງສານປະຊາຊົນໃນທົ່ວປະເທດ ແລະ ນຳພາ-ຊີ້ນຳ ພາກສ່ວນກ່ຽວຂ້ອງ ໃນການຂຶ້ນແຜນ, ອອກແບບ, ປັບປຸງ, ກໍ່ສ້າງພື້ນຖານໂຄງລ່າງຂອງສະຖາບັນທີ່ຈຳເປັນ ເຊັ່ນ: ຫໍສະໝຸດຕຸລາການ, ຫ້ອງຮຽນ, ຫໍພັກ ໃຫ້ມີຄວາມທັນສະໄໝ, ສາມາດຮອງຮັບການຮຽນ-ການສອນ, ການພັກເຊົາ ໄດ້ຢ່າງເໝາະສົມ.

(ຂ່າວ: ຕຸໄລເພັດ ,ຂໍ້ມູນ ສປສສ)