ຂ່າວຕ່າງປະເທດລາຍງານ ໃນວັນທີ 13 ມີນາ ຜ່ານມາວ່າ: ອົງການບັນດາປະເທດຜູ້ສົ່ງອອກນ້ຳມັນ (OPEC) ປະກາດວ່າ: ຕົນຈະຮັກສາການຄາດຄະເນການເຕີບໂຕຂອງຄວາມຕ້ອງການນ້ຳມັນທົ່ວໂລກໃນປີ 2025 ແລະ 2026 ໄວ້ຄືເກົ່າ ໂດຍບໍ່ມີການປ່ຽນແປງ.

ໃນບົດລາຍງານຕະຫຼາດນ້ໍາມັນປະຈໍາເດືອນທີ່ເປີດເຜີຍໃນ 12 ມີນາ ຜ່ານມາ, OPEC ຄາດວ່າຄວາມຕ້ອງການນ້ໍາມັນທົ່ວໂລກຈະເພີ່ມສູງຂຶ້ນ. ໂດຍຄາດຄະເນວ່າຄວາມຕ້ອງການຈະເພີ່ມຂຶ້ນ 1.45 ລ້ານບາເຣນຕໍ່ມື້ໃນປີ 2025 ແລະ 1,43 ລ້ານບາເຣນຕໍ່ມື້ໃນປີ 2026 ຊຶ່ງບໍ່ປ່ຽນແປງຈາກການປະເມີນໃນເດືອນກຸມພາ ຜ່ານມາ.

OPEC ຄາດວ່າ: ຄວາມຕ້ອງການນ້ຳມັນທົ່ວໂລກໃນປີ 2025 ສະເລ່ຍຈະຢູ່ທີ່ 105.2 ລ້ານບາເຣນຕໍ່ມື້ ຊຶ່ງໄດ້ຮັບແຮງໜຸນຈາກປະລິມານການເດີນທາງທາງອາກາດທີ່ເຂັ້ມແຂງ, ການສັນຈອນທາງຖະໜົນຫົນທາງທີ່ຄຶກຄື້ນ ລວມເຖິງບັນດາການເຄື່ອນໄຫວໃນຂະແໜງອຸດສາຫະກຳ, ການກໍ່ສ້າງ ແລະ ກະສິກຳ ທີ່ມີການຂະຫຍາຍຕົວດີໃນບັນດາປະເທດນອກອົງການເພື່ອການຮ່ວມມື ແລະ ພັດທະນາທາງເສດຖະກິດ (OECD).

ທັງນີ້, OPEC ໄດ້ຮັກສາການຄາດຄະເນການເຕີບໂຕຂອງເສດຖະກິດໂລກໃນປີ 2025 ແລະ 2026 ໄວ້ຄືເກົ່າ, ໂດຍຄາດວ່າຈະເຕີບໂຕ 3.1% ໃນປີ 2025 ແລະ 3,2% ໃນປີ 2026.