ແຂວງບໍ່ແກ້ວ ສປປ ລາວ ແລະ ແຂວງຊຽງຮາຍ ຣາຊາອານາຈັກໄທ ໄດ້ຈັດກອງປະຊຸມປຶກສາຫາລືກ່ຽວກັບແນວທາງການແກ້ໄຂບັນຫາຢາເສບຕິດ ທີ່ລັກລອບຂົນສົ່ງຕາມລຳແມ່ນ້ຳຂອງ ຂຶ້ນໃນວັນທີ 13 ມີນາຜ່ານມາ ທີ່ຫ້ອງວ່າການແຂວງບໍ່ແກາວ, ເຂົ້າຮ່ວມຝ່າຍລາວນຳໂດຍທ່ານ ຄຳຜະຫຍາ ພົມປັນຍາ ຮອງເຈົ້າແຂວງບໍ່ແກ້ວ, ຝ່າຍໄທນຳໂດຍທ່ານ ພົນໂທ ກິດຕິພົງ ຊື່ນໃຈຊົນ ຜູ້ບັນຊາການໜ່ວຍບັນຊາການສະກັດກັ້ນ ແລະ ປາບປາມຢາເສບຕິດ ແລະ ເຄມີ ຊາຍແດນ ພາກເໜືອໄທ (ຜບ.ນບ.ຍສ. 35), ມີບັນດາຜູ້ແທນຈາກພະແນກກາຍນທີ່ກ່ຽວຂ້ອງ, ເຈົ້າເມືອງ-ຮອງເຈົ້າເມືອງຂອງສອງຝ່າຍເຂົ້າຮ່ວມ.

ກອງປະຊຸມຄັ້ງນີ້, ທັງສອງຝ່າຍ ໄດ້ຕົກລົງ ແລະ ເປັນເອກະພາບກັນຈະເພີ້ມຄວາມຮັດກຸມໃນການປະສານງານ ລະຫວ່າງ ເຈົ້າໜ້າທີ່ທັງສອງປະເທດ ກໍຄືສອງແຂວງບໍ່ແກ້ວ ແລະ ແຂວງຊຽງຮາຍ ໃຫ້ຫຼາຍຂຶ້ນໃນການຕິດຕາມກຸ່ມເປົ້າໝາຍລັກລອບຂົນສົ່ງຢາເສບຕິດຂ້າມແດນ, ສິ່ງສຳຄັນທີ່ຈະໄດ້ເອົາໃຈໃສ່ທີ່ສຸດແມ່ນການເພີ້ມທະວີໃນການວາງກຳລັງລາດຕະເວນຕາມຊາຍແດນ, ເພື່ອເຝົ້າລະວັງຈຸດຂ້າມລອຍຂອງຢາເສບຕິດທີ່ເປັນພື້ນທີ່ຈຸດຫຼໍ່ແຫຼມມີພູຜາປ່າດົງຕິດກັບແມ່ນ້ຳຂອງທີ່ເປັນເສັ້ນຊາຍແດນລະຫວ່າງປະເທດ, ທັງສອງຝ່າຍຈະໄດ້ຕິດຕາມ ແລະ ສະໜອງຂໍ້ມູນຂ່າວສານໃຫ້ກັນ ແລະ ກັນໄດ້ຮັບຊາບໂດຍໄວ ແລະ ທັນການເພື່ອປາບປາມ, ຕ້ານ ແລະ ສະກັດກັ້ນການລັກລອບເຄື່ອນຍ້າຍ ຫຼື ຂົນສົ່ງຢາເສບຕິດ ຕາມລຳແມ່ນ້ຳຂອງ ແລະ ອື່ນໆ.

(ຂ່າວ: ບຸນຈັນ ມະນີໄຊ)