ຂ່າວສານຊີອາໄອ ລາຍງານໃນວັນທີ 13 ມີນາ ຜ່ານມາວ່າ: ໃນໄລຍະຈັດກອງປະຊຸມ ຄັ້ງທີ 3 ຂອງສະພາປະຊາຊົນແຫ່ງຊາດຈີນ ຊຸດທີ 14 ຢູ່ຫໍສະພາປະຊາຊົນ ທີ່ນະຄອນຫຼວງປັກກິ່ງ ຂອງຈີນ ລະຫວ່າງວັນທີ 5-11 ມີນາ ຜ່ານມານີ້, ຄະນະຜູ້ແທນເຂດປົກຄອງຕົນເອງເຜົ່າຈ້ວງ ກວາງຊີ ໄດ້ຍື່ນ “ຂໍ້ສະເໜີກ່ຽວກັບການສະໜັບສະໜູນເຂດກວາງຊີສ້າງຕັ້ງສູນຮ່ວມມືແບບຫົວຄິດປະດິດສ້າງດ້ານປັນຍາປະດິດຈີນ-ອາຊຽນ”. ໃນຍຸກ AI, ເຂດກວາງຊີໄດ້ເສີມຂະຫຍາຍທ່າແຮງພິເສດຂອງຕົນ, ເພີ່ມທະວີການຮ່ວມມືດ້ານເສດຖະກິດດີຈີຕອນກັບປະເທດສະມາຊິກອາຊຽນ. ໃນເດືອນກຸມພາ 2025 ນີ້, ເຂດກວາງຊີ ແລະ ສປປ ລາວ ໄດ້ເຊັນສັນຍາວ່າດ້ວຍການຮ່ວມກັນສ້າງສູນຮ່ວມມືແບບຫົວຄິດປະດິດສ້າງດ້ານປັນຍາປະດິດ ຈີນ-ລາວ ຊຶ່ງເປັນສູນຮ່ວມມືແບບຫົວຄິດປະດິດສ້າງດ້ານປັນຍາປະດິດແຫ່ງທຳອິດລະຫວ່າງຈີນ ແລະ ປະເທດສະມາຊິກອາຊຽນ.

ຊຸມປີມໍ່ໆມານີ້, ການຮ່ວມມືສອງຝ່າຍ ແລະ ຫຼາຍຝ່າຍໃນຂົງເຂດດີຈີຕອນລະຫວ່າງຈີນ ແລະປະເທດສະມາຊິກອາຊຽນໄດ້ພັດທະນາຢ່າງວ່ອງໄວ, ເພີ່ມພະລັງແຮງຂັບເຄື່ອນໃໝ່ຫຼາຍກວ່າເກົ່າເຂົ້າໃນການພັດທະນາຂອງເສດຖະກິດ-ສັງຄົມໃນພາກພື້ນ.