ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 12 ມີນາ ຜ່ານມາ ຢູ່ນະຄອນຫຼວງຮ່າໂນ້ຍ, ທ່ານ ຟ້າມມິງຈິງ ນາຍົກລັດຖະມົນຕີ ຫວຽດນາມ ໄດ້ໃຫ້ການຕ້ອນຮັບທ່ານນາງ ນິໂຄລາ ເບຍ ຮອງປະທານທະນາຄານລົງທຶນເອີຣົບ (EIB), ພ້ອມກັບການນຳຂັ້ນສູງຂອງ EIB ແລະ ກຸ່ມບໍລິສັດ Brosnan Norden (ເຢຍລະມັນ).

ຂ່າວລະບຸວ່າ: ທ່ານ ຟ້າມມິງຈິງ ສະເໜີ EIB ແລະ ຫວຽດນາມ ເຊັນສັນຍາຄວາມຮ່ວມມືເພື່ອການພັດທະນາ (ODA) ສະບັບໃໝ່, ດ້ວຍຂອບຂະໜາດດ້ານການເງິນຫຼາຍກວ່າເກົ່າ, ດອກເບ້ຍບຸລິມະສິດກວ່າເກົ່າ, ມີລະບຽບການບໍລິຫານຢ່າງງ່າຍດາຍກວ່າເກົ່າ ແລະ ເງື່ອນໄຂບໍ່ເຂັ້ມງວດ, ບໍ່ພຽງແຕ່ສະໜອງການເງິນໃຫ້ແກ່ພາກລັດເທົ່ານັ້ນ ຫາກຍັງໜູນຊ່ວຍເງື່ອນໄຂໃຫ້ແກ່ທົ່ວພາກເອກະຊົນຂອງຫວຽດ ນາມອີກດ້ວຍ. EIB ໄດ້ແບ່ງປັນບົດຮຽນປະສົບການໃນການຄຸ້ມຄອງ ແລະ ເຄື່ອນໄຫວລະບົບການເງິນທີ່ປະສົບຜົນສຳເລັດ, ຍືນຍົງ; ຊ່ວຍເຫຼືອ, ຖ່າຍທອດເຕັກໂນໂລຊີທີ່ກ້າວໜ້າ, ບຳລຸງສ້າງຊັບພະຍາກອນມະນຸດ, ວິທະຍາສາດການຄຸ້ມຄອງໃຫ້ແກ່ ຫວຽດນາມ.

ສ່ວນທ່ານນາງ ນິໂຄລາ ເບຍ ໃຫ້ຮູ້ວ່າ: EIB ໄດ້ສ້າງຕັ້ງການພົວພັນຮ່ວມມືດ້ານການເງິນ ກັບ ຫວຽດນາມ ນັບແຕ່ປີ 1997, ໄດ້ຮ່ວມມື, ຊ່ວຍເຫຼືອພັດທະນາພື້ນຖານໂຄງລ່າງ, ສິ່ງແວດລ້ອມ ແລະ ພະລັງງານຢູ່ ຫວຽດນາມ, ໃນນັ້ນມີໂຄງການ Metro ຢູ່ນະຄອນຫຼວງຮ່າໂນ້ຍ ແລະ ນະຄອນໂຮ່ຈິມິນ. ທ່ານນາງ ນິໂຄລາ ເບຍ ຊີ້ແຈ້ງວ່າ EIB ພ້ອມແລ້ວທີ່ຈະຊ່ວຍເຫຼືອຫວຽດນາມ ຜ່ານບັນດາໂຄງການລະອຽດ, ພ້ອມກັບ ຫວຽດນາມ ສູ້ຊົນເຮັດໃຫ້ເປົ້າໝາຍການເຕີບໂຕບັນລຸ 8% ໃນປີ 2025 ແລະ ສອງໂຕເລກໃນຊຸມປີຕໍ່ໄປ.