ກອງປະຊຸມໃຫ່ຍຜູ້ແທນອົງຄະນະພັກເມືອງເລົ່າງາມ ແຂວງສາລະວັນ ຄັ້ງທີ XIII ໄດ້ໄຂຂຶ້ນຢ່າງເປັນທາງການ ໃນວັນທີ 13-14 ມີນາ 2025ນີ້ ທີ່ສະໂມສອນຂອງເມືອງ ໂດຍການເປັນປະທານຂອງ ສະຫາຍ ວຽງວິໄລຄໍາ ອຸດຕາສັກ ວ່າການເລຂາພັກເມືອງ ເຈົ້າເມືອງໆເລົ່າງາມ, ເປັນກຽດເຂົ້າຮ່ວມຂອງ ສະຫາຍ ດາວວົງ ພອນແກ້ວ ກໍາມະການສູນກາງພັກ ເລຂາພັກແຂວງ ເຈົ້າແຂວງສາລະວັນ, ມີແຂກຖືກເຊີນ ແລະ ຜູ້ແທນສົມບູນ ທີ່ເປັນຕົວແທນໃຫ້ສະມາຊີກພັກທົ່ວເມືອງເຂົ້າຮ່ວມ.

ສະຫາຍ ວຽງວິໄລຄໍາ ອຸດຕາສັກ ໄດ້ກ່າວວ່າ: ໃນໄລຍະ 5 ປີຜ່ານມາ, ທົ່ວເມືອງແມ່ນມີສະຖຽນລະພາບ, ທາງດ້ານການເມືອງມີຄວາມໜັກແໜ້ນ, ສັງຄົມມີຄວາມສະຫງົບເປັນລະບຽບຮຽບຮ້ອຍ, ປະຊາຊົນບັນດາເຜົ່າມີຄວາມສາມັກຄີປອງດອງເປັນປືກແຜນແໜ້ນໜາ ແລະ ເຊື່ອໜັ້ນຕໍ່ການນຳພາຂອງພັກ ເສດຖະກິດ-ສັງຄົມມີການຂະຫຍາຍຕົວຢ່າງຕໍ່ເນື່ອງ, ຊີວິດການເປັນຢູ່ທາງດ້ານວັດຖຸ-ຈິດໃຈຂອງປະຊາຊົນໄດ້ຮັບການຍົກລະດັບດີຂຶ້ນເປັນກ້າວໆ, ພະນັກງານ-ສະມາຊິກພັກຈຳນວນຫຼວງຫຼາຍ ໄດ້ຮັບການບໍາລຸງກໍ່ສ້າງໃນຂະບວນການວຽກງານຕົວຈິງ ເຮັດໃຫ້ບົດບາດການນຳພາຂອງພັກໃນທົ່ວສັງຄົມໄດ້ຮັບການເຊີດຊູສູງຂຶ້ນ. ຈາກນັ້ນ, ຜູ້ເຂົ້າຮ່ວມກອງປະຊຸມກໍໄດ້ຮັບຟັງການຜ່ານບົດລາຍງານການເມືອງ, ບົດລາຍງານການຍຈັດຕັ້ງປະຕິບັດແຜນພັດທະນາເສດຖະກິດ-ສັງຄົມໃນໄລຍະຜ່ານມາ ແລະ ທິດທາງ 5 ປີຕໍ່ໜ້າ, ພ້ອມດ້ວຍບົດສຳຫຼວດການນຳພານລວມຂອງຄະນະບໍລິຫານງານພັກເມືອງ. ໃນໄລຍະຜ່ານມາເມືອງເລົ່າງາມກໍໄດ້ເອົາໃຈໃສ່ໃນການຄົ້ນຄວ້າເຊື່ອມຊືມ ແລະ ຜັນຂະຫຍາຍມະຕິຂອງສູນກາງພັກ, ມະຕິຂອງອົງຄະນະພັກແຂວງ ແລະ ມະຕິຂອງອົງຄະນະພັກເມືອງ, ກອງປະຊຸມຈະໄດ້ດໍາເນີນໄປເປັນເວລາ 2 ວັນ ຈິ່ງສໍາເລັດ.

(ຂ່າວ-ພາບ: ວົງດາລາ ຈັນທະວົງ)