ໃນໂອກາດທີ່ ທ່ານ ນາງ ກຣາຕາເອັນຕະ ແວດານິງຕຣຽດ ເອກອັກຄະລັກຖະທູດອິນໂດເນເຊຍ ປະຈຳ ສປປ ລາວ ພ້ອມດ້ວຍຄະນະ ລົງເຄື່ອນໄຫວ ແລະ ເຮັດວຽກຢູ່ ແຂວງໄຊສົມບູນ ໃນຕອນເຊົ້າຂອງວັນທີ 14 ມີນານີ້, ທ່ານ ໄດ້ເຂົ້າພົບປະການນຳແຂວງໄຊສົມບູນ ຢູ່ທີ່ຫ້ອງຮັບຮອງຫ້ອງວ່າການແຂວງ ໂດຍການຕ້ອນຮັບຂອງ ທ່ານ ພອຍຄຳ ຮຸ່ງບຸນຍວງ ເຈົ້າແຂວງໄຊສົມບູນ, ມີບັນດາການນຳພະແນກການ, ອົງການ ຂອງແຂວງ.

ຈຸດປະສົງການເຂົ້າພົບປະ ຄັ້ງນີ້ ກໍເພື່ອແນໃສ່ສືບຕໍ່ສົ່ງເສີມສາຍພົວພັນ ແລະ ການຮ່ວມມືທີ່ດີ ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ສາທາລະນະລັດ ອິນໂດເນເຊຍ ກໍຄືການລົງຕິດຕາມສະພາບການພັດທະນາໃນດ້ານຕ່າງໆ ຂອງແຂວງ ພ້ອມທັງຊອກຮູ້ທ່າແຮງ ເພື່ອຫາຊ່ອງທາງຮ່ວມມືທາງດ້ານເສດຖະກິດ ແລະ ອື່ນໆ. ໂອກາດນີ້, ທ່ານ ພອຍຄຳ ຮຸ່ງບຸນຍວງ ໄດ້ກ່າວຕ້ອນຮັບ ແລະ ຕີລາຄາສູງ ຕໍ່ການມາຢ້ຽມຢາມຂອງ ທ່ານ ນາງ ກຣາຕາເອັນຕະ ແວດານິງຕຣຽດ ໃນຄັ້ງນີ້ ຊຶ່ງສະແດງໃຫ້ເຫັນເຖິງຄວາມສາມັກຄີຮັກແພງອັນດູດດື່ມ ເຕັມໄປດ້ວຍຄວາມອົບອຸ່ນໄມຕີມິດຈິດຕະພາບ ແລະ ດ້ວຍຄວາມເປັນຫ່ວງເປັນໄຍຕໍ່ ແຂວງໄຊສົມບູນ ຂອງພວກເຮົາ ພ້ອມນີ້ ທ່ານຍັງໄດ້ລາຍງານໂດຍຫຍໍ້ກ່ຽວກັບສະພາບລວມ ຢູ່ແຂວງໄຊສົມບູນ ຕໍ່ທ່ານ ກຣາຕາເອັນຕະ ແວດານິງຕຣຽດ ພ້ອມດ້ວຍຄະນະໄດ້ຮັບຊາບ. ນອກນີ້ ທັງສອງຝ່າຍຍັງໄດ້ມອບຂອງທີ່ລະນຶກ ເຊິ່ງກັນ ແລະ ກັນ ອີກດ້ວຍ.

(ຂາວ: ບັງອອນ ເພັດມະນີ)